一個遇上女神，再忘記她的故事: Chapter 53

「咁點解嗰日喺我屋企你要喊?」我依然想作垂死的掙扎。
 
「我喊係因為同情你呀!同情你咁撚廢比人帶左帽都唔知呀!仲有我喊點解自己花咁多時間投資落你度你都唔長進呀!
 
我唔怕話埋比你知，我接受唔到，我真係接受唔到要喺公屋同你扑野囉。喺你嗰個咩爛鬼友愛村同你做我真係接受唔到。你知唔知Franky住邊度?住奧海城全海景樓呀!我對住個海景同佢做點都好Feel過對住你張霉爛爛既床啦，醒下啦李智傑!」
 
「唔係真架，你快啲話比我聽唔係真啦，好冇?」我不敢相信我的耳朵，CaRmen一定是有甚麼難言之隱才會故意這樣說。不是真的，一定不是真的!
 
「我對你就真係唔係真喇，你管接管送咁又點?人地Franky渣Audi A8架，新車落地都過球架!我次次去你屋企就淨係搭961入屯門咁遠，咪玩啦。」說罷CaRmen擺出一臉不屑的表情。
 




「點解你可以變成咁?你以前都係住屯門喺屯門大架。」我說著說著，開始大哭了…
 
「人會變架李生，係你唔進步，唔關我事呀。」
 
「咁點解你拆散完我同Tracy要同我講對唔住，同Karl散左後要咁後悔喎?唔係真架唔係真架!」眼前這個CaRmen，為甚麼會變回初相識的CaRmen?甚至比初相識的她，更恐佈。
 
「後悔?我喊就代表我後悔?我喊係因為Karl唔要我乍。同埋我要話你知，就算我唔揀你，你都唔會比你同其他女仔一齊呀，我係特登拆散你地兩個呀，吹咩?」
 
「點解你要咁?點解你唔係上次海傍嗰個CaRmen?唔係架，你話我知你係呃緊我，你一定有啲咩苦衷架係咪呀?以前個CaRmen去左邊呀?」我在大街上咆哮，為何我這樣深愛一個女人，她可以把我所做的一切如果糞土，再輕輕鬆鬆的盡情踐踏我?
 




「你話我呃你吖嘛，好!我就坦坦白白話你知，我八年前因為宇軒激嬲我我先約你乍，你估我真係嗒你糖呀?我八年前嗰三千幾蚊電話費係我同其他男人Send短訊既錢。
 
仲有呀，你唔好以為我上年聖誕我真係去左公司Training，我係同Franky去馬爾代夫玩呀。你唔好怨我，我成日叫你陪我去旅行你就話冇錢，人地Franky一開波追我唔好講送貴野，保險單都幫我跑埋呀!我係女人我要既係安全感，唔通跟著個打份牛工搵朝唔得晚既人呀?
 
我會老我會殘，我唔想到我冇晒吸引力嗰陣先至冇得揀呀!我梗係喺我有得揀既時候揀個好架啦!」
 
「我唔係冇錢呀，我係儲錢同你結婚買樓呀!我真係好比心機儲錢架!我會比到幸福你架!」真的，從和你第一日開始，我已經不停儲錢，期望可以和你建立一個簡單而溫暖的家，為何現在你才說你根本不喜歡我?
 
「儲錢?你一個月儲幾多呀?三千?四千?我同佢食餐Amigo都冇左啦，你唔好以為買樓買埋啲二手居屋就算，我喺公屋長大我窮夠喇，冇會所我都唔會住架。結婚你都係慳啲啦，我係想去Four Seasons擺酒呀，唔係去美心皇宮大酒樓呀!」
 




「點解你要咁對我?你唔鍾意我點解又要比希望我呀?喺上環嗰陣我地好Sweet架，求下你，話我知係假好冇?話我知你仲愛我好冇?我真係唔可以承受呢種打擊呀...」上次CaRmen的不瞅不睬，已把我迫得崩潰，經過一年溫暖甜蜜的愛情生活，如果要告訴我所有的都不是真的，我怕我會承受不了這個結果。
 
「你死心啦，我同你一齊冇耐已經同Franky一齊左喇...冇機架喇你。」
 
「咁你即係一直以黎只係當我水泡?」我絕望地說。
 
「我冇咁講過喎。」
 
「唔係水泡係咩?係你隻兵呀? 」我開始接現實，開始連自己都拿自己開玩笑了。
 
CaRmen向我怒目圓睜，然後拋出一句我一世也不會忘記的說話。這句說話的威力足以將過去八年的謊言打破、將所有夢想破滅、將我原本破碎了但修復的心磨成粉末。這句話，把我帶到無盡的黑暗...
 
「...我收你做兵都嫌你渣呀!...」