《病港》: 75

對話好不容易才結束得到，王達尼步出走廊時更有些心跳快速、喘氣的徵狀：「估唔到‧‧‧仲緊張過見到病者。」


「真係兩個奇怪嘅人。」我回頭望返，那位具有文藝氣質的女生：「佢真係搞得掂？雕刻好講天份。」


「你唔好以為得你一個係個啲大名鼎鼎嘅人物，愛紗佢都係。」王達尼介紹著他的意中人：「唔好睇少佢係女仔一個‧‧‧喺C橦呢座大工坊入面，佢係一個生活狂人，任何手工藝或者加工技術都難唔到佢，算得上十通九精～如果呢家個C橦主管死咗，就差唔多可以話係下一任工坊嘅主管。」


「所以你送紅寶石用意係，打算勾結下未來工坊主管，令自己生意獲利？」如果是的話，我會很佩達尼的機心。






「呢個其次啦～」王達尼又點起枝煙，抽著：「最主要，都係因為我鐘意佢，呢種技能十足又能幹嘅女仔‧‧‧‧‧‧對我呢種資本主義嚟係致命傷。」


在這段空檔的時間，無聊的我們去了工坊四樓最大的武器製造室裡，一邊參觀一邊談些有的沒的事情。


在大本營中，王達尼算是讓我能自然地交流的一個人，因為他都從不掩飾自己貪財風趣的性格。






我問：「我真係想知你以前係做啲咩維生。」


我們步入到打鐵、磨鑽聲不斷的武器製造室了，裡面擺放著一張又一張的武作檯，上面又放住不同的零件工具讓人組件製作。


「你有興趣知？我從來冇同人講過。」王達尼淡淡地笑著。

「有得聽嘅，當然有興趣知。」我望到幾個正在燒鐵的匠人。


王達尼一如他風格，說：「要問人，就先講自己。」


「我？」


「嗯～」他雙手放在後腦，輕輕托住而行：「唔好同我講係無業廢青～我唔會信呢啲廢話。」


「咁大家唔好講。」







「Hey‧‧‧！！兩位入嚟，請問咩幫到你？」一位似是鐵匠部主管的矮男人，走過來說：「我係呢間武器製造室嘅主管。」


「呃‧‧‧其實都係隨便行下。」王達尼答。


「既然都嚟到咁就順便，反正想整好耐。」我把傘子交上，說：「有冇得將前端個舊類似木塞嘅物體，轉做鋒利嘅利器。」


「呃‧‧‧‧‧‧」他接過我的傘子，上下打量一番：「得嘅‧‧‧不過咁樣改造有少少危險，就可能要收貴啲啲，咁樣我用嘅材料都會上乘少少。」


「一罐豉汁鯪魚，夠？」我擔任大本營攻擊學導師期間，都收到了不少糧食工資。






「呵呵，你把遮本身都有少少損毀咁～要唔要幫你維修埋？我哋師傅嘅手工好好，可以做到新嘅一樣！」主管又說。


「咁‧‧‧加多包公仔麵。」


「哈哈！如果你想嘅，我可以連枝骨架都幫你‧‧‧‧‧‧」


「得，」我制止住主管說話，索性把一顆果汁糖取出：「幫我整到最好。」


「啊‧‧‧吓‧‧‧‧‧‧！！？」鐵匠主管見到果汁糖後，驚呆了。






「喂，你咪傻啊‧‧‧」王達尼低聲在我耳邊，說：「你呢一粒果汁糖都已經夠你買多幾把遮‧‧‧‧‧‧」


「好用嘅嘢一把就夠。」


「不過你呢啲果汁糖‧‧‧係直頭可以買到大本營一般買唔到嘅武器‧‧‧！」王達尼說得比我還要肉緊，就好像我的糖是他一樣。


「咩武器，一般買唔到‧‧‧？」我問。


王達尼望望手錶，苦惱地說：「雖然可能會流失你呢位大客，不過都同你講下～每逢星期三，大本營都會有個神秘商人走入嚟貿易，我見過佢賣嘅其中一樣嘢‧‧‧‧‧‧係手槍，但佢指定要用一定數量果汁糖，先會肯賣俾你。」






「‧‧‧手槍？」掌握住這武器的話，在世界中橫行簡直如同上帝：「對方係咩人？」


「應該同我一樣，都係獨自出外搜索嘅拾荒者‧‧‧但我只會喺大本營擺賣，而佢就高我一層樓，佢會每星期喺呢一區嘅勢力範圍到遊走貿易‧‧‧‧‧‧所以每一個倖存營嘅特色同有乜珍貴嘅貨幣，佢都好清楚。」王達尼呼了一口煙，說：「不過通常好少人知，除咗我呢啲商家佬或者經常去市集行街嘅人。」


