《我係窮郵差，專門幫陰陽相隔嘅親人送信》（書局上架中）: 96

「廢青大哥。」
 
 
我阿妹喺我畢業嗰段都好鍾意講哩句。
 
 
一見到我喺屋企，佢就會嘲笑我無嘢做，喺屋企無所事事。
 
 
「仲未搵到工呀？」每次佢放學返嚟，都會咁講。


 
 
喺我畢業嗰年，亦意味住失業嘅來臨。
 
 
我走入咗係咁搵工、被BAN、搵工、被BAN嘅無限輪迴入面。
 
 
寄咗超過一百份嘅CV，當中可能得幾份係會真係覆你，叫你去面試。
 


 
而面試又係你要同一大堆人爭，最怕就係同人爭。
 
 
每一次嘅面試，我都會寫上自已患有嚴重嘅渴睡症，原因係我唔想隱瞞，反正最後老闆一定會知，倒不如誠誠實實、大大方方，睇下佢會唔會接受，我一直都好期望一個有包容心嘅老闆。
 
 
然後一個都無出現。
 
 


往往考官都會叫你等消息，而哩個消息就會石沉大海。
 
 
唉，我係咪成世都唔洗返工⋯⋯
 
 
我頹到瞓喺梳化，無所事事，個頭都幾日都無洗，因為根本唔洗出街，淨係喺屋企睇戲算。
 
 
「你咁廢青不如陪我去跑步啦。」
 
 
阿妹哩個時候已經喺學校返嚟，換好校服，變咗運動裝束。