「無啦啦多左幾個家姐同細妹 Season 2」: 鏡子
好快就到夜晚，老母同蘭姨合力炮製左一餐盛宴比我地，Anna同阿惠佢地都被留低一齊食，場面熱鬧到呢。
晚飯之後，又係時候分別，大家都堆哂係門口。
阿惠：「咁大佬明我地聽日見喇。
」Ellen：「我地都係，聽日見喇。
」我：「好，聽日見喇咁，喂咪住先阿惠你聽日都黎咩？
」阿惠：「梗係黎啦兄弟既大日子喎，點會唔黎呀我。
」我：「呀你個衰人真係幾時都搵到位笑我架喎。
」Anna：「你兩個傻仔講夠未呀？
」Anna突然介入我地男人間既對話，我同阿惠都即刻收聲望住佢，點估到佢會走上黎攬住我地兩個。
Anna：「我聽日黎唔到啦，你地自己要小心。」
阿惠：「哈哈Anna哥你唔洗攬埋我架喎，我聽日去做觀眾咋，你擔心阿明好過喇。
」阿惠你真係自尋死路，夠膽當住Anna臉前咁叫佢。
一如我所料，阿惠比Anna打到嗌媽媽，抵死。
係我地笑緊阿惠個柒頭既同時，Ellie走左埋黎我身邊，捉住我隻手。
Ellie：「加油。
」我：「嗯我會架啦，你唔洗擔心咁多，你聽日不如去陪你嫲嫲啦，唔洗黎都可以。
」Ellie：「唔得，我要陪住你，好似以前一樣。
」好似以前一樣..啊？
擾釀左一陣佢地終於都走哂，而家就只係得返Kathy一個尷尷尬尬咁企係度。
係喎要安排佢今晚訓既地方先得，搵大家姐…
大家姐：「好喇我地一於繼續玩桶叔叔！玩通宵！！
」我：「吓大家姐…又玩？
」大家姐：「啊，阿明你無份呀，因為你聽日仲有正經野要做，一定要養足精神先得，所以我以大家姐既身份命令你！而家就去刷牙訓覺！！
」嘩咁對我呀！？天理何在呀大家姐。
不過都好既，有大家姐仲有Sarah同Yui三個睇住Kathy，我都放心D。
就係咁，我乖乖遵循大家姐既命令去左訓覺。令人意外既係，我好快就訓著左，仲好早起左身。
我走出露台，浸泡係剛出現既陽光之中。
每次有大事我都係會咁早起身，好似小學生去旅行咁。
呼，希望今日可以順順利利啦，去食個早餐，拎個好開始先！
於是我梳洗一番就走出自己房，途中經過大家姐間房，度門仲要無閂。
我八卦一下望左入去，見到佢地四個都訓哂係大家姐張床，Yui仲拎住緊把膠刀仔。
睇黎尋晚玩到好夜咁喎。
我輕輕咁幫佢地閂返度門，之後就繼續向飯廳進發。
但去到樓梯口既時候，我又遇上二家姐。二家姐睇落好精神，同尋日係泳池個陣完全唔同。
二家姐：「早晨喎，乜咁早起身呀，定係無訓過？」
我：「有訓呀，仲訓得好好。」
二家姐：「係呀？咁就好，如果今晚你上台打哂喊露既話我都唔知點幫你兜好。」
我：「哈哈…無事既我今晚一定會做好我誘餌既工作，唔洗擔心咁多。去食早餐囉不如？」
二家姐：「好…呀…等陣先，有D野要比你，差D唔記得左。」
二家姐行左兩步又停低左，仲係衫袋度拎左條手繩出黎。
二家姐：「嗱比你既，今晚無論點都要戴住佢。」
我：「哦哦…你自己整架？
好靚呀條手繩。 」我接過條手繩，開始仔細咁研究，條手繩造功的確幾靚。
二家姐：「痴線！邊個會咁得閒專登織比你！買咋嘛！
」唔係咪就咁話唔係咪得囉…唔洗發咁大脾氣架…？唔通二家姐黎M所以咁燥？
點都好喇，我都心懷感激咁收左呢條手繩，仲即刻戴住佢。
之後我就落左飯廳食早餐，我落到去既時候二家姐已經坐低左，仲用個嬲爆爆既樣大啖大啖咁食緊。
唔，睇黎真係黎M，都係唔好惹佢好D。
我小心翼翼咁開始食我既早餐，務求唔好刺激到二家姐。
