「無啦啦多左幾個家姐同細妹 Season 2」: 抉擇
Anna：「講呀傻仔明！呢張相係咩一回事！！
」Ellen：「你今日唔解釋清楚唔洗旨意行出呢個門口！！
」佢兩個因乜事咁激動？咪就係因為一張學校旅行既相囉，唔知邊條仆街係我安慰Cody個陣偷拍我地，仲要唔知點解Ellen拎到張相喎。
我：「喂唔係你地諗既咁…我只係…eh…救我呀Yui Ellie~
」我諗起我應承過Cody，唔會將件事講出去，所以我諗左兩諗，決定向Yui同Ellie求助。
Yui好想幫我但奈何佢比Sarah鉗制住，至於Ellie呢，佢就坐係一邊靜靜咁睇書，不問世事咁。
Anna：「想搵人幫手！？即係身有屎啦！
」我：「呀！！」
Anna一下飛膝撞撞埋黎我度，搞到我成個人仆左係度。
佢地見到我失勢當然唔會放過我啦，加埋Sarah三個一齊折磨我。
俾我知道係邊個仆街裝我，我一定唔會放過佢…唉呀師父好撚痛呀！！
咦大家姐？岩啦快D救我吖！
大家姐：「哈哈，你地幾個係度做咩吖？
」見到大家姐行左入黎，佢地幾個都即刻停左手，望住大家姐。
聽到大家姐咁問，我地幾個都你眼望我眼咁，無人答佢。
大家姐平時唔會咁細聲細氣講野架喎，佢平時都係大大聲，成個傻大姐咁架嘛。
Sarah：「大家姐…你係咪唔舒服？
」Yui：「Yui去幫你叫醫生黎…
」大家姐：「啊，乖喇Yui，但大家姐無事吖，唔洗叫醫生。」
大家姐攔住左想出去既Yui，之後仲踎低望住我，真係令人覺得好奇怪，完全唔似平時既大家姐。
雖然佢仲有笑容，但同平時唔同，唔係開懷大笑，只係微笑，好似變左另一個人咁。
大家姐：「阿明吖，可唔可以陪我去接羽晨？
」接羽晨？平時唔係都係蘭姨去接架咩？點解要大家姐親自去接？
我呆左一呆，之後再望下Sarah佢地，佢地個個都係咁點頭，仲要全部都鄒哂眉咁。
我明喇，咁我去囉。
Sarah：「阿明你要睇住大家姐啊，而家二家姐已經成日唔見人，如果大家姐出左咩事既話…」
Yui：「洗唔洗Yui去試下敲二家姐房門，睇下佢有無野幫到大家姐手？」
我：「唔駛啦，唔好打擾到二家姐啦，我陪住大家姐就可以啦，如果係有咩事我即刻搵你地，你地即刻聯絡Uncle，咁好無？」
我一邊著起件外套，一邊同佢地兩個講。
我：「Anna佢地呢？走左嗱？」
Yui：「嗯，佢地話去Anna度溫書…」
我：「啊係喎就快到考試，咁你地一陣都去溫書啦，唔洗擔心咁多。我出去喇。」
我講完呢句之後就離開左佢地，去到大門度搵大家姐。
佢合埋眼，靜靜咁企左係度等我。
我甚至唔敢去打擾大家姐，但佢好快就注意到我，微笑住咁望住我。
大家姐：「我地行啦阿明。」
之後我地兩個就離開左屋企，去九龍塘接羽晨。
大家姐無叫車黎載我地，只係慢慢行去地鐵站，途中咩都無講，我亦只好乖乖咁跟住佢行。
大家姐咩都唔講我好似都係第一次見，都真係幾唔慣。
唔通大家姐失戀？應該唔會吖，自從個肥仔之後我都好似無聽佢話拍拖架，應該唔會有戀失先係。
會令大家姐唔開心既事仲可以有咩呢？唔通係二家姐？佢擔心緊二家姐？而家成屋得佢一個知道二家姐既情況，咁佢會擔心可能出左事既二家姐都唔出奇。
都差唔多個幾月啦，我仲係未見到二家姐，明明大家住埋同一間屋，你都咪話唔神奇。
話咁快，我地就已經到左地鐵站，上埋地鐵。
咁兩條友坐地鐵好自然就係平排咁坐埋一齊架啦，點知大家姐係我一坐低係佢旁邊，佢就挨左落我膊頭度，搞到我地成對情侶咁。
仆街啦，大家姐好香呀，巨龍哥好似想起身添…
大家姐：「我諗我開始明白當初阿明你決定要做七星個陣係咩心情喇…」
七星！？
一聽到大家姐提起七星，我就即刻緊張起黎，成個人彈起左一下。可以的話，我唔想我身邊既任何一個人同七星既所有野扯上關係啊，雖然七星既人其實都唔係咩壞人…
我：「大家姐你要去做七星？點解呀？」
大家姐：「嗯？哦~我打個比喻啫，我唔係要去做七星，我咁蠢又點做到七星呢，容乜易蝕哂李Uncle D錢架哈哈。」
我：「咁大家姐你其實係想講d乜…？我個陣去做七星係因為…唔通屋企又有事！？
」我個陣應承李生去做七星係因為Uncle急需要一筆錢，所以我就同李生講數，嘗試將自己賣個好價錢，最後當然成功啦。
