《我竟然同左一個陌生男仔去歐遊...》: 《荷蘭篇- 阿姆斯特丹 Amsterdam (1.2)》

是咁的，到依家我都覺得喺歐洲旅行，係會好令人羨慕住喺歐洲既人。一程火車，巴士，甚至自駕遊就可以帶你去到另一個國家。

一程來回羅湖同廣州既和諧號，已經差唔多等同我喺德國搭火車去荷蘭。用一個週末既時間，就可以輕鬆去一個截然不同既地方，呢個應該係我之前喺外國同香港都冇既經歷。

*

荷蘭，你聽到呢個名會諗起咩？我比較才疏學淺，黎之前連運河係咩一回事都唔清楚，思想亦比較前衛，所以初初對阿姆斯特丹既印象，就係空氣彌漫著一股大麻味道，最重要，係完全合法既。當然，仲有風車同鬱金香，不過喺市區並無咁隨處可見。

其實連中央火車站本身，已經係一個值得細心欣賞既建築物，典型既紅磚設計，散發住一股獨特既歐洲式氣派。





因為到達荷蘭既時間係差唔多夜晚九點，仲未來得及喺火車站以外其他地方慢慢遊覽，我地就先要去Airbnb。然後發現嗰度，根本唔喺阿姆斯特丹。

點解咁講？話說每當我地要訂票訂住宿，Nick都非常樂意一手包辦，可能係覺得我反正都冇乜主見，交比我搞只會令事情更糟糕，而我都基本上100%放心佢處理呢方面既事，但就算幾醒目既人，都會有出錯既一日。而呢日終於發生喺Nick身上。

佢book既Airbnb位於Harrlem，望住火車站既地圖，先發現原來Harrlem係另一個不同於阿姆斯特丹既城市，只係位置上比較接近，搭火車只要十五分鐘左右，所以當時佢並無去深入咁去Google呢個地方，只係見房租相對比較平就訂左。

唔知呢種算唔算得上中伏，但我對我地要去既方向極之迷茫，最後都係要請教工作人員先知道點樣去Harrlem（P.S.不得不讚佢地英文好好）。

拎住咁多行李喺夜晚時分擠逼既列車，總係有啲唔方便，我地差啲連車都落唔到，狼狽非常。





Harrlem係一個較靜既城市，所以出到火車站都只係見到小貓三四隻，而我地只能靠住Burger King既Free Wifi用Google Map去搵我地既目的地，一望原來要行成二十分鐘。

當然我由頭到尾都冇怪過Nick訂錯地方，講到尾都係自己懶先交曬比佢做，漸漸地其實都發現自己好多方面都依賴左佢。

而Nick作為一個平時對自己做事好有信心既人，犯下呢啲愚蠢錯誤，佢當然都非常抱歉，係咁要求要幫我拎行李，但到依刻我諗你地都知，如非必要，我並唔中意其他人喺體能方面協助我，冇辦法啦，死硬頸。

比較感到欣慰既係，即使要行，沿途睇到既風景，足以令我覺得不枉此行。嗰陣亦都係我第一次親眼睇到荷蘭既運河，而運河旁邊就係一間間既咖啡色小屋，係之前喺意法德都冇見過既風景。

Nick一邊行一邊同我講運河既構造，歷史，用途等等，就好似佢既工程職業病發作一樣，不過我一啲都唔嫌悶，反而好欣賞佢博學多才既一面。
 






印象中間Airbnb都有少少難搵，雖然荷蘭住宅區既設計都係一排排整齊既屋仔，但一間屋可能有分A,B,C Unit等等，所以要好仔細咁睇清楚unit number先好拍門。

出黎迎接我地既，係一個冇咩笑容既中年女人，唔知係咪我地比預期中遲左到，佢竟然有少少黑面，總之唔係好似之前啲host會對你態度和善。

即使入到屋後，佢只係機械化咁介紹一下有邊啲地方我地可以用，非常之多限制，不過都係喺度留2－3晚，我地就隨便了。

最印象深刻既，應該係我地用左差唔多十分鐘，只係為左學開佢個大門，我都唔識解釋，總之個門好難關上同開，喺我眼中根本唔配做一道門，而呢樣野困擾左我地好耐，有次差啲令我地入險境，呢件事遲啲會講。

我地上到二樓既房間後，仲聽到佢同佢老公同仔既爭吵聲音，真係夠曬民宿既體驗。

「呢間應該係你咁耐以黎最正確既選擇…我已經有想走既衝動。」我入房前，望一望喺對面房已經訓左喺床既Nick，一臉失望。






「哈哈，唔好怨我啦，又唔係要你住一世。」


「我冇啊…只係有種不安感。」


「訓醒教就包你咩事都冇，聽日我地一早出去啦，好多地方想去。晚安啦，傻妹。」


佢總係咁自然地叫我。