[新手上路] 真係做得出刀劍神域入面果種VR?: 7. 研發室

嘟~ Koey拍一拍卡, 磨沙玻璃門左右打開

眼前呢一幕, 真係嚇親寶寶..因為真係  好!  撚!  大!

呢三個字係唔足以表達出呢度有幾咁大, 只可以話係非筆墨所能形容, 所以我就唔形容落去

「嘩.......」我擘大口得個窿, 呢刻我覺得自己同大鄉里出城無分別

「好大呢? 我第一次黎同你一樣反應, 但你等等睇到既野, hehe! 包你嘩唔停!」Koey好興奮咁話





Koey帶我行入去, 入面大到五個標準足球埸都唔止咁, 左邊好多排好似太空艙咁既長型管道. 正中央一座好大型圓柱體既東西, 望落有啲似伺服器. 而右邊係一班技術人員, 佢地每人都各自對住好多螢幕, 個感覺就似係睇戲入面, 啲國家地底專放啲戰機軍機果啲咁! 痴撚線!

Koey未等我問, 就已經開口話「左邊你見唔見到好多好似太空艙咁? 果啲就係實驗階層既VRT, 即係Virtual Reality Tube, 暫時係實測階段所以都咁樣叫住先, 你訓落去就可以scan晒你成個人既身體資料, 再轉為數據傳送去中間果座圓柱體既伺服器! 呢個伺服器係我地獨有嫁~ 而且用自已網絡唔受外界影響」

聽到佢既簡介, 同我估既都真係差唔多. 不過呢間公司做到有自己網絡又有自己咁大既server, 而且收得咁密, 一啲風聲都無洩漏出去, um...真係唔簡單呀

「咁即係...用VRT入到去虛擬世界, 都係會用返自己既外表體型黎進行活動?」

Koey諗左一諗「現階段黎講, 係照你講咁樣既...不過我地想保障使用者, 都會做加密」





「自行選擇改變外貌同外型?」咁咪好似刀劍打機咁?

「係呀! 呢個係其中一個會考慮加入元素, 但基於獨有性呢一方面, 我地會保留佢地瞳孔, 指模呢樣獨一無二既識辨方法, 咁就唔怕比人盜用資料」Koey慢慢咁講出呢番說話

我心諗, 講得有道理既, 係入面要改變外型而又要識別到係自己, 同時又唔會咁易比人盜用既方法真係無邊幾個... 係我諗緊野既同時, VRT區有幾個艙打開左...