「我見過市集有個阿人自稱退休警察，都好似賣過手槍‧‧‧‧‧‧」我憶述起很久很久的往事。


「喔‧‧‧‧‧‧個條友賣嘅係玩具槍嚟，之前我已經當眾戳爆咗佢。」


「兩位意下如何‧‧‧‧‧‧？」鐵匠主管把目光放在我的果汁糖上，已經等得不耐煩了。


「決定咗，一包公仔麵同豉汁鯪魚，幫佢改造下把遮。」王達尼沒問過我意見，就直接代我決定。


「咁粒糖‧‧‧‧‧‧」主管瞪大了眼睛。


「等你識整把AK出嚟個陣，再嚟問我哋拎。」王達尼答。



傘子也送去給工坊的人改造後，我便兩手空空的等待住一切事情的完成，包括剛才送去給愛紗削的木雕。處身於C橦時，感覺就是跟其他樓層不一，在這裡時間過得好快，每一分每一秒都好像充滿活力，每間工坊房中亦吵吵鬧鬧的。


與D橦平靜、走廊冰冷冷的醫療大樓相比，有著不同的感受。


這裡，就彷彿有住個人的小社會圈子。


令人用工作，忘卻外面世界的殘酷。


且C樓的休息室內，大家都高興地玩著撲克牌、比腕力遊戲、跳舞、做些有趣的小手工玩意，如果大本營四橦大樓都是工坊，那麼這種愉快的工作氣氛，會否感染到整個大本營？


我對C樓的評價，是不錯。


在C樓坐了差不多半天，在這間無論地板、天花、牆身都是用木板一塊塊鋪設的休息室中，我充分感受到熱情與活力。


王達尼還跟我說，工坊的休息室每晚都會有場歡樂的社交派對，介時大家會手牽手的跳舞、唱歌、大笑，有時候他一個人靜得發悶了，就會過來這兒添一下笑悅的氣息，與八樓的權貴上流派對相比，更是有過之而無不及。


我說：「夜晚有時間我真係要嚟參觀下。」大本營的人，在晚上普通會喜歡留在室內之中，除了比較暖和之外更有安全感。


「都坐咗半日～」王達尼打個呵欠，望下手錶：「你把武器‧‧‧仲有個木雕，都應該差唔多搞掂。」


「咁去定差唔多。」我站起，就跟王達尼往大門離開。


「啪──」在我們正要把門打開時，忽地有個男人急趕地推門進來。


「大家見到木材部主管個孫傑夫丸記住走啊！」那男人顫驚地大喊：「佢發咗癲啊！」


「咩‧‧‧咩事啊？」一些不明所以的人，問。


「佢啱啱返嚟‧‧‧好似‧‧‧好似話唔見咗啲咩！佢啱啱強行搶走咗工坊主管封樓梯口鐵閘嘅鎖匙，唔俾我哋走‧‧‧逐個逐個問邊個拎咗佢嘅嘢‧‧‧‧‧‧答唔到就會打人！！」


「吓‧‧‧我一早都覺得佢精神有少少問題啦‧‧‧」、「痴線架咩！？冇啦啦見人就打？」、「總有啲人制止佢呱！！」、「唔係啊！鎖住咗啲樓梯閘口我哋點出去啊！！」休息室的人開始起哄。


「制止唔到啊‧‧‧！！佢以前好歹都係大本營搜索隊嘅成員，一、二樓紡織部個到又成堆女，冇一個敢出手‧‧‧」


「佢要搵嘅係一張相？」我問。


「好‧‧‧好似，係啊‧‧‧！」那男人答。


「你出嘅小主意‧‧‧似乎出咗個小問題。」我對王達尼說。


「呢啲突發問題邊有人估到嫁‧‧‧‧‧‧」王達尼苦惱地抓抓頭，說：「去睇下咩情況先。」


為了收拾一下突如其來的亂局，我跟王達尼都落去且看發生什麼一回事，從樓梯下去的時候很多女士逆流而行，聽說是因為一樓的出入口鐵閘被鎖住了。


下到一樓後，我們便照住人流逆行的地方而進，走廊滿地散亂的棉布、衣碎和不明的草圖。


「‧‧‧呀！」一把女生尖叫聲，從C００８室傳來。


我跟王達尼趕至，駭見成衣室裡頭站住幾位少女與傑夫丸對峙，她們被迫到去牆角了，愛紗是其中一個。


「俾我‧‧‧‧‧‧」精神不佳的傑夫丸伸出手掌，另一手持住菜刀：「還返朋友俾我！！」


「咩啊‧‧‧係我朋友架。」愛紗緊握住那塊快要刻成的木雕。


「呃唔‧‧‧」王達尼有點內疚的，硬住頭皮衝上前：「如果‧‧‧早知佢會發癲到咁‧‧‧‧‧‧就唔用呢個方法‧‧‧愛紗！擲過嚟！！」


愛紗見到傑夫丸背後的王達尼後，便擲了過去給他。王達尼接到差不多完成的木雕後，再趁傑夫丸未留意之前，跑到愛紗一旁並在對方面前拿走了照片，繼而直奔往門口這邊。


一切看在眼內的傑夫丸馬上轉移目標，不顧一切的追住王達尼，直至王達尼跑到門前要離開之前，他以自己身體作掩飾偷偷把木雕與照片交到我手上，並叫我收好入袍內，待會交回給愛紗繼續雕刻。


