《我竟然同左一個陌生男仔去歐遊...》: 《比利時篇- 布魯日 Bruges (1.4)》

有一個朋友同我講過，要知道貼近事實既真相，就一定要冷不防地作一個「當面對質」，唔可以打電話，傳訊息等等，咁先可以殺對方一個措手不及。

我直直地望進Ｎick既眼睛，但佢既眼神並冇我想像中咁閃縮。佢臉上產生微妙既表情變化，卻看不出端倪。

喺任何場合同情況下，佢都保持到一貫既冷靜。

換著係我，即使做人處事清清白白，都應該會被呢個突如其來既問題嚇得心虛起來。

「You Got Me.」佢舉起雙手，做出《Breaking Bad》入面一個經典鏡頭。





呢一套美劇係我地其中一個共同話題，每次提起劇裏面某啲對白我都會好有共鳴。

「你當自己係Walter White咩，我依家好認真，唔係講緊電視劇。」


「我知你好認真，但係我好怕見到咁認真既你。」

的確，我心裏面仍然有一道保護牆，我仲未有勇氣向佢展示我既另一面。

大部分時間，為左應付唔同既人，適應唔同既環境，我都要帶著面具做人，掩飾我真實既性格。咁樣做人或者會好攰，但習慣成自然，慢慢都冇乜感覺。





就算幾鍾意一個人都好，我無法完全相信另一個人，我相信既只有自己。

我唔諗住轉彎抹角，就直入正題：

「其實喺五漁村張postcard，你根本唔係寄返比自己，係咪？」

Nick稍微深呼吸左一下：「咁都比你發現左，張postcard係寄比我ex。」

未等得切我既回應，佢就繼續解釋落去：






「嗰陣我冇心瞞住你，只係一時懶得解釋，對唔住。」


「冇必要道歉啊，區區一張明信片，你又冇對唔住我。」


「係因為佢真係好中意五漁村，所以…」


「我問你，都只係八卦下姐。」我打斷左佢既說話。「你都唔好咁認真。」


「In return，我都講過一個大話。其實我係偷偷地stalk你instagram，唔小心like左你個post，先呃你話我係特登睇下你留唔留意到。」






「哦，就咁咋？好明顯啦，你唔講我都知。」


我嘗試避免氣氛再繃緊下去，所以故作輕鬆咁講：


「我未講完，嗰日我仲stalk埋你ex，因為我見到佢既留言。Karina吖嘛，同張postcard上面個名一樣。」


每一次呢個名閃過我腦海，我都會諗返起佢真摯地望著我，但叫我Karina嗰一幕，好揪心，而且仲要係由我口中講出黎。


「不如你去做FBI啦，咁你都搵到。」Nick既語調始終不變，我捉摸唔到佢既潛在反應。






「你係咪介意我偷偷地咁stalk你啲野啊？」


佢沉默數秒。


「唔係你既問題，只係我自己一直都迴避緊講關於佢既事。」


「你係咪仲好鍾意佢？」


我差少少就問出口，不過我諗我心入面已經有個答案。






「做人要勇敢面對過去啊，逃避係冇用架，知唔知？」


我都唔知道我哪來的自信去訓導佢，明明我先至係最逃避現實嗰一個。


「多謝你。」


「嗯？」我唔明白佢嗰句多謝係咩意思。


「你一講完，我好似諗通左少少。」






「唔好玩啦，我講既野有咁大威力就好。」我苦笑一聲。


我暗地裏對自己講，一直以良朋既身份喺佢身邊，或者先係最好。