《病港》: ０５

「晴！」我更大聲的呼喊她，這一下，令她眼皮有微微抖動了，似是想要睜開眼睛。


但當我見到夏晴慢慢回復知覺，自己快要笑逐顏開時，一把尖銳凌厲的叫聲響徹了整所商場‧‧‧‧‧‧



=x-large「哧溜哧溜哧溜哧溜哧溜！！」







我緩慢地抬頭往聲音來源的上方一看，發現了一個巨大的身影。



病腦。



「撲哧撲哧撲哧撲哧！！！！！」它直接從二樓樓層跳了下來，地板發出沉悶的響聲，驚動了灰塵。






眼前的怪物不單全身紅點且頭大身細，更是五觀扭曲，手上握住一雙雪白的高跟鞋，平日詭異的微笑依然，然後急步的走向我想要伸手把我捉拿！


面前這等情況，我立即轉身就跑！阿登也叫得要拆天，在病腦的手要拉住我衫領之際，夏晴真正地醒來了，並被周圍情況嚇得尖叫起來：「呀呀呀呀呀呀呀！！！！！！」


病腦一聽到夏晴的尖叫聲就停止對我的捉捕，回頭望一望夏晴，夏晴此刻亦望見了逃到商場門口的我，馬上呼喊：「M‧‧‧‧‧‧！！！！」






「‧‧‧我會再返嚟！」沒有帶住武器過來的我，只能被迫逃走，跟著阿登有多遠跑多遠，直至回到大本營才停止雙腳。


有驚無險，跟我撿回條命回到大本營的阿登，一回去之後就喊著要叫人去殺死病腦，因為他的妹妹也正可能是落在過它手上。


「M‧‧‧！我‧‧‧我哋即刻去叫首領救人啦！！！」阿登瘋了的想要跑去跟首領說。


我只是默默地按住他的膊，告訴他一件殘酷的事實：「阿登，就算你咁做都冇用‧‧‧呢一個，係大本營同天腦做嘅交易。」


「咩‧‧‧咩意思啊‧‧‧‧‧‧M‧‧‧」






此時，天空下起大雨來，雨水掩沒了周旁不少的高樓大廈，雨大得像瀑布一樣撒下。


「轟隆──」雷鳴隱約四起。


「病腦可能同大本營嘅高層做咗不為人知嘅交易‧‧‧‧‧‧大本營定時定候會運送疑似病人或者真係死人嘅屍體去佢嘅病窩，當然‧‧‧我唔知點解所有貢品之中，得夏晴係冇死，但睇落似係俾人注射咗麻醉劑。」我坐到一張餐桌上，推測下去：「作為回報，病腦會容許大本營嘅搜索隊去佢嘅病窩‧‧‧即係商場入面搵食物同水，怪物需要嘅係活人‧‧‧‧‧‧而大本營嘅人類需要嘅係食物同水，兩者一拍即合。」


