《我係窮郵差，專門幫陰陽相隔嘅親人送信》（書局上架中）: 1

陳師奶激動到鼻水眼水飛到成檯都係，喊晒口咁話：「我⋯⋯同我老公分開咗已經兩年啦，哩兩年嚟我每一晚都好掛住佢⋯⋯每一晚都夢見佢⋯⋯」
 
 
「最掛住呢⋯⋯係佢把磁性又迷人嘅聲音⋯⋯」
 
 
我望住陳師奶抹面張紙巾，紙巾好唔情願咁畀佢蹂躪，由乾爽潔淨捽到濕潤霉爛。
 
 
「你係咪真係有方法可以畀我同佢傾計㗎？」


 
 
「哦⋯⋯可以，陳生嘅名係？」
 
 
「佢叫陳小黑。」
 
 
「好，妳等等⋯⋯」我開始起勢Chok張枱，Chok到地震咁：「陳小黑，陳小黑⋯⋯⋯⋯魂兮歸來！去君之恒干，何為四方些？」
 


 
「老公⋯⋯你係咪返咗嚟呀，我好掛住你呀！老公！」
 
 
「我已經感覺到陳生返緊嚟。好強烈嘅感覺，嚟緊⋯⋯嚟緊！」
 
 
呯！
 
 


我個頭好大力咁轟落張枱度，凹咗少少⋯⋯個頭。
 
 
「⋯⋯老⋯⋯公？」
 
 
「老公，你係咪返咗嚟呀？係就講句野啦⋯⋯」
 
 
「老公！？」
 
 
「喵～」
 
 


「哎呀，老公真係你，我認得你把聲呀！」
 
 
「喵～喵喵～喵～」
 
 
「老公！我好掛住你喔！」陳師奶好激動咁攬住我。
 
 
「喵喵喵喵～喵～」
 
 
「老公～老公，啜啜啜～」
 
 


陳師奶啲口水鼻水開始流到我成身都係。
 
 
做我哋哩行無奇不有，將貓當成老公，都唔算係啲咩新鮮奇怪事。
 
 
試過有一個客，都係師奶嚟嘅，姓黃，話要搵返隻牛。（師奶客人特別麻煩）
 
 
「牛唔可以係family呀？」佢好理直氣壯咁兇我。
 
 
「可以⋯⋯當然可以啦。」
 
 


5分鐘後⋯⋯
 
 
「哞哞哞哞哞哞哞哞哞～」（翻譯：我過得好好呀，住嘅地方夠晒凍。）
 
 
凍？即係唔喺香港啦。黃師奶本來覺得，搵到外國一戶好人家都唔錯嘅，好過住喺香港受苦。
 
 
黃師奶掩掩心口，一臉安慰嘅樣話：「Well，咁baby你而家live喺where ar？Iceland定Norway？」
 
 
「哞哞哞哞～」（我喺雪櫃。）
 
 


「雪⋯⋯吓雪櫃！？」
 
 
「哞哞哞哞哞哞哞哞～」（我而家係一盒$7.6嘅維記朱古力奶）
 
 
講返正題先。
 
 
接落嚟嘅三十分鐘，我都不停咁喵喵喵，等陳師奶同佢「老公」傾餐飽。
 
 
「多謝你呀南門先生，我終於知佢過得好好，我安樂啦。」陳師奶臨走前，好滿足咁同我講。
 
 
「唔洗客氣。最緊要幫到妳。」
 
 
我抹一抹汗，強裝笑容咁講。
 
 
陳師奶擺低封利是就走咗。
 
 
我有一秒認真諗過，陳師奶係咪真係識聽貓話。
 
 
一秒之後，我已經無再去諗，因為有人連牛話都識聽。
 
 
事先聲明，我並唔係問米。
 
 
因為動物嘅魂，同人嘅靈係兩種system處理，去嘅地方好唔同，人係去另一個地方。
 
 
至於點解我知，事源喺我十五歲嗰年，全世界都發現我好瞓得。