傑夫丸果然沒有留意到，王達尼已經暗地把物品都轉交到我手上，於是待他們二人追了出走廊後，我就把東西交回愛紗，說：

「佢叫你繼續整。」


「傻架咩‧‧‧！到底咩嚟架？點解會有個痴線佬為咗呢兩樣嘢追住佢，佢又偷人嘢！？」愛紗接上手，橫望一下木雕和照片。


「背後原因‧‧‧有排解釋，你繼續整埋先。」我說。


愛紗似乎沒受剛才的情況嚇到，繼續安靜地雕完餘下的部份：「肯定為咗某啲利益，而搞到人啦佢？」


「王達尼‧‧‧」我差點忘了他正被一個握住菜刀的人追殺‧‧‧‧‧‧


「佢仲係無變過～」愛紗搖一搖頭。


說畢，我就快速地跑了出去，尋找王達尼他的身影，聽聲大概可以估算到在隔一條走廊的紡織室中。


去到之後，我見傑夫丸正握住菜刀不斷想要刺向王達尼，並一邊大喊：「還返俾我！還返俾我！！」


王達尼則不斷取起周旁的棉被、布料抵擋住菜刀的攻擊：「你試下冷靜啲～！」


到最後，已經沒有任何布物讓王達尼作防禦，他便跑到一旁的紡織機上試圖跑出去走廊，我亦從後捉住傑夫丸的手，將他手上的菜刀搶去並擲走。


在他掙扎期間，我感受到他氣力奇大，於是便與王達尼一起往門外逃跑！


「估唔到條友嚟真‧‧‧」


「佢就快追到嚟。」我望一望身後。


王達尼忽地撿起散落地上的線軸，然後把線的一端給我捉住：「前面分叉路口，識做？」


我們前去到左、右分叉口後，便拉直了線子，各在左右兩邊拉緊，好讓他的腳被絆倒。


精神已經有點錯亂的傑夫丸可能已經失去思考了，想也不想就衝上來，然後摔了一跤。我跟王達尼把握機會，一邊按壓住他不讓其起來，另一邊用軸線不斷捲住他的身體，直至他不能發狂反抗為止‧‧‧‧‧‧！


「啊‧‧‧俾返朋友我啊‧‧‧‧‧‧！」傑夫丸啕哭起來。


「你等等啦，你朋友就快返嚟‧‧‧‧‧‧」


終於，花了好久的力氣，用軸線把傑夫丸捲住了。


「我只係想知道滿天嘅身份‧‧‧」費了好大的力氣，我們坐到走廊上，望住被五花大綁在中間的傑夫丸。


「呵欠～佢到底搞掂未？」王達尼對於錢財以外的東西總是力不從心。


「喂，你要嘅嘢。」由頭至尾都淡定非常的愛紗，走出來見到我們在走廊一旁後，上前把木雕和照片給了我們。


「呃啊！！！！」傑夫丸反應很大，雙眼暴瞪：「呢‧‧‧呢個‧‧‧‧‧‧」


「你朋友。」王達尼把照片和木雕都給回傑夫丸。


我只看了這木雕一眼，就能感覺到是鬼斧神工的完美藝術品，相中人的容貌被愛紗精細地雕刻了在一塊平平無奇的小木頭上，令它富含了意義，彷彿活起來一樣。


傑夫丸由原本的怒氣，漸轉飲泣。


及後，大本營的守衛趕到，把傑夫丸關到去A樓的拘留室。我和王達尼都有前去探望，始終這件事是我們造成的。


「係你兩個‧‧‧」傑夫丸已經回復理性，在拘留室望住我們二人。


「對唔住，」王達尼低頭，有點歉意：「令你要俾人監禁一段時間‧‧‧‧‧‧」


「都好嘅‧‧‧我可以靜下，我需要一個人咁靜下‧‧‧‧‧‧我今日唔發癲，遲早都會諗唔開而發癲。」傑夫丸握住那精緻的肖像木雕，說：「依家只要有同伴陪住我‧‧‧就足夠。」


「明白。」我點頭，問：「咁你可唔可以講俾我聽，關於滿天‧‧‧‧‧‧佢係不良人？」


為了這個真實身份不明的滿天，我耗了一整天了。我沒打算直接走去靈實醫院問滿天，其一路程遠，其二當事人不透露的話，總有他的原因。


「嗯‧‧‧」回復平靜的傑夫丸，平白地說：「個一次‧‧‧我同我嘅搜索隊出去搵劈得嘅樹，就喺我哋日常必經嘅道路上‧‧‧我哋受到突襲，一個著住醫生袍‧‧‧臉容冰冷無情嘅男人，帶住不良人去突襲我哋。」


醫生袍‧‧‧

臉容冰冷‧‧‧


完全是滿天的特徵。