個天話我【涼薄】，要收返我有嘅嘢！: (2)

「仲等？最心痛是，愛得太遲——」嗰團白光冇啦啦撻著流行經典50年。
 
我推開圍觀嘅人，跑返屋企。老豆、阿媽，你哋千祈唔好有事！
 
我住私人屋苑，平時出入要嘟住戶證。見前面住客開咗大門，我跟佢尾，好似識轉彎嘅子彈咁越過曬啲人，衝入𨋢。保安想截住我，但架𨋢已經閂咗門，「叮」一聲標上十三樓。
 
出𨋢，轉左，跑到盡頭，我撳密碼鎖隻手震曬，輸入幾次都話我錯。
 
「你Hai邊個？」大門後有把後生女人聲，佢啲廣東話唔多正。
 




「你係咪白光嘅同黨呀？」我問返佢，仲大大力拍門，「老豆、阿媽你哋有冇事？阿賢你喺唔喺入面呀？」
 
「你找錯聞口呀，呢度Hai實生B。」13B咪就係我屋企囉！
 
個女人把聲聽起嚟有啲怯，我決定兇佢：「綁架係要終生監禁架！」
 
門後即刻響起細路女喊聲，唔通佢哋仲販賣兒童？我想像唔到自己張床變咗罪惡溫床。
 
「開門呀！我報咗警架喇！」我繼續兇佢，醒起對方如果捉埋我，呢單嘢咪冇人知？
 




我跑去後樓梯打俾嘉欣，話如果我十分鐘後冇再打俾佢，就報警，話我屋企有綁架、爆格同人口販賣。
 
我出返走廊，就見到兩個保安，佢哋企喺我屋企門口，撳門鐘。
 
其中一個係古叔，佢朝朝都有同我打招呼架，我即刻捉住佢話：「古叔！我間屋俾人爆格！我父母俾佢哋困咗喺入面呀！」
 
個女人見事敗，終於打開大門，我一望入去，呆曬。
 
牆紙、地板、傢私，甚至係房嘅間隔，樣樣都同我屋企完全唔同！
 




我幾時得罪咗啲有勢力人士，佢哋仲咁神通廣大，一個鐘就搞到我屋企面目全非？
 
死啦！連間屋都咁快手處理好，阿賢同我父母會唔會俾佢哋溶咗架？
 
古叔話：「陳太，唔好意思，我哋會將呢位小姐帶走，唔俾佢再騷擾你。」
 
佢竟然係同嗰個女人講！
 
另一個保安負責攔住門口，古叔就向我伸出手，「小姐，請問你有冇住戶證？」
 
我又急又嬲，古叔有乜理由唔認得我？我喺褲袋拎出銀包，摷咗好耐都搵唔到張證。
 
佢哋做出請我離開嘅手勢，「呢度係私人屋苑嚟，麻煩你離開。」
 
走廊咁窄，我唯有扮順攤，行到𨋢口，先轉身衝返轉頭，仲大叫：「咪掂我！非禮呀！」




 
佢哋俾我嚇窒咗，動作一遲疑，我就乘機避過佢哋，跑返去屋企，一嘢撞開咗想閂門嘅女人。
 
入到屋，我發晒茅咁搵我屋企人，但間間房都唔見呀！
 
個細路女喊到拆天，個女人擋喺我同佢之間，好似驚我會傷害佢咁，橫睇掂睇都似一對普通嘅母女……
 
但屋企變咗樣，屋企人都失埋蹤，我仲邊有理智？直情撲向個女人，好大力咁捉住佢雙肩，迫佢交人。
 
衝突咗幾句，我已經同個女人扭打起嚟，扯頭髮、用指甲，乜陰招都出齊。
 
「小姐……你冷靜啲先。」保安想拉開我哋，我哋被迫退後一步，但始終都唔放開對方把長髮。
 
「停手！」走廊有兩個男人突然大叫，原來係警察到，好在叫咗嘉欣幫我報警咋！真相係時候大白！
 




「阿Sir，佢非法擅闖我屋企！」／「阿蛇，佢非化擅橙禾屋企！」
 
我同個女人同時大叫，我補多句：「有團白光捉咗我屋企人，仲收買埋保安對付我！」
 
個女人放開手，我睥咗佢一眼，更加出力拉扯佢把頭髮，彷彿我嘅人生就掌握喺呢一刻。
 
「差……差人嚟到仲打？」睇個樣似係新仔嘅警察好騰雞，隻手移去打開槍袋。
 
老差骨俾佢嚇親，「傻咗咩？咁小事你抆槍？！」
 
新仔縮手，講咗句：「女人打交真係好恐怖⋯⋯」
 
老差骨問：「邊個報警架？」
 
「係我。」隔離屋個男人行過，佢話聽到咁嘈，驚有意外。




 
乜唔係嘉欣報警架咩？
 
差人問發生咩事，我同個女人互相指證，但佢竟然拎得出住戶證，加上全屋都係佢同佢屋企人嘅相，我百辭莫辯。
 
然後，個女人話唔想搞大件事，要銷案，班差佬梗係想做少啲嘢啦，循例警告咗我幾句。佢哋一聽到我反而話要報返警，就對望一眼，大笑幾聲，叫我執返身彩就唔好再搞事喎。
 
點解係我搞事？個屋企係我架，明明係我啱，點解冇人信我？點解呢個世界咁是非不分架？
 
我俾四個大男人夾住帶離屋苑，好似咩都冇發生過咁，我企喺街，唔知點算。
 
望一望電話，先知嘉欣打咗十幾次俾我，我打返俾佢，佢劈頭就鬧我：「冇啦啦叫我報警，警察上咗你屋企話冇發現，差啲要告我報假案呀！」
 
一聽到熟悉嘅聲音，我啲眼淚先識流出嚟，嘉欣聽到我嘅喊聲，態度軟化，「你而家喺邊呀？Auntie、Uncle好擔心你呀。」
 




「我……我啱啱喺屋企……俾差佬趕咗落嚟……我搵唔到老豆同阿媽……」
 
「咩呀？佢哋咪好地地喺你屋企囉。你係咪收到咩大陸電話，俾人呃咋？」
 
原來佢哋冇事！但……我屋企？
 
嘉欣講咗個地址，我話：「嗰度係我舊居，我一早搬咗屋啦。」
 
把口咁答，但我就即刻衝咗上的士。
 
一開車，嗰團白光就喺司機隔離個位出現！
 
把聲依然係時男時女時老時嫩，好似全世界嘅人，一齊同我講嘢咁：「我冇講錯，你見到你屋企最後一面啦。」
 
我個心跳得好快，但我迫自己冷靜。我望住司機大佬，見佢仲好平靜咁Mon住唔知邊度嘅股市，我問佢：「司機，你見唔見到有團光？」
 
佢周圍望，視線穿透團白光，一啲反應都冇，「我冇衝紅燈喎，放心啦，我手車好穩架。」講完繼續做股神。
 
果然只有我先睇到團光。能夠改世事、洗人腦，唔通係超自然力量……
 
「你係咩人呀？」
 
「我係個天，天有眼嗰個天。」
 
（待續）
 
Facebook專頁：https://goo.gl/FVN3Pb