[新手上路] 真係做得出刀劍神域入面果種VR?: 25. 五大元素 缺一不可

已知係Kasa呢個世界入面有「五大元素」

分別有 「風」, 「火」, 「水」, 「雷」, 「地」, 五種元素, 各有特色, 而且各有相對剋制既屬性

火剋風, 風剋地, 地剋雷, 雷剋水, 水剋火, 令到呢個遊戲都取得一個平衡, 唔會有受謂最強元素

所以元素唔係關鍵, 關鍵係元素使用者可以點去運用元素所轉變出黎既魔法, 即係我地 - PLAYER

當然唔同屬性元素都會有唔同既特性同形態





風元素, 吸收風元素既時候, 身體會感覺到一股暖流走勻全身, 能量儲存就係靠外面包圍自己既風流動大小, 如果要實體化風元素, 就必須要大量吸收, 令到風元素加速流動, 不但可以方便即時轉換成魔力, 更可以強化風屬性技能. 如果風屬性既能量儲存達到頂點, 威力絕對可以媲美元素破壞力最大既火元素屬性

火元素, 吸收火元素既時候, 全身都會好熱, 而呢股熱力就係火元素既能量, 能量會儲存係自己心臟位置, 所以火元素使用者一般體質會效好, 因為火元素既力量會令使用者心跳加速, 令全身血液流動更快, 戰鬥更快捷同耐力更強, 同時火元素既破壞力亦係最高, 所以要好好控制亦都更難, 暫時要容易處理就係將火元素轉化成強化能量, 用落死物度, 例如武器之類

水元素, 吸收水元素既時候, 全身會感到寒冷, 有種好似跳左落泳池第一下果種凍保持住係身體, 而水元素既能量就係保存係血液當中, 所以水元素既使用者唔可以比扣太多血, 因為血愈少就代表保存能量愈少, 威力亦會大打折扣. 所以水元素使用者會成為support位置比較普遍, 一黎扣血機率減低, 二黎水可以變化成唔同形態去配合, be water

雷元素, 吸收雷元素既時候, 會有全身麻痺既感覺, 但只要慢慢適應就可以, 正因為雷元素既特性, 所以唔係人人既身體都接受到, 反映出雷屬性既使用者其實一定會偏少, 雷屬性魔法暫時偏向控制手段為主, 所以有利於行動同收集情報, 當然如果要作為攻勢手段, 雷屬性使用者接受能力愈強, 就代表儲存能量愈多, 威力自然以倍數提高

地元素, 吸收地元素既時候, 有一種感平靜而沉實既力量充斥全身, 地屬性魔法係五大元素中最高防禦力既魔法, 而攻擊手段速度比較慢, 但要去破解抵消相對會難, 所以一般會用黎防禦多過攻擊, 地元素亦係易於吸收既元素, 因為只要係地面, 就會有大量可以吸收到, 所以最易入手同感受既一定係地元素, 但易吸收唔代表用得好





「大致上已知既就係咁多, 當然要點樣去運用, 將元素變成咩形態去用係完全無限制, 所以自由度好大, 都係要睇使用者既實力」

杰仔一口氣講晒上面既野出黎...我認我一時三刻真係吸收唔晒, 但我悟出一個道理, 就係要靠自己....

「劍仔, 我知一時間要領略晒係比較難, 不如咁啦, 趁今日仲未夠時間出返去, 我教你點樣去令自己進步更快」

我慢慢開始覺得杰仔呢個人都幾好, 並唔係真係咁神秘姐