過左一陣，大家姐就帶住Sarah佢地一齊落黎，每個個樣都好攰咁，尤其係大家姐。
老母問佢地搞乜咁攰，大家姐好老實咁答話玩通宵，惹得大家都笑出聲。
無錯，就算好幾個鐘後就要黎場「最終決戰」，大家既氣氛都仲係好輕鬆，就好似平時咁。
話時話，呢排都唔見Uncle既？佢唔會驚到匿埋左要佢個女幫佢搞掂哂所有野，保住佢盤生意呀？
死喇我對佢既好感好似已經無哂添。
到底今晚會係點架呢…
Sarah：「阿明？
」Sarah既呼喊將我從沉思中暫時拉左出黎，我轉身望住佢，發現佢一個人企係度，頭髮被微風吹起，增添左一份仙氣。
我好自然就伸出手捉住佢隻手，同佢一齊係露台睇呢片大好風景。
大家有成五分鐘一句野都無講，只係望住D風景，直至我嘆左一口氣。
我：「好，去準備喇。
」但正當我想走既時候，Sarah突然用力捉住我。我：「Sarah？
」Sarah：「跟我黎吖。
」佢都無等我反應就拉左我走，但令我意外既係佢唔係帶我去D咩地方，例如書房飯廳等等，佢只係帶我行到我房塊全身鏡前。
我：「做乜帶我黎照鏡呀？我知道自己好靚仔，但你都唔洗帶我黎照鏡架？
」Sarah：「唔係吖，你望下先喇。」
望？有乜好睇呀咪又係我個樣。
但係既然Sarah咁堅持，就即管睇下囉。
我照Sarah既吩咐，望住塊全身鏡，見到入面既自己同Sarah，佢仲不停扮鬼臉，搞到我忍唔住笑左出黎。
我：「喂你到底想做乜呀又叫我望住塊鏡但又係咁引我笑。
」Sarah：「笑就岩啦，記住而家呢個樣啦。
」記住而家呢個樣..？
Sarah：「應承我，就算今晚發生咩事都好，千萬都唔好唔記得呢個笑容呀。」
「我唔似Ellen同Anna咁叻，又唔好似Ellie咁聰明，更唔似得Yui咁識照顧人，我就只係識講呢D無用既說話…」
「我都好想為你做返d野，但係我發現自己其實咩都做唔到，只可以睇住你地去努力…」
喂做乜你自己講講下會喊架…唔係要氹我笑架咩你，真係傻…
我摸摸佢個頭，試圖安慰佢，但都係無用，佢仍然喊緊，所以我決定採取進一步行動。
我決定採取進一步行動，我決定錫佢。
好似好耐都無錫喇。
我唔知錫左幾耐，感覺過左好耐好耐先退開。
佢呆左望住我，好似load唔到發生咩事咁。我唯有再摸摸佢個頭。
我：「講左幾多次你邊係無用呢，正正係因為有你我先可以行到呢步啊。
」「我會記住你講既野架喇，今晚我都會用呢個笑容去應付一切。」
「過左今次既事之後，我地去玩喇，好似上幾次咁玩盡佢。
」Sarah：「嗯！加油呀你！我而家就去換衫！
」佢講完就好開心咁跑走左，真係易氹。
不過，我而家個心好䁔，好似被暖包包圍住咁。
一定要嬴！
之後我地全家人換好衫，浩浩蕩蕩咁出發去會場。
去到會場，二家姐秘密咁帶左Kathy去保安室，等佢可以一覧無遺咁睇哂成個會場，更方便佢認人。
至於我地呢，就去左會場坐低，呢個時候仍然係咩人都無，只有一D酒店既人係度做最後既佈置。
我企係會場中間，望住台上既banner。
「煒明慈善基金」
雖然只係用黎引條友上釣，但如果有朝一日可以有自己既慈善基金都好。
我會用黎幫好多有需要既人，例如D好似我以前咁，屋企有困難既學生。
咁快就諗未來既野，我係咪有D唔正常啫哈哈。
去個廁所洗個臉先喇都係。
凍水刺激皮膚個種感覺其實真係好正，好似刺激緊自己既神經咁。
我望住塊鏡，又諗起Sarah頭先講既野，即刻忍唔住笑。
保持笑容呀…？應該唔難做到架啫。
咦咪住先…點解…
鏡入面有兩個我…？
「你好嗎？
」