雖然我知道如果爆發喪屍的話，我會好快變成喪屍，但我估唔到會係咁快: 【 雖然我知道如果爆發喪屍的話，我會好快變成喪屍，但我估唔到會係咁快 】 【 上 】
之前我睇過好多電影，得到好多體會。睇完「移動迷宮」，我就明白跑得慢係會死架！睇完「屍殺列車」，我明白如果冇孔劉咁既老豆，係會變喪屍架！睇完「我是傳奇」，我明白唔識點整血清，只可以等死。於是我得出一個結論，就係如果爆發喪屍的話，咁廢既我會好快變成喪屍。但當呢件事就係來臨既時候，我估唔到係快成咁。我見證喪屍爆發既時候我係九龍塘地鐵站，個時係朝早9點，大家都應該知道繁忙時間既九龍塘地鐵站係幾咁多人，大家逼逼逼，逼幾班車先上到車。個日我如常係最繁忙既時候係九龍塘到等車，當時我企係車頭位置排第一位，突然聽到遠處傳黎恐慌既叫喊聲，但係呢到咁多人，寸步難行，我根本就睇唔到個邊發生緊啲咩事。隨著恐慌既聲音越近，我竟然見到啲人好似海浪咁擁過黎，伴隨住一啲尖叫聲，我亦見到有一啲鮮紅既液體噴射係空中，噴係月台上既玻璃門上。
~列車即將到達，請勿靠近車門~
下一班列車亦同時抵達，而我都未攪清楚發生咩事，我就被人潮推跌，由於我企係幕門前既第一排，我好唔好彩咁跌左入月台同列車之間既空隙入面。我抬頭透過空隙向上望，先見到好多喪屍到撕咬人類，每個被咬左既人類都係目測3秒之內變成喪屍，然後再去咬其他人。我見到大批喪屍衝左入車箱，我係下面感覺到整個車箱震動得好勢利，10秒鐘之後就回復返平靜，我就意識到係呢架列車埋站既短短幾十秒內，整個九龍塘站既人都變左做喪屍。的確，係呢個時間，呢個地點，大家都無處可逃。我亦明白岩岩如果唔係我一早跌左入空隙入面，我晨早就變左喪屍。
~車門正在關上，請勿靠近車門 ~
車門正在不停嘗試關埋，但由於啲喪屍不停無意識咁出出入入車箱，所以車門遲遲都關唔埋。甚至仲將一個喪屍夾跌左落我身處既空隙之間，佢見到我之後向我爬過黎，我即刻向相反方向車尾爬，點知係我兩卡之前又有一個喪屍跌左落空隙到，佢又向我爬過黎。我望望後面隻喪屍，又望望前隻喪屍，我爬到佢地中間，盡量令佢地平均地距離我一樣遠，再只能無力咁望住佢地慢慢逼近，可能由於空間狹窄加上佢地肢體不太協調既關係，佢地過黎得比較慢，但我都無處可逃。
嘟...嘟...嘟...列車即將開出，請勿靠近車門
車門終於順利關埋，我下意識即刻伏低啲向月台個邊靠，列車就係前面個隻喪屍即將掂到我既時候慢慢開出，拖住唔識比反應既喪屍，喪屍亦隨住列車既加速而肢解，就係我面前，噴到我一面血。我鎮靜住自己唔好郁。如果唔係。我就會變到同佢一樣。列車終於駛走左，我先夠膽慢慢抬頭望向月台，好在月台有裝到幕門，如果唔係啲喪屍實走曬落黎，我就死梗啦。而家我個腦一片空白，完全唔知自己應該要點做去離開呢個地方。直到下一班列車駛至我都未諗到，我唔敢郁，就好似岩岩先咁定係到。但同樣地，又有喪屍由列車空隙到跌左黎，今次甚至更多，上面跌左好多隻喪屍落黎，我已經等唔切列車開出，佢地就掂到我，我唯有嘗試爬車底過對面，我都未爬到過去，我就已經聽到車門順利關上既聲，列車開始慢慢開出，我嚇到即刻雙手勾實車底可以捉實既位置，隨列車遠去。我係個體能好差好差既人，掌上壓五下都做唔到，列車岩岩開出十幾秒，我就feel 到自己開始頂唔住，個肚同隻腳都勁酸，好想放鬆落黎，其實係我根本冇力氣再堅持落去。我條腰越跌越落 。
呯 ! 我個身上個鈄咩袋因為掂到地而比列車行駛既衝力扯斷左，跌走左。我即刻嚇到用力撐返自己條腰上去。
