《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (4.2)》

「你講笑咋？我地晏晝咪去過一間。」
 
「你嗰陣同冇食有乜分別？黎啦，我地喺Amsterdam唔係有好多時間咋。」
 
明明第一次係我三催四請佢先肯踏入Coffee Shop，依家我地竟然互調角色。
 
Nick見我冇出聲，再繼續講：「又係你話，黎到荷蘭非做不可既，你奉唔奉陪先？」佢完美地模仿返我當初講呢幾句既時候既語氣。
 
「但係我都唔識吸，試第二次都係一樣咋。」
 




「大麻唔一定要吸入既，直接食落肚都得。」
 
佢唔提起我都差啲唔記得，有Space Cake呢樣野。好耐之前比啲豬朋狗友問過我食唔食，但我嗰陣比較乖同怕事，覺得大麻係一樣一世都唔可以掂既野。
 
簡單啲黎講，Space Cake就係混入左大麻既蛋糕，亦都可以製Brownie（Pot Brownies）同Cookies既外型。
 


 
雖然帶黎既效果或多或少都係令你興奮，但一小塊蛋糕既強度隨時比你食完成支大麻煙更強勁，而價錢都唔平，我地去嗰間好似係八歐羅一件，比起3，4歐羅一支既pre-rolled joints貴左成倍。




 
起初有少少抗拒既原因，唔係因為唔敢，只係真係好攰。但係貪玩如我，自然唔會掃佢興，尤其是見到一個乖乖仔主動問你呢種事既時候，成件事既刺激度直線上升。
 
「睇黎你晏晝食完一次亢奮到依家喎，都未見過你咁有興致。」
 
「我嗰陣都驚驚地架，不過原來嗰種腦袋放空然後不受控制咁笑既感覺係咁神奇。」
 
「你千祈唔好變左一個道友……我真係即刻執包袱走。」
 
「你估咁容易咩？不過你點都要試下，我形容唔到比你聽。」




 
我地行去玻璃櫃面前，只有兩種選擇——Chocolate同Lemon Cake。
 
對我黎講佢地都冇乜分別，兩樣都有著可以令人忘卻當下既功效。
 
我帶著絲毫既懷疑比錢，究竟一件與普通蛋糕看起來無異既Spacecake，可以帶比我乜野快感？
 
我地將件Cake搣開一半，我食之前放近鼻聞一聞，一股濃烈既草味，雖然呢兩日都習慣左混雜係每一寸空氣既大麻味道，但食落肚，又係另一回事。
 
當Nick已經咬左一啖既時候，我仲係拎住件蛋糕，遲疑不定。
 
「乜你唔係好大膽既咩？區區一件Spacecake又點會難到你？」Nick似乎想學我用激將法。
 
「我喺度諗，如果我食完之後控制唔到自己既身體，會發生咩事。」
 




「唔洗驚，我會睇住你。」
 
「或者你要我照顧返你轉頭呢。」
 
隨即我都慢慢開始咀嚼呢件一定算唔上好食既蛋糕，每一啖都挑戰緊我既味蕾。
 
呢種edible marijuana通常都要半個鐘至一個鐘先開始起到效用，因每個人既新陳代謝而異。呢個亦都係佢比rolled joints更危險既主要原因。

因為好多人都會等到冇耐性，然後再繼續買黎食。
 
就好似我地咁，做左一個好錯既決定。