《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (5.1)》

我發左一個夢。

夢入面既我去左一個不知名地方，然後被一班我唔識既人追捕，我拼命想逃脫，但最後都係被擒獲。我見到我媽媽，佢同我一樣，都被人捆綁住。我好想上前救佢，佢亦都想救我，但我地既四肢都被繩索勒緊，無法彈動。

我地大家都想幫大家，但奈何乜野都做唔到，只能白白睇住對方受苦，多麼可悲。

痛苦既回憶最容易令人不能自拔，我琴晚仿佛重活了一次。

.
.




.

「Jess…Jess…成十點幾喇，你醒未？」


Nick既聲音將我從噩夢中扯回現實。


我下意識地摸一摸自己既臉，發現有眼淚既痕跡，夢入面既我究竟喊得有幾淒厲…






「唔…我仲有少少頭暈，但好返好多。」


「我啱啱落樓下煲左熱水，飲左佢先。」


說罷佢就將一杯溫熱既水遞到我面前。






「樓下…咁你咪見到個host？佢有冇投訴我地琴晚開門開到好嘈？」


「我有見到佢啊，本身諗住主動同佢say sorry，但原來佢話琴晚同屋企人出左佢，到今朝先返黎。」


「咁都好啲…唔係既話我地應該會比佢趕出去… 」我鬆左一口氣。


「唔好講呢啲住先啦…你今日洗唔洗抖下？」


「都話訓一教就好返咯。同埋我地今日唔係去踩單車咩？」






「你咁既狀態去踩單車，我驚你跌落條河咋。」佢一臉認真。


「我話okay就okay啦。」我開始覺得不耐煩，雖然我知道佢只係出於關心。


「咁我返去我間房換衫先喇，你搞掂就敲我門啦。」


「喂… 」我叫停左佢。


「做咩？」






「琴晚唔該曬你睇住我，唔係既話我早就被架貨車撞到，客死異鄉。」


我故意迴避提及之後發生既事。


「有咁既事咩？我好似都冇乜印象，不過你冇事就得。」


Nick走出我房間，就好似真係乜都冇發生過咁。

我有一刻懷疑，唔通所有野都係我既幻覺？但係我仍然感受到佢身體既溫存，而呢種感覺係冇辦法憑空想像出黎。

或者對於Nick黎講，只係一段無意義既記憶，所以腦海自動將佢刪走。只剩下我一個留戀呢一切。





我冇同佢講，其實起左身之後我仲係覺得呆呆滯滯，集中唔到精神， 但我深信我一定會好快恢復返正常，所以唔打算旅行既時候掃大家興。

我攤喺張床唔想郁，連刷牙洗臉既心情都冇，反正我知道，Nick點都會等我，我一直都係被遷就嗰個。

拎起部手機，自然地就噤入左Instagram，唔知由幾時開始，訓教之前同起身之後做既第一件事都係望住部智能手機。

我突然諗起Nick琴日比過我睇佢既IG，我喺搜尋列輸入佢嗰個簡單易記既username，就搵到佢個profile，仍然都係嗰16張相。

我開始逐張順序開黎睇，想從呢啲零碎既照片中更加瞭解佢。

冇耐，我就碌到一張相，影住佢整齊既書臺同幾本教科書。

Caption: 

「你的壓力，源自你的不努力。」

Comment: 

「輕鬆啦。」


「幾時考完？一齊食飯。」


「Support you my bae (heart emoji) 」


第三個留言成功奪去我既注意力。

我明知咁樣代表住啲乜，但都係犯賤咁噤入留言者既Profile。

可惜佢Instagram係Private，我只能眯起眼睛嘗試喺個小圓圈入面望清楚佢個樣。

最吸睛既應該係佢淺紫色既頭髮，因為張相唔係自拍嗰類，所以五官好模糊不清。

Karina Yeung，我好快就望到佢個名。

我倏地想起，當日喺五漁村Nick寄出既明信片，收件人就係佢。