《我係窮郵差，專門幫陰陽相隔嘅親人送信》（書局上架中）: 69

「我而家落返去搵佢！」
 
 
「咪住先！」娟姐拉住我隻手講：「而家太危險啦，佢哋無啦啦攻擊你，就代表有某啲我哋唔知道嘅事發生咗，如果你而家落去，話唔埋佢哋又會嚟襲擊你㗎啦。」
 
 
「但娟姐，哩個人係我帶落去，我唔可以畀佢有事。」
 
 
「你自己都可能自身不保⋯⋯」


 
 
「我會帶佢返嚟，一定會。」
 
 
講完之後，我拖住佢隻手，再一次進入夢鄉。
 
 
再一次進入陰間，同樣嘅夕陽小棧道。
 


 
我迅速穿過棧道，喺入城嘅路旁，有一個陰間嘅守衛，正喺度巡邏。
 
 
一直以嚟喺我眼中，雖然佢哋好恐怖，但佢哋性格好溫和，而且愛好和平，基本上你唔係犯法都唔會搞你。