「無啦啦多左幾個家姐同細妹 Season 2」: 分岔

Kathy：「我應該去邊度先係？」

嘩…點樣答你呢個問題呀…我連自己聽日早餐食乜都唔知…你叫我答你既人生方向？

如果你話學龍咁威咁，唔準諗即刻答既話我就真係答唔出D乜。

不過老實講，佢有咁既諗法我都理解既…換著係我，我諗我直頭會諗到頭都爆添。

我飲多啖fruit punch，之後嘆咗口氣。

我：「我諗呢個問題，唔係其他人可以隨便幫你做決定，一定要自己好好諗清楚，我呢D外人可以做既最多就係聽你講你既諗法。」

一臉正經地胡說八道，講咗等於無講。

Kathy：「係…我都知道…其實我自從上次…即係你個party之後就已經開始諗呢個問題…」

「係個次我知道咗事實之後，我成個人突然就崩潰，成個人都失去理智，仲用刀捅個衰人，話幫阿哥報仇。」

啊我仲好記得個幕，直頭好似school days桂言葉講裏面甚麼都沒有咁，好恐怖。

諗返起都忍唔住要吞啖口水定下驚。

Kathy：「但到咗大家走哂，阿惠送我返去學校既時候，我個腦忽然就一片空白。」

「個一刻，我就係度諗，而家我應該點好？已經搞清楚阿哥點解會自殺，又叫做幫佢報咗仇，咁我之後應該點？我感覺自己好似已經行到去終點，再無路要行咁。」

嘩…你講到好似想…

Kathy：「同樣既說話我都有同阿惠講過，佢個陣就同我講，話之後既事之後先決定都未遲，最緊要係活在當下，同埋唔好比阿哥既事一直束縛住，我自己都應該有屬於自己既人生。」

無諗過阿惠會講到呢D野喎…咪住先，咁似Seed Destiny D對白既？抄架？

我：「所以你就…返學？

」

Kathy：「嗯，阿惠話學校應該會係一個唔錯既環境去俾我沖淡D野，所以就叫我返學，仲叫我去陸運會玩。」

我：「唔…咁睇黎阿惠對你既影響都幾大喎~

」

Kathy：「其實係架…佢係D重要時刻都係我身邊照顧住我…好似以前阿哥咁，令人好有安全感。

」

提起阿惠佢個樣就變到Yui咁怕怕羞羞，睇怕佢都係…阿希RIP。

我：「咁你呢幾日有無得出咩諗法？有既不妨講黎聽下，等我睇下可唔可以俾下意見你。

」

Kathy：「嗯…其實經過陸運會之後我覺得自己而家面前有三條路，一係即刻返去陪我父母，二係留係而家既學校，讀到畢業再算。」

「三，去聖所羅王讀書。」

我有無聽錯…？佢話想去聖所羅王讀書？

我：「但係聖所羅王係阿樂…」

Kathy：「我知道，我知道聖所羅王係阿哥死既地方，我之所以會有咁既諗法係因為我覺得自己應該幫阿哥完成埋佢完成唔到既學業。」

我：「你頭先唔係話過阿惠叫你唔好比阿樂既事一直束縛住，你應該有屬於自己既人生咩，你而家又…」

Kathy：「咁我覺得呢件事又唔算係比阿哥束縛著既，我只係代佢去睇，去享受佢享受唔到既野啫。我都仲係有自己人生既。」

「更何況，呢個都係我自己想做既事，我都想去睇下阿哥曾經過得開心既學校到底係點，雖然而家應該因為你而唔同咗好多，但我都係想去。」

我：「咁…睇黎你已經有自己既決定啦？聽到你有咁多理由去為呢個選擇解釋。」

Kathy：「我諗都係…只不過如果我就咁走咗去好似唔係幾好，畢竟學校仲有其他朋友…」

我：「呢個就唔洗擔心咁多啦，去另一間學校讀書啫又唔係去外國，想見既話約出黎就可以啦。

」

Kathy：「你又好似有道理…咁我諗我知道應該點做喇，多謝你呀阿明。」

我：「唔洗多謝，我都無做D乜，我只係…」

Anna：「你兩個係度傾乜傾到咁開心呀？

」

嘩Anna？幾時出現架？仲有阿惠都係度？你兩個玩偷聽？

阿惠：「Yo大佬明，傾緊乜呀我又傾。

」

我：「無呀講緊你係個令人好有安全感既好男人咋嘛，好喇唔傾啦，比返Kathy你，Anna我地都行囉。」

就係咁，我帶住Anna行開，原本打算行去搵野食，點知都未行到去個邊就已經見到Sarah佢地幾個圍埋一齊，傾計傾到好開心。

Anna咩都唔講就捉住我，大搖大擺行過去Sarah佢地個邊。

佢地幾個好快就注意到我地，仲笑笑口揮哂手咁歡迎我地。

Sarah：「辛苦哂~~飲啖野先啦阿明~