夾錢中左六合彩頭獎, 但keep飛果個唔見左...: (44)

我一落車，班友即刻衝出來攬住我。 

「點呀，有無聽我首極速呀？」發仔笑道。 

「你唱到走撚哂音呀，不過都真係多得你首歌唔少既。」我講完都忍唔住係咁笑。 

「除左首歌之外，你仲要多謝發仔一路睇比賽一路食花生，唔係呀Pat都唔會炒車。」大舊指住成地既花生殼道。 

「所以話花生mode係幾咁有用先得家。」發仔自豪道。 





「唔好講咁多，追左個八婆條數先。」紅棍道。 

「依家邊個追邊個數呀？」呀Pat係幾個大隻佬既攙扶之下，走左過來。 

「喂，我地簽哂合同，妳唔係想賴皮呀。」我理直氣壯道。 

「份合同明明寫住邊個架車先過終點就算贏，我個人雖然跌左落地，但係架車係同你一齊過終點，極其量都只可以算係平手者。」呀Pat強詞奪理道。 

「嘩屌，妳咁都得呀？！」泥頭道。 





「成個比賽過程都有錄影，我地有證有據，上到法庭你估個官會話邊個岩呀喇？」呀Pat坐定粒六道。 

「咁依家即係算點先？」我問道。 

呀Pat從一個跟班手上接過一把槍，道：「既然係平手，即係你地仲爭我一億，速速磅水，唔係我要你地全部死係呢度。」 

「你殺我地唔驚坐監呀。」大舊道。 

「呢度係澳門。」呀Pat淡淡道。

「下，妳答左家喇？！」發仔道。 

「快啲還錢！」呀Pat打開左手槍既保險制。 

「紅棍，佢地咁野蠻，你唯有碌住卡先家喇。」泥頭道。 

「屌，俾我老母知道既話實殺撚左我。」紅棍死死氣咁交出張黑金卡。 

呀Pat接過手，望左兩眼就嗌道：「屌！你玩鳩我呀？！」 

「又做咩呀？！」發仔唔耐煩道。 

「你地自已睇下！」呀Pat將張卡掟左落地。 

我地彎身一睇，只見黑金卡表面果層貼紙俾呀Pat撕開左，而內層竟然係.... 





「香港大學信用卡？！」 

「你俾老母耍鳩左咁耐都唔知？！」發仔指住紅棍道。 

「伯母真係好重心機。」泥頭嘆道。 

「仆你個街！就算碌爆張卡最多都係得果萬五蚊！我依家就要射死哂你班撚樣！」呀Pat攞起枝槍道。 

「咪住！」一直訓左係地度既孱仔此時搖搖欲墜咁企左起身。 

「你要既六合彩飛係呢度。」孱仔將一張紅色既飛交左俾呀Pat。 

「對下個日期同number。」呀Pat吩咐手下道。 





「大小姐，張飛係真既。」一名跟班道。 

呀Pat即時如獲至寶咁錫左張飛一啖，然後問：「頭先我明明剝哂你啲衫褲都搵唔到，點解依家又會有既？」 

孱仔神色尷尬道：「妳有所不知。尋晚我俾佢地班仆街困撚左入保險箱，我心諗佢地就算搵到救兵番來，都只會係想攞番張飛，絕對唔會係真心想救我。佢地咁想要張飛，我偏要收係個佢地搵唔到既地方....」 

「咁即係邊呀？」我問道。 

孱仔自豪道:「我把心一橫，就將張飛塞左入自已既屎眼入面....」 

呀Pat一聽，即時嘔撚到成地都係。