《我係窮郵差，專門幫陰陽相隔嘅親人送信》（書局上架中）: 79

 
馬車緩緩離開陳太嘅屋企，拉遠我哋嘅距離，佢仍然目送馬車嘅遠去，眼神好似係將希望放喺一個新地方上面。
 
 
我腦海不斷浮現返陳教授同嗰個女學生嘅事。
 
 
如果再遲啲，可能又會多一個受害者出現，畀佢殘害。
 
 


但當務之急，都係搵返王胤瀅最重要。
 
 
「馬伕，唔該⋯⋯快一啲。」
 
 
「我係車夫呀。」
 
 
「Sor⋯⋯」


 
 
我望真啲佢，先發現車夫個⋯⋯屁股好似凹咗入去咁。
 
 
「你嘅⋯⋯？」我指一指佢後面。
 
 
佢好淡然咁話：「畀狼咬。」
 


 
⋯⋯
 
 
佢就係傳說中⋯⋯聊齋記載嗰位人兄？
 
 
我哋好快就嚟到山區附近，哩頭基本上係乜都無，連小屋都唔見幾間，淨係有河，同一座綠草如茵嘅高山。
 
 
「哩度係⋯⋯？」我問。
 
 
佢停低車後，抹一抹汗話：「靈薄鎮。」
 


 
聽聞有人見到佢哋上咗山。
 
 
「我自己上就得。」
 
 
我無理到佢，就自己開始上山，心諗遲多一秒王小姐都有可能會死。
 
 
沿山路上去，四處都係好靜，靜到有啲令人毛管棟嘅感覺。喺四處嘅草叢之中，又好似有對眼一直監視住自己咁樣。
 
 
「⋯⋯」
 


 
我繼續行，開始有啲奇怪嘅聲音傳出。
 
 
「嘩⋯⋯嘩⋯⋯」
 
 
好似係好恐怖嘅笑聲，但又唔似人聲咁。
 
 
「嘩⋯哇哈哈⋯⋯哇哈哈⋯⋯」
 
 
我開始越嚟越肯定係笑聲，心裡有啲毛茸茸感覺，大步急向前，想擺脫哩種擾人嘅聲音。