《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (4.4)》

我既心情由期望跌到絕望，我說服自己只係唔夠清醒，所以聽錯左，但我諗唔到”Karina”呢三個音節可以同乜字有相似之處。

Nick仍然注視著我，好似等緊一個回答。

但係我又可以回應佢啲咩呢？佢好明顯係認錯左我做第二個女仔，我直程覺得被羞辱。

「Nick….我…. 」

我都未講完，Nick就將我擁入懷中。





「雖然你真係好煩，但係我好掛住你。」

由佢既語氣同字面意思，我大概都估到佢口中既Karina，係佢前度。

我反應變得好遲鈍，我冇出聲，只由得佢攬實我，但我已經再冇任何幸福既感覺，只有一種好似藉著佢前度偷取佢溫暖既無力感。

原來連大麻都無法令我忘卻嗰種揪心既痛。

時間過得好慢好慢，眼前既景象仍然不斷轉變中，店鋪播緊既音樂喺我耳中更有層次感，每粒音符都極其分明。





雖然身體感到放鬆，但我心跳開始不停加速，去到一個點我覺得好辛苦，所以我拉住半清醒既Nick走出左Coffee Shop。

接下黎既事，喺我記憶裏消失左一大部分。唔知道係好事定壞事，嗰日帶左部好方便攜帶，大半個手掌咁大嗰種數碼相機，第二日醒返既時候，見到相機入面多左兩段我毫無印象既影片，一噤入去，我就清楚知道嗰晚我地離開Coffee Shop後發生既事。

我地既意識係叫緊我地行返去火車站搭車，但誤打誤撞去錯左唔同地方，最後幾經辛苦先行到去。

人地講得冇錯，呢啲野真係留返喺屋企做會冇咁危險，我地兩條友話就話會睇住對方又剩，點知到最後大家都被兩件蛋糕衝昏頭腦，喺街上隨意遊走。

我居然仲一直有興致拎住部數碼相機周圍影，雖然幾乎整個畫面都係不停地震動，但我依稀記得嗰陣喺火車站入面，我同Nick用剩餘既知覺搵去Harrlem既火車。





喺影片入面，我冇停過咁笑同講英文，Nick就只係望著我笑，睇落去活像兩個癮君子。

畫面轉到車站既月臺，諗返起都幾佩服自己，迷糊中居然都冇上錯車，但原來令我最難受既副作用，喺嗰刻先開始侵襲我整個身體。

因為我地都幾神志不清，自然就唔會有意識要去買票先上車，而車站到左深夜都無人看管，唔洗查票都可以直接通過閘門。

火車有兩層，我地喺呢種狀態下仲要冒住跌親頭既風險行樓梯去下層。

坐低左既我，依然仲拎住部相機，不過係將mon反過黎不斷對住自己影，貌似係整理緊儀容。個Footage我冇比過任何人睇，包括Nick，因為實在太不堪入目。

當連相機既電池都耗盡既時候，我就安分咁坐定定，而Nick已經閉起眼，甚是享受住大麻帶黎既快感。

至於我，我既腦海帶比我既再唔係輕飄飄既鬆弛感。

大麻其中一個最常見既副作用，就係心理上會開始係咁懷疑周邊既每一個人，對一件好微細既事都會好敏感。我成個人越黎越繃緊， 心知自己逃緊票，好驚好驚會比人捉到。





我心虛地望實每一個行落黎既人，即使佢地打扮平常，我都喺度諗佢地會唔會行過黎查票。

直到一個男人坐左喺我斜對面。佢由頭到腳就咁睇都只係一個普通人，但不安感卻油然而生，嗰種感覺並無由來，我腦海入面不停重複想像被佢逼害既畫面，我想像佢會同我地喺同一個站落，然後跟蹤我地，打劫我地，甚至更嚴重。

就算所有野都係我憑空想像出黎，但已經足以令我極度焦慮。我抱頭想冷靜自己，不過只係覺得越黎越難受。

掙扎中既我，依稀聽到列車到達Harrlem，我推一推迷迷糊糊既Nick，快手快腳咁叫佢落車。

我回頭一望，見到啱啱個男人冇跟住我地，先稍微放心少少。

出站後仲要行二十分鐘先到Airbnb，幸好路線並唔複雜，只係沿著運河既一條直路。不過嗰晚，我覺得條路好長，就好似一世都行唔完咁。

我開始產生一種幻覺，眼前既運河景象，漸漸幻化成我長大既城市，一幕幕回憶重演喺我面前，就好似重新經歷多次我既童年，佢地係我心目中最美好既回憶，我好想沉醉於嗰刻，就當我發緊一場充滿真實感既夢。





直至我聽到幾下刺耳既喇叭聲，將我從短暫既幻覺拉回現實。