[真人真事][校園][純愛]《婚宴上的重遇》: 第七章

雖然見唔到女神係好唔開心
但係日子總係要過
我亦都唔係喺度自怨自艾嗰啲人嚟,
依家女神唔喺度,
我最多都係冇得目標啫
有時諗返起真係搞笑,
原來嗰陣自己最大嘅目標就係見女神
一個17歲嘅年青人,
原來最大目標就係一個唔識嘅女仔
嗰陣真係唔敢同人講




驚俾人笑
其實依家都係
講遠左,
返返嚟先
咁講真,
女神唔喺麥當勞,
除左心癮之外,
其實對我唔算好有影響
我都係個返之前嗰種生活 ,
依家仲好




乜試都考晒,
日日戇居居等放榜
咁清閒嘅日子,
其實都好爽
大個左唔會再有架啦
所以我打死都唔會返兼職,
屋企又唔係等我開飯
我自己又冇野買
至於脆辣雞腿包?
咁就梗係會食啦




廢話
我唔會因為女神唔喺度就唔食,
都戇居
因為我真係好鍾意食,
當然啦,
依家梗係唔會好似之前咁癲
日日落去啦,
一個禮拜去兩日到啦
其實每一次落到去,
我都仲係有一個盼望,
就係有一日女神會返嚟,
人就係咁,
有時明知冇可能,
但都仲係會有期待
期望每一次都係換嚟失望,




成日都諗埋啲不切實際嘅野
但又唔會唔諗喎,
結果每一次都係自己同自己講「唉,又見唔到」,
有時真係抵自己死.

講下放榜先,
小弟一如預期可以升返原校讀中六
分數同預期差唔多啦
唔係特別高
亦都唔係特別差,
中規中矩
呀成同埋身邊玩開嗰班全部都同我一樣升返原校讀中六
正
起碼唔使咁悶丫,
出去食飯,放學都有伴




好彩學校要求唔算好高,
唔係就大鑊
有啲同學就冇咁好彩,
見佢喊晒口咁樣
應該都係瓜多個菜
邊有個個咁好彩丫,
咁我講返放榜之後等開學嗰陣發生嘅事先
其實都冇乜特別,
有啲去左旅行
有啲就返兼職
我之前都講,
我就戇居居喺屋企打下機
當然打J都有啦
間唔中就出去行下,
你話我完全冇諗女神就呃你嘅,




有時自己喺度ff
唔知行街撞唔撞到佢,
返嚟搭巴士都係
喺度諗下女神會唔會搭同一架巴士
畢竟佢喺我屋村嗰間麥當勞嗰度做,
應該同我都係住同一頭
當然啦,
每一次都係自己ff上腦
一次都見唔到,
都預左架啦,
唔明點解要失望
但就係咁抵死,
講極都唔聽.

個幾兩個月過去,




終於正式展開中六生涯喇
當時心諗,
又要返學喇
之前嗰啲咁頹廢嘅生活,
冇得再過
諗落真係有少少唔係好開心
喺嗰陣,
唔多唔少身邊都有人叫我要珍惜返學嘅日子
唔係仲有好多年可以返咋,
有得返就返啦
唔好嫌棄,
我嗰陣心諗都傻嘅
返學又要早起身
日日喺學校都唔知做乜
你估求學真係求知識咩,
喺學校hea又冇屋企咁爽,
出嚟做野仲好啦
又有錢搵
唔使好似中學咁樣,
俾人管住晒
頭髮長少少又話唔得
唔帶皮帶又唔可以,
呢樣唔得嗰樣唔得
九年之後再問依家嘅我
我會否定晒我上面講嘅野
原來嗰陣身邊啲人講得冇錯,
不過已經冇用,
時間過左就係過左
唔會好似打機咁樣,
有得save and load,
人就係咁衰,
有嗰陣又唔珍惜,
好喇,
到冇左嗰陣,
就學人喺度懷念
又講遠左啲
返返嚟先
咁大家都知新學期第一日做啲乜野架啦,
不外乎都係聽下校長廢噏
仲要烈日當空之下聽,
都咪話唔攞命,
跟住上到去班房
班主任就同我地講,
班主任:「你地都大架喇,
求其揀位坐啦 」
原本我就想坐單丁位
因為我啲朋友全部都唔係呢一班
真係頂佢個肺
離晒譜,
搞到我好似與世隔絕咁樣
點知啲單丁位俾晒啲毒勁坐
算啦,
鬼叫自己慢
之後我就求其坐低
坐低先發現課室原來仲有好多空凳,
我地嗰班有唔少人冇返
佢地真係好野,
第一日就缺席
之後班主任再講:「好喇,我依家去接班生上嚟
你地自己乖乖地喇 」
咁成班成班就梗係起哄啦
我心諗邊q個插班生
唔知係男定女呢
最好係靚女啦
說時遲那時快,
插班生好快上左嚟仲入埋班房
我嗰刻o晒嘴
呆左喺度,
完全俾唔到反應
我仲好記得當時自己個世界好似靜止左咁樣.