《細細樹芯芯》

注意，呢篇仍係一篇史詩式後現代超現實21世紀嘅古代童話故事。

從前，係一個好富裕嘅國家到，有座好靚嘅城堡。城堡入面有位啱啱出世嘅小王子，叫阿恆。由於皇帝佢老來得子，所以呢件喜事傳遍全國上下，人人都替皇帝開心。

自從阿恆出世之後，皇帝希望皇宮嘅空氣更加清新，令阿恆成長得更健康，所以下令要種更多嘅樹。

由於阿恆自細生活係一個充滿大自然氣息嘅皇宮入面，所以養成咗一種可以同樹溝通嘅能力。但呢種能力又唔係對每棵樹都得架喎，只有一棵由阿恆出世後首次埋下嘅種子先可以同阿恆溝通到……

就係阿恆四歲嗰陣，第一次聽到呢棵小樹苗講嘢。





「唉，好曬呀……」

「邊個！」阿恆掃視四周圍，但一個人都見唔到。

「你聽到我講嘢？」小樹苗好驚訝咁問。

阿恆環顧哂四周，唔好話人，畜生都冇隻。

「你係邊個？你係邊到！」





「呢到呀，呢到呀，你望下下面。」小樹苗慶高彩烈咁呼叫。

阿恆低下頭，見到一棵小樹苗，雖然冇五官，但又確信聲音係由呢到發出，於是就問啦：「係咪你同我講緊嘢呀小樹苗？」

「咦，乜你真係聽到我講嘢架？？係呀，可唔可以搵啲嘢幫我遮一遮個太陽呀，好曬呀！」

「好呀，你等我一陣！」

人仔細細嘅阿恆竟然親手搭咗個架去支撐住塊布，為小樹苗檔太陽。





「咁樣好啲未呀？」阿恆一臉天真咁問。

「好好多啦，唔該哂你呀！你叫咩名呀，我叫芯芯呀！」

「叫我阿恆得架啦！」阿恆係城堡入面，除咗父母，從來冇人敢直呼佢嘅名，但偏偏阿恆就係鍾意人哋叫自己個名嗰陣親切感。

「係呢，點解我會聽到你講嘢嘅？」阿恆好奇咁問。

「我都唔知呀，我都係第一次見有人聽到我講嘢咋！」

自從呢一日之後，阿恆閒時就會過嚟搵芯芯傾計，上至書本上所讀嘅趣聞，下至甩咗隻門牙，阿恆都一一同芯芯分享。而芯芯亦都好樂意傾聽阿恆嘅生活秩事。而且阿恆因為芯芯嘅指引，將宮中嘅樹都照顧得好好，此舉都令其父皇好驚喜。

「你點解咁細個就照顧得啲樹咁好嘅？」

「芯芯教我架！」阿恆好興奮咁話。





「芯芯？邊個嚟架？」

「棵樹嚟架！」

「傻仔嚟嘅，樹又點會識講嘢呢？」

阿恆第一次感受到有少少失落，點解父皇會唔信自己嘅呢……於是又第一時間跑去搵芯芯傾訴。

「傻瓜嚟嘅，唔係人人都聽到我哋啲樹講嘢架麻，你同其他人唔同，所以冇人明你正常架！」

「但……我真係可以同你講嘢架麻……」

「不如咁啦，我就唔想俾人知你同我傾計，咁你可唔可以守秘密先？」





「得！」

「咁好啦，我哋可以傾計呢件事就係我哋之間嘅秘密嚟啦！」

由呢日起，阿恆就冇再同任何人提起，自己識同棵樹傾計。

十年過去，阿恆轉眼間已經17歲，長得一表人才，而芯芯亦都由棵小樹苗成長到一棵小型嘅樹。

呢十年嚟，阿恆每日都風雨不改咁去搵芯芯，佢哋之間嘅感情增進不少。

直到一日，皇帝病危，希望皇子可以娶妻沖喜，不過阿恆十年嚟除咗侍女同母后，一個女性都冇接觸過，突然間邊到搵人嚟沖喜呢……

阿恆好煩惱，於是走咗去搵芯芯……

「我可以點做呀……」





「呢層……我都唔知喎……」

「我再搵唔到，父皇可能真係會冇命架啦……」說罷，阿恆就攬住咗芯芯……

「如果芯芯你係人，你話幾好呢……」阿恆輕輕咁錫咗芯芯一下。

奇蹟突然間發生咗啦，芯芯忽然俾道光包圍，幾秒後變咗個清麗脫俗嘅小美人。

「咦……點解會咁架……」芯芯自己都好驚訝……

「人……芯芯……你變咗人…好嘢，芯芯你變咗人呀，咁我咪可以娶你囉！」

「你……唔介意？」芯芯有點膽怯咁問。





「你係世界上最了解我嘅人，我點會介意！我非你不娶架啦！」

「阿恆……」芯芯清秀嘅臉龐滑下一滴喜悅嘅淚珠……

幾日後，皇子同芯芯大婚，舉國上下一同興祝，仲為呢日訂做情人節，以作紀念呢段咁神奇嘅愛情故事，大婚之後，國王嘅病亦都好返。

從此，阿恆同芯芯就好幸福快樂咁生活落去。