《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (2.3)》

「Nick，你覺得黎到荷蘭有咩係非做不可？」


「你郁下條眉我都知你諗緊咩，你肯定係想去前面間Coffee Shop…」


原來我啲動機咁易被識穿。

或者唔係個個都知道喺荷蘭，開到成行成市既”Coffee Shop”究竟係咩回事？





雖然叫Coffee Shop，但佢既格局同一般咖啡店都有幾大出入，擺放住五光十色既霓虹燈，睇落去似酒吧多啲。

裏面售賣既係軟性毒品（soft drugs）例如大麻同迷幻蘑菇（呢個好似已被禁止），仲有蛋糕添，不過係滲入左大麻既蛋糕。想飲真既咖啡，都係去返café啦。


「醒目喎，咁你奉唔奉陪先？」我戚起眉頭問。


起初Nick真係唔想入去，話喺出面等我，但我邊會由得佢咁？所以喺我盛情邀請下，佢始終都屈服左。






「其實我平時連煙都唔食架，我真係唔識呢啲野。」Nick竟然開始緊張起黎。


「我都知你係乖仔黎，但我夠唔食煙啦，大麻都未食過。你知唔知煙比起大麻傷害身體既程度更嚴重呀？反正合法，一齊試下啦。」我既語氣就好似一個大麻推銷員咁。


「你呢啲鬼妹仔真係未試過大麻？難以置信喎。」






「太傷害身體既野我唔會做架，大麻係我極限，只係想試下嗰種感覺。Mushroom同hard drugs我一定唔會掂。」我嘗試幫自己建立返形象。


一間Coffee Shop既大麻品種可以多達五十幾種，雖然我身邊都有啲朋友食開，但我自己真係對呢樣野毫無研究，所以最尾隨便揀左一種pre-rolled joints，外型同普通香煙無異，都係直接點火吸食，價錢大約五歐羅一支。

我地搵到嗰近窗，面對街道既位坐，拎住啱啱買既大麻煙同打火機。

就咁坐左一陣，我地兩個都冇點火，原來連我都開始緊張。

Nick見到我不發一言，就主動拎起打火機點著佢面前既煙，再吸左一口。

我見佢咁突然做出呢一連串行為，都驚呆左下。


「又係你話要試既，做咩停曬手？拿，比你喇。」說罷佢就將煙遞比我。






「冇，估唔到你咁熟手姐，一開始仲扮曬緊張，唔講以為你係煙鏟。」


「唔係，平時見Roommate食得多，學佢啲姿勢姐。」


我將煙輕輕放到唇邊，聽聞食大麻要比較小心，唔可以用口水整濕支煙，但冇食開煙既我，唔識點樣吸入之餘，仲好容易被嗆親，然後不斷地咳，看起來甚是辛苦。

Nick將煙拎返佢指間中，再繼續吸左幾口，效果都幾顯然易見，因為冇幾耐，佢就開始望住我傻笑。

雖然之後我都有繼續嘗試吸食，但都係被嗰種苦澀既味道嗆到，所以最後成支煙燒盡，我都冇任何反應。
反觀一開始抗拒入黎既Nick，持續興奮左十分鐘左右，喺咁指住窗外面既人，期間仲講埋啲九唔搭八既野，先慢慢停落黎。






估唔到天不怕地不怕既我，第一次吸大麻竟然失敗而回，但係我望著Nick自high嗰樣，先發現原來佢都可以有呢一面，就好似見到另一個人咁，唔係平時所見既「Engine毒男」。

果然人不可貌相。

*

Nick恢復返正常狀態後，連佢自己都無法相信佢啱啱竟然會食大麻食high左。

「我啱啱喺度做緊啲咩…我淨係知道我係咁笑… 但又控制唔到自己。」佢慢慢回過神來。

「你咪就係咁笑囉，成個白癡仔咁，睇黎你都幾識食喎，哈哈」

其實我嗰陣偷影左佢，不過冇話到比佢知。





「我本身諗住敷衍下你陪你食咋…但點解你咩事都冇？」

「呢啲野就不要說了，因為我真係唔識食煙囉，邊似得你。」

雖然講出黎都唔好意思，但我都費事呃佢，唔通話我對呢啲濕碎野冇反應咩。

「不過呢，你咁樣就獻出你”第一次”，有冇啲唔甘心先？」

「梗係有，因為得我自己喺度傻笑，下次你都黎料先好玩架嘛。」

「哈，下次下次，下次大概可以。」