《病港》: ０９

「你點稱呼‧‧‧啱啱真係唔該哂你！」喘住氣的天明望向了他。


「我附近經過聽到商場有舌女好大聲叫，見到你哋之後就跟咗上嚟。」他一句解釋前來的原因：「我叫少佐。」


果然是他。


少佐刻意走到我面前，無視周遭的三人，依然凝視住我：「我可以問你個名？」






「M。」我說話有點生硬：「頭先‧‧‧唔該。」


「我哋繼續向前行睇下‧‧‧？」少佐問。


我點頭。







於是，我們路上有多了一個驀地出現的同伴加入。可惜的是，很後期才出現，不然以他的身手我們大概可以省點力。


待我們再向前差不到四樓的盡頭處，便發現了一個穿住婚紗的少女安坐在一張椅子上，眼皮垂合著。



「夏晴？！」這句話，由少佐口中而出。






「呢個‧‧‧就係‧‧‧‧‧‧你哋要搵嘅女仔‧‧‧？」漢森問。


少佐眼見舊友，立即上前查看她的情況和周圍：「應該只係俾病腦注射咗過量嘅鎮定劑‧‧‧‧‧‧」旁邊散落著不少針筒空盒子與鎮定劑的藥液。


「病腦果然‧‧‧」我望住完好無缺，但陷入著沉睡的夏晴：「係想搵個人類女性結婚。」



「呢到部電視仲開住‧‧‧」阿登走到去商場其中一間電器鋪觀看。






我也走去一望，才發現電器鋪那些電視還未被關掉，反而重複地播放著美劇一段男女主角結婚的畫面。


再望望上下左右的擺設，也跟電視裡面的畫面相差無幾，包括‧‧‧‧‧‧那些觀看婚禮的來賓。



「你哋係大本營個邊嘅人？」少佐此時又問起一句。


「係‧‧‧但點解我哋會入到嚟打病者‧‧‧‧‧‧就‧‧‧」漢森瞧我一眼後，再回答：「我諗有排解釋。」


「好難解釋？」少佐眉頭一皺。






「唔係，」我走電器鋪那邊走回過去，說：「我哋單純為物資。」


「‧‧‧」漢森望了我一望，很明顯地因為跟他一開始聽的，我是要進來救一個女生的原因有出入。


「其實呢個女仔我已經識咗一段時間，」少佐雙手以公主抱的方式，抱起沉睡著的夏晴：「居然會喺到見番佢‧‧‧估唔到，佢會俾病腦捉走咗。」



「咁你帶個女仔番去，我哋拎我哋要嘅物資。」我對少佐說。


「隨便，呢啲係你哋嘅成果。」少佐同意。

在這段搜尋病窩物品的空檔期間，漢森走了過來低聲問起些事來。


「M‧‧‧嗰個女仔，唔係就係你一開始話要救嘅人‧‧‧？點解你好似唔識佢咁‧‧‧‧‧‧」漢森有這樣的疑問也是正常。


「你有時間不如諗下一陣拎啲乜返去仲好。」我淺淺微笑。


「都啱！哈哈哈哈‧‧‧‧‧‧」說畢，漢森就走到天明那邊討論。


「對唔住啊M‧‧‧‧‧‧我好似‧‧‧總係幫唔到手咁‧‧‧」阿登一面歉意的走過來。






「冇所謂‧‧‧反正依家都冇穿冇爛。」我把剛才從病窩中，找到的手電筒送給了阿登：「送俾你，以後就算冇辦法幫手，都叫做可以幫我照下路。」


