《我係窮郵差，專門幫陰陽相隔嘅親人送信》（書局上架中）: 後話

又完成一個作品，感激挽巴同黃瑋中巴打創作咁好聽嘅歌，感謝夜行者巴打嘅畫，感謝每個支持過嘅讀者。


喺寫緊嘅時候，都有啲人問我點解想唔寫。




其實有好多原因，其實身體因素係其中一個因素，近排心臟同個腦嘅狀態都真係唔太理想，所以先想休養下。


另一方面，嚟自現實嘅壓力，再加上覺得自己無乜才能都係一個因素，深深覺得自己無乜講故事嘅能力，有時寫到有啲灰心，都係一個因素。


一直都係寫寫寫，想寫大家經歷過嘅嘢，但唔知自己真係想寫咩。




直到低谷時，望住大海，覺得下一秒自己就會唔係度時，我忽然問自己想做咩。


結果哩個故事又誕生咗。


如果哩個故事試過令你諗返起同家人嘅關係、諗返起香港嘅物流同校園吸毒問題、諗起一個叫鄧桂思嘅病人、少少諗下香港係咪醫學霸權、少少鼓勵到你對政治運動嘅唔灰心、少少令你諗起家庭暴力、少少提醒你關心身邊嘅人，或者就可以避免佢自殺、少少令你覺得人生需要好多嘢你改變唔到，例如父幹，但未來你係可以改變，人生並唔係Fatalism又或者係Hard Determinism，人係有自由。




只要有少少咁多，我都覺得我有少少咁多成功，即使無，你哋嘅鼓勵同支持又已經令我覺得好成功，多謝你哋。


我好鍾意《差一點我們會飛》入面，唔啱音嗰段校歌。


青春嘅我哋總係稚嫩唔成熟，進入哩個社會時總係格格不入，好多潛規則唔識，亦成日講理想同原則，直到有一日磨成乜嘢都圓滑晒人。


如果話做一個唔夠體面嘅人，都希望自己做一個與社會有違和感嘅人。


前一排揀工時，我問自己，想做一個喺中環返大公司工嘅小齒輪，定一個以幫人為職業嘅人。




其實兩種嘅取向都無問題，只係邊一種更似做緊自己啫。


可能好似沙特講嘅，人生在世，就係建立自己嘅文化。


多謝你哋又聽我亂UP，多謝。


手紙哩首歌，就當係完咗個故啦。

https://www.youtube.com/watch?v=osp3mUok7Os