《我係窮郵差，專門幫陰陽相隔嘅親人送信》（書局上架中）: 144

 
我都唔知我哋對望咗幾耐，但相望而無語，佢又唔講嘢，我又無開口。
 
 
兩個人相望，流動嘅係空氣。
 
 
哩一刻，我仍然覺得時間過得好快。
 
 


因為重逢自己至親嘅親人嗰種感覺，好難用筆墨去形容。
 
 
「你仲企到起身呀？」
 
 
畀佢咁樣提一提，我即刻覺得全身好痛，然後撲返落地下。
 
 
「你真係好弱智。」佢嘆咗一口氣，過嚟問我：「死得未呀？」


 
 
「妳關心下唔得㗎咩？」
 
 
「我唔關心你，你一早死咗好耐啦。」佢扶我慢慢瞓返底，再用毛巾抹面。
 
 
「點解⋯⋯妳哋會唔見咗嘅⋯⋯點解妳會喺哩度出現嘅？點解妳喺人間唔認我嘅⋯⋯」
 


 
無數嘅問題，我連珠砲發咁問，實在太多嘅不解。
 
 
「你不如休息先啦。」
 
 
「對唔住⋯⋯究竟係咪我累咗妳⋯⋯」
 
 
我內心其實最怕哩樣，真係好怕。
 
 
佢只係靜靜咁坐低，然後話：「你記唔記得，你生日嗰日⋯⋯話有啲嘢想同媽咪同埋我講。」