「係‧‧‧！」阿登雙眼淚光，帶住誠懇的接過手電筒。


「如果你哋要刮物資就差唔多郁手‧‧‧」少佐望望商場外的陰沉天色：「一到天黑，街上所有病者就會去到周圍建築物入面休息。」


「唔‧‧‧郁手。」於是，我們五人連同沉睡的夏晴便返回下層，打算拿得多少就拿多少，總之天黑之前必須要回到大本營。



可詭異的事情‧‧‧出現了。



我們利用電梯步行到樓下第三層後，見到商場中天花板上裝置的自動灑水系統被莫名地觸發過，地上遺下了一大片水跡。


「病腦‧‧‧仲未死‧‧‧‧‧‧？！」一波剛平一波又起，原本以為可以輕輕鬆鬆去搜掠物資的天明表情有如晴天霹靂。


「你好似叫阿登？」少佐把夏晴給阿登抱住，好讓自己能活動雙手去戰鬥：「暫時幫我好好保護住晴。」


「哦‧‧‧喔！」阿登不敢怠慢，接住夏晴並把自己的開山刀交給我。


「你估佢去咗邊‧‧‧‧‧‧」漢森望住前方暗暗的商場走廊，問。


「應該唔遠，」少佐在水跡旁蹲下來，凝視著它留下的水印痕跡：「跟住啲水印，應該搵得到。」



「但係我哋應該要走先係第一目標啊‧‧‧！？」天明插嘴，指住商場外：「就快入黑！唔好理隻大頭怪B喇‧‧‧‧‧‧」


「如果就咁走嘅話，咁我哋咪物資又拎唔到‧‧‧又白白死咗兩個同伴？」漢森啞啞地問。


「我仲返去見我老婆嫁！唔好‧‧‧唔好呢個時候‧‧‧‧‧‧又搞埋啲危險嘢‧‧‧」天明說。


「病腦就算未死都應該重傷，我哋五個人點都會對付唔到？！」漢森經過剛才多場戰鬥後，對付病者的信心似乎有所增加了。


「一陣又好似啱啱咁冇啦啦多隻舌女喺病窩咁點啊！」天明又問。


「我哋有M喺到‧‧‧！」漢森指住我，再指住少佐：「仲有呢位高手，天明！只要跟足指示洗乜驚？」


「不如‧‧‧‧‧‧M，你認為點‧‧‧？」阿登見送葬隊兩人陷入吵鬧的狀態，便馬上轉移問題到我身上。



「病腦嘅智力‧‧‧我哋都領教過。」我沉思了好一陣，說：「首先因為就快天黑嘅關係，病腦好有可能唔會俾我哋行出病窩‧‧‧而以佢智力嚟講，地上留低嘅水印又太過明顯，就好似‧‧‧‧‧‧特登留俾我哋睇嘅一樣。」


「咁你覺得‧‧‧佢係想我哋跟住水印跡行，定向水印跡反方向行？」單手握住鐵球棍的少佐，把棍搭上在自己後肩上。


「咁我哋首先就要代入番佢諗法去思考先‧‧‧‧‧‧」我托住下鄂，盡可能推測出病腦想法的最大可能性：「喺佢眼中，我哋只係一班想要搜奪所有物資嘅入侵者，我哋當然會想要快快離開‧‧‧所以，佢有可能有佢腳印嘅方向，先係最安全。」


「吓‧‧‧？但係‧‧‧點諗都唔合理喎‧‧‧‧‧‧！擺到明佢俾火燒得太痛，亂咁向某個方向跑走就算啦！？」天明提出：「而且冇病腦腳印嘅左邊，我哋二樓上嚟個陣行過有後樓梯，另一條好似乜都冇‧‧‧得啲鋪頭仔咁渣喎？」



