「無啦啦多左幾個家姐同細妹 Season 2」: 愛情 (Part 1)
買完一堆野之後，成個人都散哂咁濟。
三個女仔一袋野都無拎過，全部都係我地拎哂，阿希佢地仲要買勁多料，直頭好似想預防飢荒咁。
萬幸既係我唔洗將呢D野帶返屋企，全部都放左係最近學校既黑仔屋企。
不過聽日就要早少少去佢度拎返喇，無所謂啦畢竟麻煩到人地。
一返到屋企就聽到Sarah佢地係度嘻嘻哈哈，咩事咁開心呢唔知？
我拖住疲憊不堪既身軀，慢慢走去客廳睇下佢地係度做緊乜。
原來Sarah，Yui，大家姐，羽晨同老母五個人一齊坐哂係度傾計。
傾計可以傾到咁開心既。
我：「你地傾乜傾到咁開心呀，門口已經聽到你地d笑聲…」
老母：「咦衰仔，捨得返黎嗱？嘩你搞乜呀擔泥黎呀個樣咁攰既！？」
我：「差唔多喇我諗…」
我邊講邊行埋去梳化，之後仲一下撻左上去訓，唔係因為d燈光阻住，我諗我就可以即刻訓著。
Sarah：「點解阿明你會咁攰既？」
我：「哦…因為我d朋友買得太多野，搞到我拎到死下死下囉。係喎你地到底傾緊乜啫。」
羽晨：「Sarah姐姐同Yui姐姐係度講緊今日去街市既得意野吖~」
得意野？
Yui：「今日我見到好多從來未見過既活生生既海鮮，佢地好多都仲係個缸度游緊水，唔係冰鎮緊架。」
Sarah：「仲有呀仲有呀，我仲見到d豆腐好整齊咁一舊舊放係個砧板上面，好得意！」
啊..上次帶佢地去街市好似無比佢地見到呢d野，唔怪得佢地會咁新奇興奮喇。
唔緊要喇，有時等佢地自己發掘下呢d野都好既。
我望望大家姐同老母佢地，佢地都向我微微笑，好似都係諗緊同我一樣既野咁。
岩呀，體驗平凡對佢地黎講絕對係一件好事。
去到第二日，我一大朝早就醒左，幾乎係全屋第一個。因為今日係學校旅行，我地可以著便服，所以我就隨便換左件連帽白色衛衣加件牛仔褲就落樓。
一落到樓就見到蘭姨佢係度準備緊早餐，而家先差唔多六點，真係辛苦哂。
蘭姨：「咦少爺你咁早既？要出去嗱？」
唉呀，被發現了。
我：「係呀蘭姨，今日約左朋友要早D出去。」
蘭姨：「咁我去叫阿華為你準備車啦你等等。
」我：「哦唔洗啦，車留返俾Sarah佢地用啦，我自己出去就可以。
」就係咁，我一個人離開左屋企，的士都無截，慢慢咁行去最近既地鐵站。
開頭我都有諗過踩車返去，但聽講最近好多偷單車案，都係唔好喇。
行行下經過Anna屋企，唔知佢訓醒未呢？應該未啦而家仲咁早。
係喎，今次應該係識Anna以來第一次唔係同佢一齊去學校旅行，終於可以擺脫佢既魔掌，唔洗再係咁燒野比佢食啦。
不過我諗佢都會使其他人幫佢架喇。
其他人都係一樣啦，個個都一定大把狗公爭住照顧。
望就望佢地每個今日都玩得開心喇，不過都係唔好開心到唔記得我。
用左差唔多一個鐘，我終於返到學校附近既M記。
去到M記，阿希，浩賢同諾賢已經係度食緊扭扭粉，旁邊仲有一份未食過既。
阿希：「喂阿明，呢邊呀買埋你個份架喇。
」嘩原來係買比我架？真係夠朋友。
我：「早晨呀各位，喂幫我買埋真係唔該哂。
」我一邊坐低一邊同佢地打招呼，嘩阿希今日著到咁行，真係完全為左溝女咁款wor。
阿希：「小事喇，唔知你鐘意食乜，隨便買左一個比你。」
我：「無所謂喇。」
人地幫自己買埋喎，仲要求D乜。
之後我地四個就專注係自己份早餐度，直至食完之前都好少野講。
吖不過講開又奇怪喎，食完都仲未見黑仔既？
我：「喂黑仔呢，食完都未見人既。
」浩賢：「佢唔會黎喇，係屋企等我地。」
呀係喎，一陣要上佢屋企，咁佢又做乜要落黎呢？我真係on9既。
阿希：「條仆街而家應該起勢咁gel頭裝身喇。
