英雄同盟戰: 3.招賢納士3
美國三藩市，某大宅
「嗯........」
頭髮剪短既叢雲從床上張開雙目
「早晨呀叢雲」
阿白原來早已經醒來，一直望住叢雲
「呃...早晨呀阿白..」
叢雲同阿白對望，令佢感到難為情
「孤獨兄弟」望月叢雲同望月彌生，兩個月前於大阪成功摧毀野心勃勃既國際保安公司，迪拉斯於日本既勢力後，兩人聯同自己既另一半，阿白與小優到美國隱居
而相較生活荒唐既彌生，較檢點既叢雲同阿白過住安穩既生活
兩人每日就係做住睇書、睇電影、打電玩、做運動等簡簡單單既活動
而博學多材既叢雲更開始改裝大宅既保安系統，以免迪拉斯有機可乘
「我唔客氣啦！」
食住阿白煮既飯，就係叢雲每日最幸福既事
「係喎..點解彌生同小優呢幾日冇搵我地既？」阿白抬頭思量
「彌生實係響賭城賭到自己姓乜都唔知啦..」
叢雲飲住熱茶:「點都好，唔好搞到我地就得啦」
「嘻嘻，叢雲你又扮唔關心彌生啦！」阿白暗笑道
「哼，有個咁既細佬，我先唔想理佢....」
「叢雲呀，你有冇諗過返香港呀？」阿白忽然問起
「冇...雖然我響香港出世，但係我一啲都唔鐘意呢個地方...做乜咁問既？」
「我一出世就響日本度住，都未返過去...」
阿白笑道:「所以...遲啲我想同叢雲你一齊返去呀...」
「咁呀...好啦，等彌生佢地返到黎我地就返去啦」
「踏..」
兩個身影正站於大宅前
正是，PAZ既首領阿孝同IID香港分部行動司司長發叔
「就係呢度啦...」
發叔抹住汗水:「嘩..呢度仲熱過香港，邊住得人架...」
「老人家頂唔順既話咪返去先囉」阿孝對住自己既師父，依然毒舌
「死仔包，我今年先49咋」
發叔走到大宅既閘外:「指紋認證、眼球認證...果然保安森嚴」
「佢地話哂都得罪過迪拉斯，呢啲級數既保安的確需要」
阿孝吸一口氣:「佢地似乎唔歡迎客人，不過...」
「！！！！」
叢雲腦中一閃
「叢雲？做咩事呀？」
阿白亦心知不妙:「叢雲有呢一種反應...唔通...」
「有人響門口度...」
叢雲打開屋外既閉路電視，阿孝兩人既容貌一覽無遺
阿孝知趣地對住遠方既鏡頭露出IID特工執照
「係IID...我有種唔太好既預感」
叢雲嘆一口氣:「阿白，你留響度，我出去會一會佢地」
「唔得！」
阿白捉緊叢雲:「叢雲...唔好掉低我一個呀...」
「阿白...咁好啦...」
叢雲道:「一陣，你要留響我後面」
阿白跟住叢雲出到大宅外
「請問，你地兩位係咩人？」
「望月先生，白小姐，打搞哂」
阿孝先自我介紹:「我叫阿孝，係IID獨立軍隊PAZ既首領，亦係你地兩兄弟既委托人凌愛瞳既上司」
「瞳瞳既上司...」
「哈哈...」
發叔笑住道:「而我就叫林日發，係IID香港分部既行動司司長」
「哦...咁今日兩位山長水遠黎到我地呢度，係咩事呢？」
阿孝先咳兩聲
「咳...其實係想傾下合作....」
「我諗無需要啦，我已經收左山」
叢雲打斷阿孝既話:「兩位請回啦」
「你想唔想知你細佬同佢女朋友既下落？」
「！！！」
阿孝既一句，觸動叢雲同阿白既神經
「彌生同小優，佢地發生咩事？」叢雲鎮定問
「唔通佢地幾日無覆我地，就係因為.....」阿白心想
「想知既話，至少比我地入黎傾個合作計劃啦」
「可惡，依家根本無得揀..」
叢雲只好識趣開門:「有野好快啲講，我唔想應酬你地」
「哈，放心啦，好快講完架咋」
「兩位，請用茶」
阿白溫文地將兩杯綠茶放到阿孝同發叔面前
「唔該白小姐」
發叔道:「放心，你細佬佢地無事，只係...」
發叔拎出平版電腦
螢幕中既，正是彌生同小優
「咦...大佬！阿嫂！你地好嘛！！！」
而兩人既背後卻是寫有IID字眼既背景
「你地兩個搞咩呀...」叢雲一臉無奈
「講起就扯火啦！」
彌生開始講出自己連日黎既事
「我同小優bb豬響賭場賭到無哂錢，諗住借大耳窿翻本，點知...」
「點知咪再輸哂啲錢囉！叫左你唔好賭架啦！」身旁既小優抱怨道
「之後我地就比班大耳窿追斬，好彩有IID既人帶左我地上去佢地office度，依家至無事咋！不過....」
「不過咩呀？」阿白問
「嘻嘻，IID逼我簽左文件，叫我地兩兄弟去參與佢地今次既行動，唔應承既話...」
彌生摸住頭:「就會將我地既住址放上goldenjai.com」
「彌生，今次真係比你玩死啦」
「唉，冇計啦，果陣幾支槍指住我同小優bb豬，想唔應承都唔得呀...」
叢雲望住阿孝同發叔:「可惡..又比你地利用」
「要怪，就怪你呢個細佬爛賭啦...」
發叔道:「我知道咁做好卑鄙，不過，情況嚴峻，無左你地兩兄弟既話，根本好難打得贏呢場仗」
「咩仗？」
「迪拉斯即將響香港發動襲擊」
阿孝飲住綠茶道:「呢個係根據我地PAZ既超級電腦Archangel分析出黎既結果」
「咁..既然係攻擊香港，咁點解唔搵返香港分部既人去對付佢地」
「依家既IID，已經開始比迪拉斯渗透，根本唔可信」
發叔嘆氣:「內奸根本抽極都抽唔哂，所以我先搵阿孝秘密建立獨立軍隊PAZ，以防迪拉斯襲擊」
「而為左抗衡今次迪拉斯既攻擊，我地就進行左呢一個計劃」
阿孝舉出一份文件:「建立英雄部隊『Troopers』，專門維持香港既安全」
「英雄部隊？」阿白問
「即係類似復仇者聯盟既野，我地已經召集左一堆IID以外既有實力人士，加入呢個部隊」
阿孝道:「目前就只係差你一個姐」
「嘿...雖然你咁講，但係，我根本無得揀」
叢雲問:「咁，幫你地做呢一單生意，有咩報酬」
「一億港幣現鈔，而且我地將會繼續幫你隱瞞你地既住址」
「加多一樣」
叢雲緊握阿白:「我要阿白，跟住我一齊返香港」
「我唔會掉低佢一個」
「叢雲....」阿白微笑道:「我都唔會，離開你」
「無問題，反正我地都正打算安排白小姐去最近既IID分部接受保護，依家有你睇住仲好」
阿孝笑道:「無問題既話，你地就執齊個人物品啦，我同發叔響門口等你地」
「嗯...」
阿孝兩人離開後，大宅只剩下叢雲同阿白
「叢雲...」
阿白攬住叢雲:「我好驚...我好驚你今次又有危險呀...」
「...放心，今次我都會平安無事，因為...」
叢雲低頭，跟阿白對望:「我仲要同阿白你過下半生」
「....叢雲呀...總之」
阿白吻上叢雲既嘴唇上:「今次...都一定要平安無事」
「嗯，我應承你」