「但‧‧‧但係話佢哋交‧‧‧易‧‧‧‧‧‧佢哋‧‧‧點識溝通‧‧‧」阿登提出一個疑問。


「你哋成日講病腦係擁有智力嘅怪物，所以如果佢識得同人類溝通‧‧‧‧‧‧我唔覺得出奇。」

「咁‧‧‧咁即係我哋就算知道呢一場地下交易‧‧‧都阻止唔到，都只可以扮乜都唔知！？」阿登激動地反問。


「的確係咁，但你亦都永遠唔會知道，下一個被送去做貢品嘅人‧‧‧係咪自己。」我盯住阿登雙眼。


「太‧‧‧太唔合理‧‧‧！」阿登用力敲桌。


「社會不嬲係咁，你明知道有秘密交易‧‧‧都只可以視若無睹。」想著想著，我不禁淺淺地笑：「就算‧‧‧‧‧‧傷害到自身利益。」


「好黑暗‧‧‧‧‧‧」阿登似乎接受不到大本營跟病腦勾結的事實。






「‧‧‧嘛」我用手戳一戳阿登的膊背，說：「雖然社會冷酷，但總係有瘋子鐘意從中搞破壞。」


「‧‧‧‧‧‧你意思係？」阿登轉身望向我。


我搭住阿登的膊頭，說：「既然冇人肯幫我哋，我哋就親自去破壞佢哋場交易。」


「我哋‧‧‧我哋‧‧‧‧‧‧點得啊‧‧‧M‧‧‧」



「到時就可以有無窮無盡嘅食物同水‧‧‧‧‧‧你唔覺得好吸引？」

「呢個諗法‧‧‧太大想‧‧‧想頭啦‧‧‧」阿登又畏縮起來。


「喺亂世‧‧‧你將握呢堆物資，換個方式講，就等於掌有千百幾萬喺手，總比成日留喺大本營發呆好啊。」我極力鼓勵著他。


「咁‧‧‧咁我哋要點做‧‧‧就算‧‧‧我真係支持你‧‧‧」


「我哋帶上所有用得著嘅武器，咁就得。」


「咁‧‧‧簡單！？同埋得我哋兩個！！？？」


「唔會，到時會多四個人幫手。」我對阿登拍膊保證。


「唔‧‧‧」阿登點點頭，握實拳頭：「我之前上堂聽過‧‧‧病者都有一個共通點，怕火。」


「火‧‧‧‧‧‧所有生物都離唔開呢個定律。」我從桌上下來，手板著腰：「你幫我去搵啲武器，ok？」


「例如‧‧‧？」


「大本營個市場咁大‧‧‧邊款望落啱手就買咗佢。」


「但係我都冇物品同我交換‧‧‧你新嚟可能唔知，大本營市場嘅嘢唔係共享制，而係用以物易物嘅方式‧‧‧‧‧‧我手頭上除咗一個路飛鎖匙扣外根本咩都冇‧‧‧」


「咁‧‧‧」我摸摸自己背包，有出門前帶住的兩枝水，把其中一枝未開封的拋了給阿登：「呢枝水換到幾多武器？」


「水‧‧‧！？用呢啲必須品換武器！？」阿登就像接到神聖的物品一樣，雙手微抖的捧著Bonaqua蒸餾水。


「冇付出就換唔到巨額嘅收益。」我撥撥手，說：「去。」


「‧‧‧咁你呢？」


「我去搵下啲可以生火嘅用品。」


「咁‧‧‧你需唔需要天拿水‧‧‧？」阿登主動問。


「當然好。」


阿登說自己可以用一枝水的價值，在市場上換到不同的武器及少量天拿水，我就放任他去做。


而自己要做的，就是找些能夠點燃出火的物品，例如火機。


大本營看上去什麼也不缺，但基本上要找個普通的火機都十分困難。我在大本營中尋遍了所有角落，都找不到類似的東西。


有時望住灰沉的天空，與下過不停的雨，無力感都會悄悄溜入我體內。或當我合起雙眼，某些事情又會湧現到我腦上。


但雨點聲，會把我拉回現實。



「食物分配時間，請各位到四樓──」廣播在整個大本營響起，人們聽到後都放下手上的工作，拿食物最緊要。


當然，我也會過去拿一份。



「慢慢嚟～慢慢嚟～一人一份，唔好爭唔好搶～！」



「唔該‧‧‧一份。」在擠迫的人群中，我上前伸出了手。


「嚟！拎住。」派食物的負責人把一塊用牛油紙包住的麵包拋了給我。


收到食物後，我就迅速離開人群，去找個沒人的地方獨自主食，例如三樓的一個小小儲物室。


裡面雖然堆放著建築的廢料，不過唯一特點就是夠靜，無阻我享受煎蛋夾包的美味。


「喀──」忽地，門被推開了。


差點被門聲嚇得咽到的我，往門那邊望去，發現是個九、十歲左右大的小男生開門進來，他跟我一樣手上握住塊包。他望見同樣在這吃飯的我沒有覺得奇怪，只是呆了呆，就坐到其中一個角落虎咽起來。


吃著吃著，走廊外又出現了一陣跑步的聲音，外面其餘房間的門都被「砰」「砰」聲的推開，直至這間房也被人推開了‧‧‧‧‧‧


這次開門的，又是年紀相約的小孩子。


不同的是，他們三人結伴，用仇恨的目光盯住剛才進來吃包的男孩。


「又喺到食嘢！？」站頭的男孩當先捏住他耳朵：「叫咗你一拎到食物要俾我哋嫁喎！！」


「‧‧‧唔」被捏住耳朵的他只顧著想要把麵包快點吞入肚。


「迫佢嘔返出嚟！」三人組之一的另外兩名男孩聽到命令，立即捉住其左右兩臂。


「唔啊‧‧‧‧‧‧！我冇食過嘢‧‧‧‧‧‧」吃包的小男孩不情願地被迫捉起。



「細路‧‧‧你哋做咩。」其實我不想多顧閒事的，只是‧‧‧‧‧‧太騷擾到我了。


「關你事？」三人組的小孩雖然年紀輕輕，卻膽子很大地回駁。


「唔關我事‧‧‧？」我放下手上的麵包，緩緩地站起身、步步走向前：「你嘈到我。」


「你‧‧‧敢膽打我！？我就話俾我阿爸阿媽聽‧‧‧唱通常話俾啲大人知你‧‧‧‧‧‧啊呀！！！！」在那小孩未說完之際，已經被我爽快地摑了一記耳光。



「嘈到死‧‧‧」我凝視住他雙目。


「你‧‧‧你夠膽‧‧‧‧‧‧打‧‧‧打我‧‧‧‧‧‧」被摑了一記耳光的他淚水馬上湧出，慢慢退後：「我話俾‧‧‧‧‧‧啊啊！！！」



我又摑了他一記耳光。


「走‧‧‧你哋只係識得欺善怕惡。」我盯住他們三人：「垃圾。」


「嗚‧‧‧嗚啊！！！！」三人組帶住哭泣的聲音離開這裡，我亦回到自己座位繼續吃著那塊包。


暗淡的房間內，再次回到平靜。


「多‧‧‧謝‧‧‧」那小孩向我道謝。


「冇嘢‧‧‧少事。」



待我們都吃完那塊今天分配的煎蛋包後，就默默地呆坐住休息，快要因為飯氣攻心弄得想睡一覺的期間，那小孩問起我問題：


「你都鐘意喺到食嘢‧‧‧？」


「唔‧‧‧」我搖頭：「只係諗住‧‧‧隨便搵個冇人嘅地方。」


「‧‧‧我都係」


「點解？細路‧‧‧應該係要有一大班朋友，一齊好開心咁相處。」我左眼稍稍望向了他：「點解要自己一個。」


「因為‧‧‧佢哋都叫我做怪胎‧‧‧‧‧‧」小男孩苦苦一笑。


「咁你叫咩名。」


「我叫阿寶。」他會心一笑：「俾你睇啲嘢！」


「嗯？」


緊接，阿寶舉起了手掌並伸出了手指，我才發現‧‧‧‧‧‧他擁有六隻手指。


尾指旁邊，多長了一隻手指出來。


「咁神奇‧‧‧」我望住他多出的一隻手指。


「你覺得神奇？」阿寶笑得更開心：「好少人會覺得神奇‧‧‧‧‧‧」


「係六指症？」我抬頭望向他。


阿寶他點點頭。


難怪別人都叫你怪胎。


我低沉一笑：「幾有趣。」


「你算係第一個‧‧‧見到我第六隻手指都唔驚嘅人。」