」諾賢：「點解要咁比心機？佢真係鐘意Cody咩？我以為佢玩玩下咋。」
阿希：「呢個就真係唔知lu，佢D死人語氣態度連我都唔識分佢係真心定假膠。」
浩賢：「係追到就一早得左喇，失敗左咁多次唔會因為一個學校旅行就成功掛？」
我：「師兄所言極是，你兩個聽唔聽到呀。」
諾賢：「嗱講明先呀我真係無打算追Fanny架，係阿希你條契弟屈我咋。」
阿希：「喂咪比兩個現充影響到啦，機會係自己製造既，俾D信心自己！」
浩賢：「你係掂既而家就唔會仲係單身喇傻仔…」
阿希：「吖~~~可怒也你個契弟咁鬼串既，暑假一完就話自己有女，都唔知你點得米既。」
浩賢：「多事，喂差唔多喇，上去喇。」
阿希：「屌，搵日一定要問清楚你來龍去脈先得。
」諾賢：「你係想偷師咋？
」阿希：「收聲呀你同我一樣都係單身狗咋！
」嘩，講到呢個話題我就不便插嘴lu。
之後我睇住阿希同諾賢兩個吵吵鬧鬧咁行，直至係黑仔屋企門口佢地先收口。
㩒鐘唔夠五秒門就已經開左，開門既人就係黑仔，佢容光煥發，仲好似白左小小咁。
黑仔：「喂早晨，D女呢。」
阿希：「好心你幾廿歲人就唔好咁多幻想啦，尋日都係我地五個拎野架啦，今日佢地又點會出現係你屋企門口呀。
」黑仔：「問下啫，犯法呀？入黎啦。
」我地五個就好似尋日咁搬返所有買既野返學校，同𨋢既人都用一種好奇怪既眼神望住我地。
唔知係自己已經習慣左個重量定換左拎其他野，今日拎居然無尋日咁重喎哈哈。
返到學校，個三個女仔已經係度，仲同其他女仔傾緊計。
嘩屌呀…？
Cody同我撞衫！？
喂屌…咁都有得撞？阿希：「嘩係，阿明你同Cody情侶裝喎。
」收聲啦阿希…
Cody佢地三個都開始注意到我地幾個，慢慢行緊埋黎。
Cody亦注意到我既衫，鄒哂眉咁。
Bella：「嘩你地兩個情侶裝喎。
」屌…我真係好想搵個窿捐…
Cody：「有品味喎你，識咁著。
」我：「哈哈…多謝喎，其實你係咪兜個圈讚緊自己？
」Cody：「聰明，搬D野去個邊先喇，我地班條隊係個邊。」
救命，未試過咁尷尬。
心入面種尷尬始終揮之不去，所以我同阿希佢地一搬好D野就求其搵個理由行開左。
嘩真係第一次見大家都著便服，原來學校都好多靚仔靚女，平時著校服真係睇唔出。
個邊咁多人既做咩呀？吓？排隊影相？痴線架？
無錯，真係有一班女仔排緊隊同唔知邊個影相。
邊班請左明星黎咁勁？唔通係Ellen？
Anna：「晨哥黎架傻仔明。」
Anna？
我望去把聲傳黎既方向，見到一個著黑色衫既靚女。
我：「喂今日好靚喎Anna哥。
」Anna：「你試下再咁叫我，我肯定一拳打死你，不過我唔明呢度D人點解都會識咁叫我既？係咪你係PE堂唱我？
」Anna作狀想打我，我即刻縮一縮，大佬，真係怕架。
我：「真係無呀，不過你頭先話咩話？晨哥同人影緊相？」
Anna：「人地靚仔吖嘛，邊似你，毒撚一個。」
我：「喂Sorry囉你揀左個毒撚做男朋友。」
Anna：「笑，喂我d組員到喇，我要去搵佢地，今晚再Whatsapp啦。
」我：「嗯，玩得開心D啦。
」原本我都想去搵晨哥傾下計，但咁岩學校就打鐘，我唯有乖乖返去班個條隊。
唔緊要喇，反正大家去同一個地方，一陣再傾都得。
之後大家就浩浩蕩蕩咁出發，車程途中成班同班主任一齊唱歌，幾鬼歡樂。
開心令到時間過得特別快，話咁快就到左郊野公園。
遠離城市，空氣都清新D，抖啖氣都特別舒服。
但換個講法就係，荒山野嶺，想搵個人睇下都無。
呢個燒烤場除左我地兩班人以外就再無其他人，咁又係既，咁Q偏僻邊會有人黎，都唔知係邊條契弟揀呢度既。
個燒烤場比我地霸哂，而家想點玩就點玩。
