《我竟然同左一個陌生男仔去歐遊...》: 《比利時篇- 布魯日 Bruges (3.1)》

我地行左去一個遠少少既地方，黎左一個風車花園（Molen），嗰陣冇發現原來呢度都係布魯日既景點之一，只係比較偏離古城區。喺荷蘭冇去到風車村，終於喺比利時如願。




 
「啱啱見到Josie洗唔洗咁怕醜啊，咁就走左去，好冇禮貌架。」


「唔係怕醜，費事阻住你地敘舊姐。」






「係就係啦。佢真係好靚女呀可？」


「呢個問題我唔會答，女人問呢啲咁既問題，九成九都係一個陷阱。」


「我先冇你諗得咁大機心。我呢個只係一個rhetorical question，即係一個唔需要答案既問題，我只係用黎強調佢好靚呢個重點，明唔明？」






「明白喇Miss，如果當年有你幫我補英文，我一定有5**，哈。」


「咁我答返你問題啦，你朋友又真係幾靚既，我覺得佢好似某個明星，雖然醒唔起係邊個，但比起你，都係仲差咁啲姐。」


Nick依舊以調戲的口吻，說出最能討得女孩歡心既句子，換著係之前既我，聽到後少不免會心花怒放，但此刻，我卻連一個笑容都要勉強地擠出。






心裏一直被壓抑住既情感，只會反過來吞噬自己，最後一無所剩。


「千祈唔好為左擦我鞋而講一個咁誇張既大話，Josie係我女神黎，就算你講真話，我都唔會妒忌佢，因為我打從心底地仰慕佢。」


「邊有人用仰慕黎形容朋友架？講到你好似暗戀佢咁。」


我隨便地敷衍了一下，就冇再講落去，反正佢唔會明白，我亦唔奢望佢明白。有些事情，我寧願永遠埋藏在心底。

***

由於同繁雜既市集廣場有一段距離，見到既遊客數量亦漸漸減少，整個風車公園顯得格外安靜，喜歡沉思既人，黎到呢度，必定會享受呢一片與世無爭既土地。







經常進入放空狀態既我，望住風車既葉片緩慢地轉動，緩慢得看到我走神。


直到Nick突然喺我耳邊呼叫一聲：「喂！唔好再發呆啦，比樣野你睇。」


佢拎出一朵粉紅色既花，同我講，係比利時好出名既杜鵑花。


「咁樣摘花，好冇公德心喎。」我只冷淡回應佢既一番好意。


「唔係我摘架，啱啱喺草地執到，我仲以為你會鍾意。」Nick既語氣充滿失望，大概喺估唔到我連一絲開心既感覺都冇。






「我記得我地識既第一日，你就已經送過一朵玫瑰花比我，同一樣既伎倆，用得多就唔特別架喇。」我滿懷慨歎的說。


「呢啲都唔係咩伎倆，只係我見你由行緊黎公園既時候，已經有啲悶悶不樂咁，咪想試下氹返你，但啱啱你撞到朋友唔係應該開心架咩？」


「梗係開心，見到我女神喎。你諗多左姐。」


我接過佢手中既花，但花瓣隨即已掉落數片。


猶記得第一次收花既瞬間，我覺得嗰刻就好似一段言情小說裏既老掉牙情節；而呢一次，我終於撇除幻想，返回現實，百般滋味在心頭。





***

黃昏時分走回到Hostel，要從儲物室拎返我地既行李，因為早上離開前，就已經交還房間鑰匙，完成check-out手續，就將行李寄存於此。

臨行前，趁著Happy Hour時間還未過，我飲左最後一次既比利時啤酒，縱然呢種程度既酒精並不能將我灌醉，但我希望，至少能增加我既膽量，即使效用微不足道。

因為我需要莫大既勇氣，先可以預備面對我一直逃避緊既現實。

幸好Bruges有巴士可以直達Charleroi機場，不用再經過Brussels轉折，行程頓時變得順暢。

大約兩小時後，我地再一次踏入同一個機場，保安依然咁嚴密，人群依然咁擁擠。

雖然淩晨時分冇任何航班出發，但當時機場內已經有唔少人靜靜等候，大概都係同我地一樣，生怕趕不及早上六點的航班。





嗰一晚，我地正式「無家可歸」，為左唔好再次錯過航班，要喺機場渡過整個晚上。

而喺呢個漫漫長夜，沒有一分鐘被浪費掉。