每個人，都試過鍾意一個讀VA既女仔: 第二章

「我就知你唔會唔記得﹗」Kitty與肥正雙雙步入班房，看得我心中傳來一陣陣的葡萄味道。
 
「有咩就快啲講啦，我晏啲仲有野做架﹗」事實上，我之後的時間表可說是空空如也，我只不過是不想顯得我好像無所事事般。
 
係呀，我係好重面子架啦，點呀？
 
「咁都要等齊人先得架，係咪呀？」肥正的話彷似不是說給我聽， 一直和Kitty眉來眼去。
 
「喂你地好啦喎，依家係咪一定要響我面前玩恩愛先﹗」
 




我看得有點無明火起，但此時肥正居然還給我火上加油﹕「咦？乜你響到既？呢到明明冇你既事架﹗」
 
說罷，見我正準備執拾離去時，他還是作出一個開玩笑的手勢示意我稍安無燥。
 
「如果你地分手，我第一個俾人情你地。」
 
我與肥正還有那個加拿大仔可說是識於微時，打從小學便有傾有講，直至中學友情仍舊永固。因此這些尖酸的話，早已聽慣不慣。
 
「唉，麥俊傑呀……呢個咪就係你冇女朋友既原因囉。」
 




你條死仔，仲夠膽串我？
 
「好啦，唔好嘈啦。麥俊傑你今年想響紅社到負責邊個位？」還是Kitty要出面擔當那和事婆的角色。
 
「乜都唔做呀，我今年想讀好啲書。」
 
這句話絕非因一時之氣然後道出，而是我發至內心。都到了高中，沒理由不好好的讀書接著DSE吧﹗
 
「又讀書……你咁樣邊會有女架？」肥正總愛在這方面挪揄我一番。
 




「係咪開學第一日就要同你開拖？」
 
「你終於嚟啦？埋嚟坐啦﹗」正當我與肥正準備開戰時，Kitty跟門外的人的話卻令我們分了神。我順住Kitty的話轉過頭瞄著那位學生。
 
「……」
 
對，我當時只是啞口無言的坐在椅子上。我更正，並不是「只是」，而是「只能」。
 
看到她，腦海竟然給我完全放空，無法思考任何東西。在我眼前的女生，儘管樣子並非清麗脫俗，但說是五官標緻也絕不過份。
 
而且，她骨子裡更是散發住一股氣質，冷酷之中又帶點性感。
 
一句講晒，我鍾意。
 
「Cynthia，今年希望你可以幫我地紅社啦啦隊嗰邊，同埋你係讀VA既，想你幫我地畫海報，仲有啦啦隊啲物資。」




 
讀VA？
 
「嗯，可以呀。」只聽她淡淡的回應一句，並沒有表露出任何情感，但又不失禮貌。
 
唔知點解，佢既一舉一動都好吸引住我，我既目光冇辦法從佢身上移走。
 
「咁呀麥俊傑……你就幫我……」
 
「啦啦隊﹗」
 
肥正與Kitty都不約而同的盯著我，我才明瞭我不該做得如此明顯的。
 
「好好好……啦啦隊好呀﹗」肥正笑得快要看不到雙眼似的，而Kitty的嘴角也不禁向上翹起並於筆記本上寫寫畫畫。
 




而我，視線依舊放在這位名叫Cynthia的女子身上。她是中五生嗎？怎麼一直以來都沒有見過她？
 
如此同時，我也正式的收回較早前的說話﹕其實……姐弟戀都唔係咁差啫﹗
 
「喂，咪話做兄弟既唔同你講聲呀，呢條女唔易得米架﹗」會後，肥正與Kitty和我一同三人行，而我的角色自然就成了電燈膽。
 
「咩呀，我幾時有諗過追佢啫？」
 
面對著突其奇來的事，我總會先是說「咩呀」以拖延時間，好讓腦袋作出思考，隨後再否認以上說話。
 
就算嗰句野係啱……
 
「條女讀VA架。你都知架啦，VA人好多時都有佢地所謂既藝術家脾氣。」
 
「啫係咩呀？」




 
「一句講晒，啲脾氣好難頂。」肥正說罷，身旁的Kitty都不自覺地點頭和應著。