「無啦啦多左幾個家姐同細妹 Season 2」: 約會

我拉住佢，不停跑不停跑，直接帶左佢離開學校。

途中佢有嗌過我，問我到底想帶佢去邊，但我都無答佢，只係一味跑。

直至去到學校附近既商場，我先停低。

Sarah：「你做..乜呀..阿明，帶住我係咁跑… 」

佢上氣唔接下氣咁講，睇黎我太chur佢喇。 





我：「你記唔記得我之前應承過你會搵次放學帶你去食野？ 」

Sarah：「有咩？我都唔係好記得喇哈哈。 」

搞錯呀，我咁自責自己唔記得左件事，原來佢自己都已經無左件事！ 

我：「算喇，唔記得都唔緊要，咁就當我地而家兩個去拍拖喇。」

Sarah：「咁如果係拍拖，不如我地等埋Yui佢地喇，我諗五點左右佢地就得架喇。」





唉點解佢突然間變到咁鈍架…

我：「唔係吖，你明唔明呀到底…」

Sarah：「明咩啊？阿明你好似自從聽完lulu個件事之後就怪怪地咁既？ 」

我：「你咁都唔明？而家我就只係想同你一個去拍拖咋！ 」

我扮嬲咁鬆開佢隻手，自己一個行左去。





只係行左一陣，我就已經聽到跑步聲。

我一擰轉身，就已經見到佢跑緊埋黎，仲一下撲埋黎。

我feel到有水滴到落我塊臉，加上佢個身係度震緊，我好快就意識到勢色唔對。

佢居然係度喊緊？ 

我：「喂你做乜啊…無啦啦喊都有既…」

Sarah：「對唔住呀阿明，點解我會咁蠢架咁都唔知道你想點.. 」

聽到佢呢個所謂「原因」，我即刻嚇到推一推開佢。

我：「你就係因為呢樣野喊！？」





Sarah：「係啊…因為我真係好蠢吖嘛…咁都唔明男朋友既心思…仲激嬲左你…」

我：「唉呀傻既，我無真係嬲架，玩下你咋，唉呀俾你嚇死我啦！」

我忍唔住再抱返佢，仲不停掃佢背，

Sarah：「我真係好無用架，比起Ellen佢地，我簡直就係垃圾咁…次次阿明你需要幫手我都做唔到D乜…」

佢愈自責，我愈心痛。

佢點會係無用呢，如果佢無用，我就連無用都算唔上。

我：「你點會無用啊…係你造就而家既我架，而家我地咁多個之所以過得咁開心，都係因為你咋。」





Sarah：「因為…我？」

我：「因為我真係好鐘意你，所以先會有勇氣挑戰阿偉，係佢手上搶你返黎，再開啟之後既一切一切。因為你，我先會有Yui佢地，之後做七星做學生會。」

「所以你話喇，你係咪好有用先？」

其實我而家都唔知自己講緊乜，我組織唔到，我只係將我心入面既野全部講哂出黎。

如果唔係因為Sarah，或者我而家仲係聖所羅王，而聖所羅王仲會係以前咁，玩階級制度。

佢，改變左我一生。

Sarah：「係咪真架..？」

佢聽左我9up一大輪之後終於都唔再喊，陰公，因為我玩玩下搞到佢喊到眼仔都紅哂，好內疚。 





我：「係吖，所以唔好再話自己無用啦好唔好？因為如果你係無用即係我比無用更無用。」

Sarah：「好喇咁…」

我：「咁我地而家真係去拍拖喇好無？」

Sarah：「好！ 」

響亮既聲音，咁先係架嘛。

之後我帶住走去街市，去我平時同阿希佢地買芝士麵個間小食店度。

我：「你想食乜呢我既好有用既女朋友~」





Sarah：「你買乜俾我我都食。 」

真係好難想象十分鐘前呢個女仔仲係喊到九彩。

我：「咁呀，阿姐，俾兩個冷麵我！」

冷麵我諗佢未食過喇掛。 

但出乎我意料，佢並無好驚訝既反應，只係係我身邊好開心咁食個冷麵。

我：「你…之前食過？」

Sarah：「嗯！之前同同班既女仔出街個陣已經食過一次！ 」

我：「唉呀，仲諗住帶你試新野添… 」

Sarah：「唔緊要啦~咁今次係我第一次同你食嘛，同埋我又未試過呢間既冷麵，算係新野既~ 」

可惡，居然俾佢氹返轉頭都有。

之後我就同佢兩個人穿梭商場同街市，享受屬於我地獨處既美好時光。

佢笑得好似比平時都更開心，撒嬌既次數都更多。

我諗得閒都要咁做下先得，唔只對Sarah一個，對Anna佢地都要。

到我地開始返學校既時候，我先發覺我地已經拎住一袋二袋既零食。

一時忘形就咁添…當買埋比Anna佢地喇。

點知，一入學校門口我就比Ellen佢捉住左。

Ellen：「搞錯吖，我地四個做野做得咁辛苦，你地兩個居然偷偷地走左去拍拖！？ 」

我：「無呀其實我係同…咦人呢！？」

當我試圖化解佢既怒氣既時候，Sarah居然一支箭跑走左。

吖真有你的。