夢醒時份: 第十一章

長洲 -- 「冰，好大個平安包呀，好得意。」

馬灣 -- 「冰，草地上呢個日期係我地嘅紀念日子。」

赤柱 -- 「冰，好多謝有你陪我行沙灘。」

南丫島 -- 「冰，呢個豆腐花好滑呀。」

大澳 -- 「冰，炭燒雞蛋仔好好味。」





「今年我地去邊好呀？」

「不如去台灣啦？」

「好野！有得同冰你坐飛機。」

「不如兩日係台北，兩日去浸溫泉，好嗎？」

「好呀好呀！同你一齊做咩都好開心。」沙又再俟係我身邊。





鼎泰豐，度小月，師大夜市。每一個地方都好溫暖好幸福，係因為身邊有著一個帶俾我溫暖幸福嘅沙。

這一天，外面下著雨，但我地仍然去左十分之路，走上那條放天燈嘅舊火車軌道。

沙好專心地係個天燈寫上佢每一個心願。

「冰，你過黎一齊寫啦。」沙嚷著拎著雨傘嘅我。

「唔啦。我寫字唔好睇，你幫我寫埋啦。」





沙寫滿好多約定以及關於我地兩個嘅願望，然後我地一齊點燈放上暫時為我地停左落雨嘅天空。

呢一日，唔知點解我好攰，可能走左一條好長嘅路，好少出聲，好想合上雙眼休息。

「冰，你係咪唔開心呀？唔好意思呀，要你今日陪我一直行咁耐。」沙帶著歉意道。

「無呀！係有D 攰姐。我地快D 返去食飯先啦。」

呢一刻，我地大家意識到沙鍾意去唔同景點去睇，無論幾遠幾早要行幾多路都要去晒咁多景點；至於我想旅遊放假休息下，工作每一日已經好忙碌，假期唔想都有密密滿佈嘅行程。

不過，我唔會埋怨，總之沙想做嘅野我都會盡量配合。

而且，行埋今日，我地聽日就會去淡水享受溫泉，唔會再有太多景點要行。真正享受假期嘅休息。

回到八方美學商旅，因為每日都會有兩杯飲品送俾住客，所以返到去我地兩個都係酒吧旁坐低叫兩杯飲品。





每晚大堂都會有活動，而今晚就係社交舞班，看見一班上左年紀嘅叔叔阿姨係度跳舞，好輕鬆好開心。

「冰，如果我地將來都可以好似佢地咁就好。工作忙碌完享受二人世界，簡簡單單咁過幾幸福。」

「我都想，如果做得晒工作嘅話。台灣嘅生活比香港輕鬆好多。」

望著一對對老情侶，我地心裡都充滿羨慕同妒忌嘅心情。

我同沙會有這樣嘅一日嗎？

<續>