但大家姐話明白我個陣係咩心情，唔通佢又係想賣自己？
大家姐：「你真係聰明呀阿明，不愧係我既好細佬。
」大家姐笑住咁講，仲摸摸我個頭，但我居然睇到好心痛。
佢笑，我居然想喊。
佢到底想做d乜？屋企又出左乜事？又係因為錢？點解成日都會出現呢D情況架，Uncle到底識唔識做生意架！成日都要d仔女為佢D生意擔心既！
「大家姐我呢，可能要結婚喇。
」結婚…？我有無聽錯呀…？大家姐話佢要結婚…？
我以為自己發緊夢，所以我即刻摑左自己一巴，想睇下係咪痛既。
結果係痛既。
無可能既，一定係我自己製造痛既感覺出黎呃自己架啫。
我再摑多自己幾巴，但結果都係一樣，痛，仲要痛到不得了，手同塊臉都係。
大家姐見到我咁樣即刻好緊張咁捉住我雙手，問我做乜野。
唔知係咪因為我太大力摑自己，我聽野居然有D糢糊，睇野都有小小。
我：「大家姐…你話要結婚啊？」
個腦一片空白，咩都組織唔到。
「結婚」呢兩個字好似不斷充氣既氣球咁佔據我既腦袋，逼走哂其他野。
氣球都有佢既極限，充氣到一個位，佢就會爆。
當大家姐一攬住我，我腦入面既氣球就爆左，當下好似聽到「呯！」一聲咁。
一般氣球爆左之後都會有d碎片殘肢，我呢個都唔例外。
但我既碎片殘肢，係眼淚。
大家姐既擁抱，令我係地鐵車廂入面喊左出黎。
大家姐：「我都唔想架阿明…但我真係得呢個辦法，除左咁我都唔知自己有乜可以為屋企做…
」聽到咁，我個心更加痛，好似裂開左咁。
我開始討厭上帝。點解祢成日要比呢d事發生係我同我身邊既人度？仲要一單接一單，好似星期一至五既連續劇咁！
我只係想平平淡淡咁同佢地過日子咋！！唔得，我唔可以比大家姐咁樣結婚！！唔可以要佢因為屋企而去同一個佢唔鐘意既人結婚！！
結婚係人生大事，一生人應該只係結一次，所以一定要同自己鐘意既人結！
結婚唔應該當成一場交易！
我：「大家姐，你可唔可以將成件事講一次比我聽，我想了解下到底發生乜事。」
我一下就推開左大家姐，嚇到佢呆左一呆。
原來佢對眼都紅哂，楚楚可憐既美人，理應令人憐憫，但我呢一刻心入面居然無呢D念頭。
我只係想搞清楚左成件事。
大家姐：「咁…我都唔知應該話你知好，阿May叫我點都唔好同你講呢件事…」
二家姐！？
突然聽到二家姐令我有D愕然，可能因為太耐無聽到大家姐提起佢。
咁即係話二家姐都知道大家姐要結婚？佢知道都唔做任何野，由大家姐同一個唔鐘意既人結婚？
我：「二家姐知道件事？」
大家姐：「係啊…佢仲話今次一定唔可以再要你地捲入呢件事，唉呀我真係無用…守個祕密都做唔到。」
我：「唔好咁話自己喇大家姐…你其實已經做得好好架喇…我地呢排都過得好開心，咁二家姐有無諗到咩辦法？」
大家姐：「無…今次對方真係存心狙擊我地公司，以我地屋企手頭上有既資金，真係無辦法可以對抗到…」
我：「咁Uncle點解唔問李生借？上次都係…」
大家姐：「上次就係因為你，李Uncle先肯幫我地，所以今次就到我…」
我：「你唔通係要同李生結婚吓話！？」
嘩屌，諗起都恐怖。
大家姐：「傻豬，梗係唔係啦，我係要同一間叫Faclon既公司既主席Roger結婚，事成後佢會俾夠五億Daddy。」
五億咁多…？咪住先，點解條友會知道？
我：「咁點解呢個Roger會知道我地屋企既事，仲肯咁好用五億做禮金？」
大家姐：「呢層我都唔知…係有一日有個中間人約我同Daddy出黎同佢見面，佢就提出左呢個交易。」
「我地都無問佢點解會知道，但呢個可以話係我地而家唯一一條生路…所以我…」
我：「二家姐呢？佢知道左呢件事之後有無話咩？」
大家姐：「佢同你一樣，聽到都好大反應，超級反對我結婚，仲話佢一定可以諗到辦法解決問題。」
「佢甚至話不如由佢代替我去嫁比個Roger，話反正Daddy都唔鐘意見到佢，佢嫁出去仲好。」
二家姐…
大家姐：「但我自己好清楚，第時公司好需要阿May，反而我呢個一無是處，只係識洗錢既人嫁出去都無乜所謂。」
「自己既幸福，同屋企既幸福，應該要揀邊樣，我自己好清楚。」
「況且，人地指明話要娶我，可能我都會有幸福呢哈哈。」
佢明明笑緊，但點解會滿臉眼淚…