大家一揀好位之後就開始set野，燒野食既就透爐，打邊爐既set架餐。
「嘩你好勁呀咁快就透起個爐！
」「可唔可以幫埋我地透爐吖唔該你？
」無錯，以上兩句野都係班女對d好快就透起個爐既男仔講既，嗲聲嗲氣咁，係差左未請食波餅。
阿希：「我開始明白點解尋日黑仔話要燒野食。
」我：「嗯，我都明白喇，但佢係想威比邊個睇？真係Cody？
」阿希：「我點知，唔好同我爭野玩就得，喂水滾啦落野喇，牛肉！
」到底黑仔係點諗架…
其他組組組既氣氛都好好，大家都係有講有笑，但唔知點解唯獨我地一組氣氛慘淡，得個食字。
唔知我仲以為自己去左野外搭檯食任食火鍋。
呢種氣氛真係令人好唔舒服，我好想打破呢個膠著既局面，但今日我又同Cody撞衫，令我唔知點解有d怯。
所以我係咁向阿希打眼色，叫佢諗下辦法。
吖條仆街明明收到我d signal，但居然扮唔到，就只係一味掛住食！
黑仔而家又奇奇怪怪，木口木面咩都唔講，好似比人殺左全家咁。
喂阿哥，搵人黎救下我吖…
晨：「啊呢~~呢邊搞乜呀？玩食不言寢不語呀咁靜既？」
你真係十次有九次都係正最佳時候黎到呀晨哥…
晨哥明明係其他班既人，但佢居然走埋黎我地呢邊，仲坐埋落黎，搞到大家都望住佢。
晨：「哇我就咁坐左落黎你地都無反應，得個望字既？」
「咁我就唔客氣喇~」
晨哥當住我地八個人面前，用手拎走左一舊蟶子，仲係我地面前開始食。
唔知佢係專登定真係意外，佢居然辣到自己條脷，場面相當搞笑，連Fanny呢種cool魔都笑左出黎。
晨：「笑下咪好囉，學校旅行就係要開開心心熱熱鬧鬧架啦，好喇就等我藍洛晨露兩手啦！」
佢講完之後就跑左去一個有網既燒烤爐，仲叫走曬D人，自己一個係度燒。
好快，佢就捧住一碟燒好左既肉返黎，賣相仲相當吸引，睇到我流哂口水。
晨：「好嗱，慢慢食，我一陣返黎拎食評。」
佢又隨風而走了。
大家望住碟肉，都不斷流口水，因為真係太吸引。
Cody：「咁…不如我地開始食？」
竟然係由Cody開口提議！？我真係無諗過。
多得晨哥同佢既廚藝，我地呢組終於打破呢個困局，開始有講有笑，黑仔同同Cody又開始返互串。
旅行果然係要係咁先開心架嘛。
晨：「咳咳，唔該大家注意一下…」
大哥，你又想點？我地岩岩先開始叫做打開左話題，大家開始玩得開心，你又想做乜？咪做D會破壞既野好喎，信唔信我打你吖喇？
講就係咁講啫，我又邊夠佢打吖，更何況佢身邊仲要有護法，我根本無可能打到佢。
所以都係講下笑啫，但係佢到底想做乜呢，仲拎哂大聲公咁。
話時話，佢去學校旅行帶大聲公…？
晨：「大家！食得開唔開心？
」「開心！！
」嘩咁多人應佢既，連我地班既都嗌埋一份。
晨：「咁玩得開唔開心？
」阿希：「開心！
」阿希搶係大家之前大聲叫左出黎，但大家並未好似上次咁既反應，全場都係得阿希同幾個人叫。
晨：「都未開始玩，你開乜心？你幾個傻架哈哈。
」此話一出，阿希同頭先個幾個一齊答開心既人即刻成為大家既笑柄。
晨：「好喇好喇唔好再笑呢幾位朋友仔喇，既然大家食得咁開心，咁就應該好事成雙，玩都應該要玩得開心大家話係咪先！
」「所以！！我係度邀請大家一齊同我玩一個遊戲！就係閃避球啦哈哈！
」唔知咩事，晨哥佢個班既人一聽到話玩既項目係閃避球之後就噓聲四起。
晨：「嘛~唔好咁既反應啦我既朋友，難得機會喎，梗係玩閃避球啦係咪先？
贏左個邊有獎架，我會親自燒唒呢幾pack松阪牛比贏左個邊食！大家話好唔好！
」一聽贏左會有獎品，大家都即時興奮起黎，尤其係個D見過同食過晨哥燒肉既人。
Sorry，等我抹一抹口水先。