夢醒時份: 第三章

打開飯盒，已經變凍左嘅火腩飯，一邊食飯亦不忘聽住「扑得快」滾動嘅音樂。

「為何當　記憶碎掉  猶如歷盡滄桑及風雨」

我係度諗人好奇怪，點解我突然會對沙同個夢產生好奇，前日嘅夢同今日發生嘅事可能只係巧合。

俾著以前嘅我應該會好簡單咁抹走左呢段無必要嘅記憶瑣事，但今次卻好想走返入個夢去搵個究竟。

或者係我想從寂寞中找出一絲溫暖？定或係我心中有一些幻想，借今次個巧合幫自己找個藉口？





其實我自己亦唔係好清楚，不過呢種好矛盾嘅心情根本令自己訓唔著。

迷迷糊糊地好似又見到沙，今次佢唔係著尋日個套黑色西裝，而係簡單嘅白色裇衫同黑色長褲。

佢慢慢行近，走到我旁邊輕輕係我耳邊叫了一聲：「Lunch 就完啦，好起身洗個面做野啦。」

我先驚醒原來自己已經返左公司，但對自己訓著之前嘅事已經唔記得。

洗完面走去問沙：「我係咪訓左好耐？可能我尋日OT 太攰，我今朝係咪好神不守舍？」





沙笑著答：「今朝你一返黎就埋頭做野，連早餐都唔食。我地見你咁忙，lunch 幫你落返照舊嘅飯盒擺左係你旁邊，你都未食就伏低訓著左啦。不過我地明嘅，你尋日咁辛苦肯定休息唔夠，你而家好似精神返D 啦。」

「唔好意思呀，真係可能太攰，而家精神返啦，多謝你地！」我羞愧地回答。

我慢慢回憶返自己尋晚訓唔著，今朝一返黎就做埋尋晚D 手尾，做做下見到lunch time 到左就想抖陣點知一訓就訓左成個lunch。

就係差唔多放工嘅時候，經理行出黎同我地講，黎緊有幾個項目要你地兩個一組一組去拍住做，我已經幫你地分好組，黎緊呢幾個月你地都要多D 交流同有問題要提出，有咩問題就放工入黎搵我啦。

同事們不停係度討論究竟自己會同邊個一組，大家坐返去自己個電腦打開電郵。不知幸運定不幸，我同沙被編成一組。





不幸嘅意思係我要對住呢個女仔幾個月去做同一個project。雖然大家都識左一段時間，但始終互相交流嘅時間唔多，感覺總會有尷尬，尤其我自己本身慣左獨斷獨行，好少有拍擋一齊做野，就算有拍擋通常都係男仔。

幸運嘅係沙呢個女仔心地好好，好易相處，做野細心，爽快，整齊又有交帶。所以好多人都願意交俾佢做第二次覆核。

當我知道個分組之後行過去搵沙，問：「你會唔會好失望呀，要同我一組？」

沙錯愕地道：「吓！我以為你會唔想同我一組喎，我做野都無你咁快。我同邊個一組都無問題。」

我笑著道：「咁以後多多指教啦！」沙回應：「多多指教！」

呢一秒鐘開始，我同沙嘅關係愈走愈埋，而我嘅心卻一直都不再安寧。

<續>