《文科班最後一位男同學》［完］: 十九

在這個平安夜，有別於只有寂靜的夜裏。


街燈依然微微亮著，我們依然默默走著。


「嗯⋯⋯我到啦。」


我倆在一棟大廈的閘門前停下腳步，我深感茫然，很想與她再逛多一會，即使明知沒有可能。






「嗯⋯⋯」


「係喎，我都未答返你。」


「答返我啲咩呀？」






「你唔想知點解我會應承你出嚟咩？」


「因為你⋯⋯得閑？」


「因為我都想見下你。」






聽到她這句話，令我的心悸動不已，背脊更冒出汗來，讓我整個人都有點熱，那是興奮的緣故。


我笑了笑，便柔柔的道：


「你抄緊我對白喎。」


「邊有喎？講真㗎。」


我倆互相看著一會，然後又不約而同的笑起來。






我怕她着涼，於是便叫她快快回去。


「你快啲返屋企啦，我驚你一陣冷親呀，你又話你好易病到七彩嘅？」


「咁呀⋯⋯咁你走先啦，我想睇住你走。」


「咁我走啦。」


「嗯。」






「再見啦，我返到去震你msn。」


「好呀，再見。」


離開她不足兩步，我便轉身與她再度道別。


「拜拜啦。」


「拜拜！」






走到更遠處後，我又回首與她再三道別。


「再見啦。」


只是這一次，我已經聽不清楚她那嬌弱的聲線。


或者我是很無聊的，但換句話說我就是一點也不捨得。


我知道自己要是這樣回去，必定會有種莫名的失意之感，我根本就不會滿足於此。






也許是有點衝動⋯⋯我大起膽子，跑回去剛才的那道閘門前，瞥見盈盈呆站在原地。


我淺笑著走近過去，她亦笑著向我徐徐問道。


「又話拜拜嘅？做咩又行返轉頭呀？」


「咁你呢又？」


「我？我⋯⋯等緊你囉。」


「所以我咪返嚟搵你囉。」


她聽罷，輕掩着臉，偷偷笑著，但依然蓋不住兩邊面頰泛出的紅暈，紅得像個蘋果似的。


只覺當時在我們的四周，有一種名為曖昧的氛圍。


「咁呢，我可唔可以改一改頭先條問題嘅答案？」


「你話點解約我出嚟？可以呀。」


我輕咳一聲，然後一本正經的說道：


「任憑弱水三千，我只取一瓢飲。」


她有些不明所以的笑問：


「你讀詩畀我聽做咩喎？」


「唔係詩嚟㗎！係紅樓夢入面賈寶玉向林黛玉講過嘅一句說話，意思係指無論呢個世界有幾多個女仔，寶玉都只會鍾意黛玉一個。」


「你咁講即係咩意思喎⋯⋯」


「而你就係我嘅林黛玉。」


對的，我終究是忍不住向盈盈用一種婉轉的方式表白了。