[真人真事][校園][純愛]《婚宴上的重遇》: 第四十章

之後我地約左平安夜嗰日
四點半喺屋邨巴士站等,
一齊搭巴士出去旺角
我仲好記得係平安夜嗰日,
好早就醒左
同埋唔知係咪自己問題,
前一晚瞓覺嗰陣,
成日喺度諗平安夜我同若凝出去會點
會唔會有突發事情呢
結果就成日喺夢境裏面預演情況




瞓一陣醒一醒
呢個情況出左幾次
之後就索性早啲起身
結果嗰日我覺得特別漫長
平時都冇呢個感覺
有時真係好衰,
平時你冇期待嘅野發生嗰陣,
啲時間真係好快過
但今日就唔係,
我地約左四點半




八點先食野,
雖然話食韓燒啫
但冇理由晏晝唔食架
所以我就落左去買野食
食埋嘅話啲時間就好過啲,
唔使成日上網上到悶
我仲好記得我嗰日特登沖埋涼出去
平時我出街就唔會沖涼嘅
嗰日就屎忽痕走左去沖涼,
喺屋企冇出汗都照沖




費事一陣臭親人啦
之後我就早少少去到
因為真係好心急,
寧願早啲去,
而若凝亦都準時到巴士站,
一見佢嗰陣,
真係有一刻呆左
因為我未見過打扮得咁靚
平時見佢一係就著校服
出街的話都係著得好casual,
但係今次佢化左個淡妝
令佢原本已經得天獨厚嘅樣,
再提升到另一個層次
因為佢唔係話化得好離譜
唔會化到鬼五馬六先囉




上身著左一件米白色嘅大褸
我冇睇錯應該係著白裙,
之後再加一條黑色嘅legging
同埋拎住個袋,
你諗下,
我到今時今日都仲記得佢當日係點樣著
你就知個印象幾深刻啦
再望下我自己,
只係普通恤衫牛仔褲
早知平時就買多啲衫啦

若凝:「今日著恤衫喎 」
我:「咪趷我啦
今日點都唔夠你靚 」
呢個真係真心話




當時唔係話想氹佢,
若凝:「真係 」
我:「係呀
著到好似去飲咁樣 」
若凝:「多謝喎咁好口 」
我:「仲要化埋個淡妝 」
若凝:「傻仔你嘅眼力都唔錯 」
我:「痴線唔好講到我好似盲咁樣 」
若凝:「唔係呀我覺得你真係
不過今日好返啲 」
我:「上車啦咁多野講
有巴士喇.」
上到去嗰架巴士嘅上層唔算多人,
所以我地就坐後啲
方便傾計丫嘛




之後若凝喺佢個袋拎左兩個聖誕帽出嚟
若凝:「一陣一齊戴 」
我:「唔好啦唔想戴帽呀 」
若凝:「聖誕帶一次啦 」
我:「唔好啦 」
若凝:「冇啲節日氣氛架你 」
我:「你想喺邊度戴先 」
若凝:「言下之意即係你肯戴 」
我:「咁啦,
一陣食飽搭完巴士返嚟戴喇唉
費事俾你煩足全程 」
其實若凝又點會煩呢
但其實只係我懦弱
我好想同佢講,
我唔想你唔開心,




盡量想滿足你嘅意願
所以先至戴帽
但係我,
又點會咁坦率去講丫
若凝:「好
你講過要算數呀 」
我:「幾時又吹過水 」
若凝:「點知你,
成日講大話
不過你呢個傻仔呢,
成日都口硬心軟
把口就硬,
但係其實俾人講兩講就會轉軚 」
我:「超 」
若凝:「冇野講呢
好心有時把口就唔好咁硬啦,
明明就心軟到死 」
無可否認,
若凝真係好熟我,
我成日對住佢,
就係做唔到坦率,
總係覺得好難咁樣.