《我係窮郵差，專門幫陰陽相隔嘅親人送信》（書局上架中）: 160
「你⋯⋯點解會嚟到？」
「收手啦阿龍，你仲害唔夠人咩？」
「害？佢哋本身就係要死嘅人，我只不過照命運去收取返佢哋條命，咁都叫害？命運就係咁。」
「佢哋明明已經得救，點解仲要唆擺佢哋自殺？玩弄親人嘅感情好玩？」
「命運就係咁。」佢搖搖頭話。
「所謂嘅命運⋯⋯真係好咩？你明明都係受害者嘅一份子！」
阿龍激動咁將王胤瀅推近河邊，只係差少少佢就跌落去，王胤瀅痛苦咁掙扎住。
「阿龍！」
「唔好再講，所有你身邊嘅人都唔應該有好下場，憑咩你有好嘅人生？應該大家都要依生死簿所定，死嘅死，生嘅生！」
佢望住掙扎嘅王胤瀅話：「望住你身邊嘅愛人，一個又一個咁離開你，有咩感覺呀？」
「仲記唔記得？嗰日你嘅表情，我諗嗰日我真係畢生難忘，因為見到你咁難受嘅樣，我就好開心。」佢陶醉咁講。
回憶又再被勾引起。
「阿亮⋯⋯對唔住⋯⋯原諒我⋯⋯」
重返去阿龍佢哋度時，淨係見到媽媽瞓咗喺地下，郁都唔郁，細妹被關咗喺木屋入面。
「媽⋯⋯媽？」
「應下我⋯⋯」
「媽⋯⋯媽⋯⋯」
「無用，你媽咪已經死咗⋯⋯」阿龍話。
「點解⋯⋯？」
「你問下你最心愛嘅佟堇萓啦。」
當我望向佢時，佢只係低頭，唔敢望住我。
「對唔住⋯⋯阿亮⋯⋯對唔住⋯⋯我真係好想⋯⋯⋯可以去人間享受下讀書，可以搵返我爸爸⋯⋯所以⋯⋯。」
「所以你要背叛我，害我屋企人？」
「⋯⋯」
「放心啦，你媽咪同你細妹嘅肉體好快有人接管，佟堇萓係其中一個。」阿龍話。
我憤怒衝上前話：「畀返阿妹我！」
點知阿龍一手擋住我，然後一拳打向我臉上。
「你都係算啦！」再一拳，再一拳⋯⋯
直至我頭暈眩目，佢話：「如果你真係咁自由，可以跳脫命運，咁你一定無事嘅⋯⋯」
講完哩句，我只係感覺到身體正下墮⋯⋯再下墮⋯⋯
喺哩個時候，細妹已經不經不覺繞到佢背後，我警覺到，就喺佢郁手嘅同時，我亦撲向阿龍！
「阿龍！」
阿龍冷不防我咁突然嘅偷襲，慌咗手腳，同時細妹趁亂成功救返王胤瀅，佢拖住王胤瀅就走。
「咪走！」阿龍想上前追，我拼命拉住佢衣領，佢反手掙脫，一腳踢向我胃部，我個胃翻滾不己，痛到忍唔住即刻跪低。
好快咁，阿龍已經追上佢兩個，三兩下手勢就制服咗兩個女仔，然後強拉佢哋上一架古老舊式汽車。
「今次就要你兩個重視嘅人都失去埋。」
佢奸笑咁帶住佢哋開車走咗，車嘅身影越嚟越遠。
唔可以⋯⋯唔可以！
我企返起身，已經無理身上嘅傷，爬上我哋嚟嘅時候用嗰架馬車，開車追阿龍佢地。
「唔好走呀！」
我唔知可以去到幾快，淨係不停咁揮鞭，用盡全力咁加速！
馬都用盡全力咁飛奔，成架車快到震到好似就散咁。
終於，我再次見到佢哋架車！
我將馬車靠近啲佢哋，但阿龍將佢哋綁埋一齊，佢哋根本就過唔到嚟。
我無諗太多同後果，駛近佢哋之後，一躍咁跳上佢哋架車頂，竄入車箱。
揸緊車嘅阿龍驚覺嘅時候，我啱啱好將佢哋鬆綁。
「走啦你哋！」我急忙咁話。
「咁你呢？」王胤瀅問。
「我仲有嘢做⋯⋯」我答，然後由袋中拎出一個細細隻嘅米妮公仔畀細妹。
佢只係一臉茫然咁望住我，我話：「算唔住⋯⋯如果將來有機會，我要送返隻大嘅畀妳⋯⋯哩隻⋯⋯當頂住先⋯⋯」
「阿哥⋯⋯」
「走呀無時間啦！妳搵隻黑貓，帶胤瀅返人間呀！走！」我催趕佢哋。
「但⋯⋯」
「走呀！」
