《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (6.3)》

我地踩一整天單車所消耗既卡路里，可能都敵唔過岩岩一份中size薯條加蛋黃醬既熱量，但垃圾食物總係容易令人感到滿足，仿佛越放縱自己就越能填補當下既空虛感。

試問有邊個唔開心既時候，會選擇去食沙律？我只需要一個簡單既理由令我覺得好過啲，即使只係暫時性。


「唔得喇…我地日日食埋啲咁唔健康既野，成個trip行幾多路都補唔返。」


「你咁瘦，食多啲啦，最多肥就一齊肥架姐。」






「男人同女人既體質咁唔同，量度標準既尺都唔一樣。平時我食肥少少又話我肚腩大左，瘦左又話我胸縮水，你知唔知做女人真係特別多野煩？」我不禁發起牢騷。


「做返自己咪得囉，邊個咁衰話你啊？」


「咪我之前個男朋友囉……呢啲咁既野梗係男人先講得出口。」






「咁你又唔好一竹篙打沉一船人，我一定唔會咁話女仔。你咁好，係佢唔識珍惜姐。」


佢既語氣卻不帶任何調情的感覺。


「好又有乜用？就係對佢太好先唔識珍惜。」我淡然地講，反正我已經冇再將佢放在心上。


通常我都要飲過幾杯酒，先會將我既感情事同人分享，但此刻我卻將Nick當成我既感情樹洞。






「同佢識左冇耐就一齊，兩年幾以黎，好天真咁以為只要一心一意對佢好，無風無浪，就一定會開花結果。後來先知，原來七年之癢根本唔需要整整七年，因為第三者隨時都會出現。唔…或者有第四五者添。但自己又盲目相信佢所有大話，我真係好蠢。」


Nick冇出到聲，我繼續講：


「如果見返佢，我只想同佢講，佢應該感謝我由始至終都係一個好人。」


雖然，做好人都要有個限度，好似我咁，做個爛好人就唔好。


「你都講得啱……確實對一個人太好既時候，就會變成一樣理所當然既事，自然就唔會去珍惜。」






「問你一個問題，你要誠實作答。」


我牢牢咁盯住佢，佢根本冇選擇既餘地。


「你啤到我咁實，我點敢呃你。」


「你有冇負過任何人？我指既，既感情方面。」

 
突然聽到我問呢啲咁認真既問題，Nick都不禁語塞。





其實唔出奇既，比著我，都應該要經過幾番思考先回答到。

越快衝口而出既答案，就越冇可信性。

就好似以下既情況：


「你愛唔愛我啊bb？」 


0.03秒後：


「愛，梗係愛」






好聽啲，就係佢唔需要諗都知道佢愛你。

難聽啲，就係呢個只係一個公式化既答案，根本唔值得佢花時間諗。

同一句句子，講既語氣可以有千百種，但真正既內心戲只有一段。

×

我地當時企左喺一條運河既欄杆旁邊，Nick 將目光放遠，故作有深度咁望住河既對岸。


「我一生負過好多人，尤其是我父母。但我選擇相信，我喺感情上冇負過任何人。」






「選擇？呢啲野可以選擇既咩？有就有，冇就冇架啦。」我帶點激動的說。


可能係啱啱諗返起以前係點樣比人傷害，所以聽到呢種模棱兩可既答案，特別敏感。


「我同我上一個女朋友都係大家既初戀，一齊左四年，最後無疾而終。我之後試過去諗分手既因由，但我心知大家都有付出過就夠。所以我先話，我選擇相信我冇負過佢。」


雖然有意無意中，我一早既連佢EX個名都知道埋，嗰種要壓抑住自己扮乜都唔知既感覺原來都幾難頂。


我問佢呢個問題，並唔係專登要試探佢啲咩，只係咁啱提起感情事，觸動到我既好奇心。估唔到佢會對我咁坦白，但同時暗地裏又好似隱瞞住啲某啲野。


「多謝你咁誠實既回答，我仲以為你會敷衍我。」


「我邊敢敷衍你，咁樣既話我就真係負左你架喇。」


「唔緊要，你負我既話，我會打返你幾拳，負負得正丫嘛。」


我轉過頭望住Nick，目光停留喺佢左邊臉上深深既酒窩，亦係其中一個佢最吸引到我既地方。

我地居然由一開始討論垃圾食物，到最後變成互相既內心剖白，原來只要搵到啱既人，話題係唔會有限制性。

但始終我心入面，對佢仲存有太多疑問。