「撐落去，撐落去，仲差少少咋！ 」我心入面係咁同自己講。日日搭地鐵返工，我都好清楚九龍塘站去石硤尾站只需要2分鐘左右，只需撐多陣就得架啦！
列車終於停定左，我即刻鬆手瞓左係路軌上面，我feel到自己成身都係到震，岩岩我根本就係到死撐，以我咁既弱雞體能可以撐停車已經係萬幸，我趁車仲未開即刻將自己碌過去遠離月台個邊既空隙，我直頭係連爬過去既力氣都冇。
當列車開左左之後，我即刻向前爬，爬到玻璃幕門見唔到我既地方，以免驚動月台上既喪屍。我好迷惘，完全唔知應該點做至好，唔知點樣先可以逃離呢個地方。我望一望月台上既喪屍，繁忙時候既地鐵站，密密麻麻，要由呢到逃離根本就冇可能。我再轉頭望一望漆黑一片既地鐵軌道，諗緊要唔要沿路行，石硤尾下一站係太子，太子再下一站旺角，先唔理呢啲站係呢個時間都唔小人，岩岩跌左手機既我又點樣係漆黑一片既情況下行到下一站，而又靈敏咁避開每一班車。而家既我覺得我自己根本唔係係到搵緊逃生既方法，而係搵緊一條點死既方法。因為無論簡邊條，都好似死路一條。正當我心入面掙扎不已既時候，下一班列車又到左啦！我即刻伏返低，但當列車停定之後，我聽到列車遲遲都冇開幕門，停左好耐，亦都冇開到車。於是行係車頭前面，想睇下望唔望到駕駛倉入面既情況。但因為玻璃位置太高，我睇唔到入面既情況，我諗唔通個駕駛員冇被感染，先自己決定停車定左係到？我行遠小小，跳起黎再望下入面，跳左幾次都係唔夠高，睇唔到。
「呯！呯！」
而呢個時候車頭傳黎撞玻璃既聲，我嚇到退後幾步，唔通入面個個係喪屍，佢見到我所以想撞出黎。聽到頻繁撞擊既聲音，我又退後左幾步。
呯！玻璃既碎片散满一地，我見到有著住地鐵制服既男人探頭出黎，我先見到入面個個係車長。
「上黎呀！」佢伸出手拉我上去，原來呢架車既車長冇事，佢話佢叫呀穎。
「多謝曬你呀！」上到去之後，我唔該佢。
你有冇手機呀？
我冇呀！岩岩過黎既時候跌左係路軌到。
佢聽到之係露出近乎絕望既表情，佢話自己都冇手機。而且多次透過列車既通訊設備聯絡車站控制室都冇任何回應。於是我就提議我地將車開到遠啲既地方，睇下邊到小啲喪屍，先計劃落車逃走。呢到係石硤尾，我地可以駛去太子、旺角、尖沙咀到睇下。
但係太子、旺角、尖沙咀？我心入面都清楚應該都係好多人，呢個都係單純建議，見步行步先。點知個天連比我地睇既機會都冇，列車駛到太子站既時侯，發現太子站有列車停左係到冇開到，我地根本無辦法繼續向前駛，於是我地改變方向駛返去九龍塘，點知又有車停左係到。於是我地駛返去石硤尾站，停係呢站，再坐左係到諗其他方法。但係又可以有咩方法呢？我地坐左兩個鐘，呀穎顯然有啲焦躁，佢又再嘗試利用車上啲通訊設備聯絡外面既人，點知都係一啲回應都冇。
「挑！我都話公司唔比員工帶電話返工係唔人道架啦！屋企有事又唔可以第一時間知，而家想求救咋，都X唔得呀！」呀穎躁躁地咁鬧。而我只係坐左係到唔出聲，心入面諗緊唔知我屋企人有冇事呢？我父母已經退左休，如果佢地今日冇身痕出去飲茶既話，喪屍爆發既時候佢地應該係屋企，唔知佢地係屋企又安唔安全呢？可惜我個電話又跌左，如果我父母冇事，佢地而家一定好擔心我啦！我而家真係好想返屋企呀！
我同呀穎又坐左陣。突然，車上既通訊設備發出左另一個人既聲音。
「有冇人呀？有冇人呀？我係觀塘線 往調景嶺方向既車長，有冇人知發生咩事呀？有冇人可以黎求下我呀！」
#有興趣可讚黑柴Facebook
https://www.facebook.com/%E9%BB%91%E6%9F%B4-879053098899020/