《我係窮郵差，專門幫陰陽相隔嘅親人送信》（書局上架中）: 67

 
娟姐住得好近，正正就喺郵局附近，所以喺十分鐘之後趕到嚟，佢望到沉睡王胤瀅，已經好嬲咁話：「你搞咩呀？」
 
 
「對唔住⋯⋯」
 
 
「係咪點叫都唔醒？」
 
 


我點點頭，然後問：「佢嘅情況點？」
 
 
「意識仲喺陰間，你話下面嘅守衛攻擊你哋，咁佢之前有無講啲咩？」
 
 
我搖搖頭話：「無呀⋯⋯點會咁奇怪嘅，明明我有證喺身又有著制服。」
 
 
「哩層我都唔知，除非你哋犯咗下面嘅法，如果唔係佢哋都唔會無啦啦攻擊你哋。」


 
 
「之前⋯⋯前輩有無發生過哩啲事？」
 
 
「你前輩做事咁小心又點會有哩啲事，究竟你點解會帶佢落去㗎？貪好玩呀？」
 
 
「對唔住⋯⋯」
 


 
娟姐喺袋入面拎出一樽細小嘅香薰油，倒咗一啲出嚟，成間房已經充滿住好濃烈嘅氣味，我畀哩陣味嗆親，不停係度咳。
 
 
但娟姐處之泰然咁倒喺手，然後用手掩住王胤瀅嘅口鼻。