佢哋被我逼到往車外一跳，直落喺草地上。
知道佢哋無事之後，我對阿龍講：「你咁鍾意我留喺度嘛。放心！我會陪你留到最後！」
「你想做咩呀？！」
我跨上車前，伸腳擋住阿龍，然後全力踩落油門，架車開始瘋狂加速前進！
「你痴咗線？」
我同佢互搶軚盤，架車曲折迴旋咁走，終於到咗關鍵一刻，我再踩油門，我同阿龍連人帶車猛然咁撞入政府大樓，玻璃漫天而飛，直鏟到巨柱前，強大嘅衝擊力震到我個腦眩暈眼花，幻影不斷。
成架嘅車頭都凹到不堪入目，阿龍喺車入面，頭破血流⋯⋯
我跌跌爬爬咁走出車，車上面嘅汽油正係不斷咁湧流出嚟。
生死簿就係眼前。
「做咩事呀！」
著白色西裝嘅義律由大廳走出嚟，見到成個大樓畀撞得混亂不堪，就憤怒咁問，優雅氣質唔見晒。
「又係你？南門亮？」
我慢慢企穩腳步話：「你知唔知我生平最憎邊種人？就係你哩啲自以為上流但只係用金衣美服包住醜陋嘅自己。」
「你講咩？係咪撞傻咗你？你到底又嚟做咩？」
「我⋯⋯我係嚟還孽。」
佢忍唔住嗤笑。
「點還？我講過啦，哩啲係佢哋嘅命運，係注定咗，係生死簿所定。」
「所謂嘅注定，堂皇冠冕，其實揭穿咗，只不過係你喺簿上所寫，憑咩由你去決定人嘅命運？」
佢微微一笑，無任何否認咁話：「人生就係咁唔公平㗎啦，我係陰間嘅官，自然有權力去決定。唔通你認為人生係自由？我講過啦，好多嘢已經決定咗你嘅一生，包括你嘅家世。」
「的確係唔公平，亦好多嘢都唔到我哋決定⋯⋯但哩樣亦唔係你去決定。」
「咁應該邊個去決定？」
「現在、未來，應該係由自己去創造同決定，無限嘅可能性亦都應該係在乎自已去決定⋯⋯而唔係你嗰本嘢。」
佢聳聳肩，無數嘅守衝緊入嚟。
「李繁生！」我大叫。
「咩嘢呀？」佢問。
「李繁生唔係我救，我無影響過佢，但佢最後都無自殺到，證明你哋唔係操控晒所有嘢㗎！人⋯⋯都可以有佢嘅自由！」
「講得幾好聽呀，」佢嘲笑咁拍手講：「但點都好，你走唔到㗎啦，我放過你咁多次，你都唔識珍惜，係要自掘墳墓⋯⋯今次你死哽。」
守衛正諗住衝過嚟時，卻忽然後退返轉頭。
「唔好諗住捉郵差先生呀！」、「係呀！我哋唔會畀你咁做！」、「郵差哥哥係好人嚟！」
孟太、吳先生、張文生⋯⋯好多其他唔同嘅居民，用身體擋住守衛，將守衛逼返出去。
「受過你恩惠，今日當係還返畀你。」張文生同其他人講。
「多謝⋯⋯多謝你哋⋯⋯」我感動到有啲想喊。
「傻啦。係你幫咗我哋就真。」
居民一個一個攬住守衛，將佢哋拉返出去。
「作反啦！」
「你知唔知⋯⋯我嚟得⋯⋯就從來都無諗過走。」我望住生死簿，慢慢由褲袋拎出⋯⋯
大叔送畀我嘅打火機。
「打火機？」
「遲啲你就會知道㗎啦。不要問，只要信。」佢咁樣同我講。
大叔，我可能而家先明白。
義律見到我手中嘅打火機，面色開始轉白，驚訝咁問：「你想點？」
「如果哩度一切就係因果鎖，咁我嚟⋯⋯就係打破因果。」
「你放低你手上嘅嘢先！」佢急忙叫人嚟捉住我，但已經無人。
我猛然將打火機扔向汽油⋯⋯火迅速咁點燃，烘烘火光如煙花耀目散開，剎那間，撲天紅焰而出紅焰貫通整幢大樓。
閉上眼一刻，腦海全部都係媽咪同細妹。
「對唔住⋯⋯」
原來人生到咗最後，先發覺最重要嘅係乜嘢。
好掛住呼吸嘅空氣⋯⋯好掛住藍天白雲⋯⋯好掛住屋企嘅爭吵聲。
到底我嘅人生係點⋯⋯
可能同好多人一樣⋯⋯
精彩不亮麗，起落是無常。
再見⋯⋯
轟隆！轟隆！