一次意外，我的人生可以重新來過？: 第一百三十五章 【最終章．上】

第一百三十五章   最終章．上
 
「嘎嘎…」我望著目標不停沖刺著，眼中只有遠處的球門。
 
「傳波呀彥！」浩文在前方叫喚著我。
 
但我完全無視浩文的指示，輕輕一扣然後一個轉身，騙過對方的左後衛，右腳一射，把球射到球門遠柱入網。
 
我大口大口的喘著氣，這時球場的燈都關上了，兩隊人各自離開球場，浩文走過來搭著我的膊頭，把我引到場邊。
 


「搞咩咁唔冷靜呀？」浩文把能量飲品交到我的手上。
 
「咩咁唔冷靜？」我把手上的飲品一喝而盡。「我無野呀。」
 
「無野？平時你係我地既中場發電機，你今日搞咩完全無哂理智，一味只諗住攻門？叫你傳你又唔傳，下下都射。」浩文說。「唔好呃我啦，你答我啦兄弟。」
 
「唉，我好煩惱，唔知自己想點。」我苦笑著說。「你有無試過面對住一個你點樣選擇你都知自己會後悔既決定？」
 
「人有邊一次唔係會面對住進退兩難的局面嫁，如果人可以每一次都好輕鬆面對既話，咁做人有咩意思？」浩文站了起來。「你踢波射十二碼每一次都要決定射左邊定射右邊嫁啦，但你射之前你都會分析射邊度大機會入D，怒射定cur個波會收得死個龍門。」
 


「正如你做人一樣，可能你面對個問題時會困擾住你，你應該等一等深呼吸，好好諗清楚應該點做，點樣做先係最好。同埋你都大個嫁啦，記得要對得住自己。射十二碼既永遠只有一個人，無論人地比咩建議你，最後決定點射既都係你自己，你加油啦兄弟。」
 
「嗯….」我若有所思的在想著浩文所說的說話。
 
「不過愛情既話，我可以講多少少，等你好好諗清楚。」浩文點起煙說。
 
「食少支煙啦仆街，小薰唔鐘意嫁。」我揮一揮手白煙。「你講啦。」
 
「一句講哂，無論發生咩事，無論你幾愛個個人，你要好好諗清楚佢可唔可以做每一件事都撐住你，佢可唔可以有咩都同你一齊分享一齊解決。如果唔得既，請你搵一個一心一意愛你，緊張你多過佢自己既人，因為只有呢種人你先可以同佢安定過下半世。」
 


「愛同鐘意係兩回事。我鐘意一個女仔，想見佢，想同佢係埋一齊係每一個人對自己鐘意既異性正常的反應，但你問心一句，你除左想咁之外，仲有無其他野個個人可以比到你？」
 
我沉默了起來，我知道浩文在說什麼。
 
「再講，你個頭先同人講你放低左，等人地出左國你就搵番以前個個，大佬唔洗講你一定對住Gloria講你愛佢，你口口聲聲話愛人自己就做埋D濕鳩野，你算點先？」浩文把煙頭掉左地上。
 
「記得對得住自己對得住人，唔好比自己後悔，更加唔應該負左一個愛你既人。」
 
「嗯…知道啦…我再考慮一下。」
 
也許浩文說的是真話，也許其實我早已經知道，但現實，真相，和自己的心永遠都是會相反的。我知道跟Gloria走左一起一定會幸福，但不知道為什麼我就是不甘心的想跟芷悠走左一起。
 
「行啦，番屋企啦。」浩文拖著剛剛來到的小薰離開球場。
 
我嘆了一口氣，靜靜的離開這個空無一人的地方，慢慢沿著小徑走回自己的家。本來吵吵鬧鬧的公園卻了無人煙，而我也好像發現了什麼不同的一樣。


 
步進電梯，拿出鎖匙，回到空無一人的家裡，不知道為什麼我好像有點不習慣。
 
望著廚房裡頭一張又一張黃色的字條在雪櫃上，我終於知道離開球場到現在我心裡為何隱約有點異樣和不安的感覺。
 
「加油呀小彥！過佢呀！」在場邊為我立喊打氣的她。
 
「你有無事呀？搞錯呀踢波定踢人呀？」
面對敵隊重量級球員的飛踢，在我受傷後力挺而出的她在向他質問中。
 
「今晚月光好靚呀！」
某天比賽後，她與我牽著手在公園裡走著，看到月下的景色在大叫著。
 
「喂呀，污糟貓，你快D沖完涼先好上床呀！」
她在廚房對著正欲躺在床上的我說。


 
原來她早已無聲無色的走進我的世界，走進我的眼睛，我的視線，我的心裡面，儘管我的世界還有另一個她的存在，但卻早已比不上她了。
 
我知道我應該如何選擇了。