「就係因為個條路太正常，先顯得唔正常。點都好，就算係行向有佢腳印嘅方向都冇所謂‧‧‧最多見到，順手殺埋。」我說。



「咁最後決定係‧‧‧‧‧‧」少佐選擇聽取我的意見。


我用刀指住三樓分叉路的右面走廊：「行去有佢腳印個邊嘅方向。」


「唉‧‧‧」天明嘆了聲，死死氣地跟住我們。


於是，我們一行五人便往右面走去。


‧‧‧


「哧‧‧‧哧‧‧‧」左面後樓梯間傳來了低聲的怪音，頭部被燒得焦黑見肉的病腦從防火門的玻璃窗中，凝視住一行五名活人的背影。


基於商場三樓右面的路我們不熟識，所以要花點時間打探一下，加上為了提防四周突然衝出病者，我們都步步為營，只求安全。


「拎番枝先‧‧‧‧‧‧」漢森經過一間高檔的洋酒館時候，順手牽羊了一樽名酒。


在三樓選擇從商場右邊前行的我們，終於走到了其盡頭處，是一間面積很大的「玩具反斗城」商店，看到此處，天明不禁嘆了口氣。


「都話咗冇路落去‧‧‧‧‧‧」天明他好像有點著急要離開病窩了。

「‧‧‧」少佐也停下來，等待我們下一步的指示。


「唔係啊‧‧‧仲有路。」抱住夏晴的阿登望住附近的商場地圖板，說：「上面寫住「玩具反斗城」有兩個出入口‧‧‧另一個係有樓梯可以落到去二樓下面！」


「嗯。」我走過確實了一下。


「咁我哋繼續行。」少佐繼續擔當領頭的角色。


我小時候就時常經過玩具反斗城，不過這倒是頭一次進去。在昏暗的環境下，內裡擺放在貨架上的模型娃娃都格外恐怖，就好像數百對眼睛盯住你入來一樣。


「似乎病腦真係唔喺右面‧‧‧‧‧‧」漢森點點頭，沿路上都沒什麼大險大難。


「都要小心，病腦見我哋唔行左面可能會喺一、二樓層之間設下陷阱。」我淡淡淺笑：「當然‧‧‧我只係估，估錯唔好怪我。」


「冇問題喎‧‧‧‧‧‧我好信你。」漢森這句話聽得出是發自內心。



「咳‧‧‧咳咳咳‧‧‧咳！」霍地，玩具反斗城更入處傳出咳嗽之聲。


「活人！？」天明細聲問我們。


我把食指放在嘴前，示意他暫時收聲。


「咳‧‧‧咳咳咳！！！！！」咳嗽得十分用力的聲音。



不是，正常人應有的咳嗽力度。


「咳聲‧‧‧我見過類似嘅怪物‧‧‧」我腦海中，又浮現了那一年在家中窗前望見街上各種怪物的畫面。


其中有隻，也如同現在這樣咳得異常大力，像是要把整個肺部都咳掉出來一般。它跟一般病者無異，有著滿身的紅點，只是臉上的鼻子異常地大且長著不同大小的肉芽，一凹一凸的看得人發癢。


「我諗，係大鼻‧‧‧」好久沒有出過聲的少佐，終於道出一句。


大鼻‧‧‧名字跟我所描述的怪物很相近，都擁有個大鼻子，看來是它沒錯了。


只是，我沒有見識過它的能力。


「少佐，你見過？」我主動問。


「嗯，」少佐面上毫無懼色，跟一般人大相逕庭：「萬一俾佢發現我哋嘅存在，佢會即刻發癲咁用力咳‧‧‧到最後會打個大乞嗤，佢個鼻會一瞬間釋放出唔同嘅有毒氣體。」


「咩意思‧‧‧‧‧‧」阿登一聽到病者又開始呆滯。


「大本營試過有一隊人喺學校遇到過大鼻‧‧‧佢哋瘋狂攻擊，但係佢一個乞嗤就釋放出令人吸入咗會迷暈嘅氣體，到我哋支援嚟到救佢哋個陣‧‧‧‧‧‧佢哋四個人都已經嚴重暈迷，其中兩個嚴重中毒‧‧‧」


「咁點搞‧‧‧大鼻直頭係範圍攻擊，唔一擊必殺咪好危險？」漢森說。


「所以要喺佢打乞嗤噴出鼻氣之前搞掂佢。」我們一行人停下來，都在聽少佐的說明：「而大鼻嘅弱點，喺鼻。」


「即係我哋要一刀桶入去佢個鼻到‧‧‧？」天明說。


「不過危險就一定。」少佐望向咳聲傳來之處。



「其實唔洗咁麻煩‧‧‧」我從貨架上拿起一個星際大戰的白兵玩具頭盔上手，拋了拋：「‧‧‧直接套入佢個頭咪得。」



「啱‧‧‧咁佢啲鼻氣就噴唔到出嚟‧‧‧！」我把提議說出後，大家彷彿恍然大悟，點頭稱是。



少佐望住白兵玩具頭盔，不禁默默揚起嘴角笑起來，雖然這個建議好可笑，不過卻實用得很。