一個遇上女神，再忘記她的故事: Chapter 43

「拿黎生，呢份保單呢就保到你85歲，如果Touchwood有咩事呢都有百幾萬攞番，都可以幫你老婆同仔女應付不時之需架。」CaRmen耐心地向禿頭哥哥解釋。可惜他並不是在看CaRmen手上的保單，而是她穿上花紋黑絲的長腿。
 
「CaRmen!」我走近叫道。
 
「Henry你黎左呀?同你介紹吖，呢位係黎生呀。佢好好架，想買份保險等老婆仔女多個保障咪黎傾下囉。黎生呀，呢個係我男朋友Henry呀，佢見我黎開呢頭見客咪順便接我放工囉，你唔使理佢架，我地繼續傾得架喇。」CaRmen說道。
 
「黎生你好呀。我叫Henry呀，唔好介意，你唔好睇我斯斯文文咁呀，我曾經為過CaRmen打到人地入廠仲守埋行為架。咁我份人又呷醋喎，咪睇下個衰婆搞乜鬼囉。不過睇你都係正經人家，係我諗多左，唔阻你地傾野，我坐喺度飲咖啡得喇。」為保護我的朋友---CaRmen，我便在言語上對他作出暗示。
 
「Henry你好呀，我都係唔阻你兩個後生仔拍拖喇，吳小姐，你份Proposal我番去研究下，盡快覆番你。」黎生說完便一股腦兒走了。
 




「喂李智傑，我叫你扮我男朋友呀，你做乜趕我客呀?」CaRmen在黎生離開後立即發怒。
 
「喂，咁我都一早講左唔識做戲架啦。」我立即反駁。
 
「乜你咁架…客黎架大佬，我爭一張單就到數喇!今次真係比你累死。」原來CaRmen今個月尚欠一張單交數。
 
「唉怕左你呀，我下個月還晒Grant Loan啲錢鬆動啲，我都想買個保障，食煙食咁耐都驚有Cancer，你聽日番到公司拿拿聲比份Proposal我喇，唉…真係耶穌見到你都嬲呀。」我這時並沒有想過要幫CaRmen，只是碰巧自己有需要，學生貸款亦剛剛還完而找CaRmen投保而已，就算她不賺這筆錢，其他保險Agent亦有機會簽這份保單。
 
「多謝你呀!果然係我老友呀，今晚去食飯我請啦!」CaRmen歡喜的道。於是我們便到中環一個食肆用膳。
 




雖然在去程時跟CaRmen有說有笑，然而我卻盤數著另一件事情。
 
CaRmen在剛才介紹我時說我是她男朋友，其實我是滿心歡喜的，試想想，我在六年多前愛上她，一直祈求成為她的男朋友，不停的進步不停的改善自己，只為這一刻。到我決定放下她時，她卻主動介紹我做她男朋友，雖然我知道這只是一場戲，但我需要一點時間抽離。
 
因為，這句男朋友，令我再陷入了自己的幻想世界。
 
少不更事時，她叫我的傻佬、BB...
少不更事時，我每次為她補習數學時的情境...
少不更事時，我為她放棄理想的科大BBA...
少不更事時，我為她攻讀Marketing...




少不更事時，我為她負上刑責...
 
人成熟了，開始對自己的生活少了一點幻想，但偶然也會把回憶之門從新開啟。面對社會的工作，一些傻氣或熱血的回憶成為我們行屍走肉生活中的唯有精神食糧。如果你問我，我現在可以放棄我所有的一切，來守護住我少年時代最珍貴的回憶。我的少年日記...我會誓死悍衛。
 
我知道CaRmen並沒有心要將回憶重提，我倆也知道這是叫黎生知難而退的手段，然而她卻無意中開啟了我的回憶之門，將我以往對她的思念、愛慕，從新審視一遍。我知道我仍然在守候Tracy，但現在我想暫時將腦袋放空，享受一下以往我為CaRmen做的一切。如果面對下一個她，我又會否如斯瘋狂，如斯無悔地愛?