《我竟然同左一個陌生男仔去歐遊...》: 《意大利篇- 五漁村 Cinque Terre (1.2)》
承接上文，我地究竟如何中伏？
因為我地太傻太天真，以為嗰一段山路可以二十分鐘完成，所以我地開左個頭，先慢慢發現唔對路。
頭15分鐘都係平路，尚算舒適，不過好快就越行越斜，到再睇到第二個指示牌時，先發現原來前方計埋落山有成差不多五十分鐘路程，咁一定係我地一開始已經睇錯個時間。
但既然已經行到黎呢度，我地係唔會甘心走返回頭路，所以就做左歐遊既第一次運動——行山。
行山對我黎講，本身不成問題，問題在於我當日既裝束，係為影相而設，除左一雙波鞋外，完全唔識合登山。
死要面子既我，覺得自己講得出要做得到，無視左Nick既好心提議，堅持繼續行。
正午既五漁村，陽光非常猛烈，如果唔係出發前已經搽夠高強度防曬，應該成身被燒傷也不足為奇。要不然，Nick既百寶背囊大概都裝備齊全。
當我地開始行上山路大概五分鐘，聽到遠處傳來一聲「CIAO!!!! 」，而呢聲Ciao並無間斷過，叫喊者連續再嗌多幾次，回音喺山腰間徘徊。
但我地並無特別理會，繼續往前行，反正咁遠都唔會係同我地打緊招呼架啦。
幾聲大叫後，叫喊者突然轉頻道，大叫「HELLO! 」,我地終於忍唔住回頭望，睇下係咪有咩事發生。
甫轉身，有輕微近視既我都見到原來喺山對岸既一間小屋，真係有個人同緊我地招手講野，不過並唔係打招呼咁簡單。
*
我朦朦朧朧中見到佢好似用手指向我地行緊既另一個方向，再大叫：「LEFT!! 」
原來佢咁歇斯底里地一直大嗌，只係為左提醒我地行錯路。我地望一望周圍，又真係有個好細好細既方向指示牌，細到我地兩個都忽略左。
好彩最終都係選擇回頭望，我同Nick亦向住佢大叫：「Grazie!!! 」，成個畫面充滿喜劇感。
由於天氣非常酷熱，我地每行一陣就要停低補充下水分，今日我都醒目，再冇帶我嗰個裝唔到啲咩既Longchamp 袋，換返個細細地但五臟俱全既背囊仔，大概係被Nick既性格所感染。
講返段山路，其實絕對唔係好似行龍脊嗰啲遠足徑咁輕鬆，有部分位都要靠手扶住旁邊既大石支撐住。不過一路上去其實除左我地兩個之外，見唔到有其他人，行左差唔多半個鐘，到左個小山頭，先見到有一兩個人影喺另一邊山行緊過黎。
見到終於有人，就知道我地冇再次行錯路，都半鬆一口氣。我地走過去其中一個人問下大概仲有幾耐先行到另一個村，佢話唔遠，大概20 分鐘，不過落山既路偏斜，叫我地要小心。
烈日當空，辛苦咁爬上黎山頭，總有佢值得既地方，而我地既reward，就係可以由高處望落去下面一個個排滿小屋既山丘，將怡人既風景飽覽無遺，盡收眼底。
抖左一下，我地就繼續順住山路開始落山，佢地講得冇錯，路面確實好斜好危險，加上我一身唔識合運動既裝束，行起黎自然要步步為營。
幾乎全程，阿Nick都好睇實我，係咁小心翼翼地拉住我隻手行，好似驚死我會仆親咁。
「其實我著唔岩衫姐，我係行山健將黎架。」愛面子既我有啲唔甘心。
「呢啲野小心為上啊，雖然識得你唔耐但都知你係啲中意逞強既人。我唔想你整親。」佢再補充多句：「整親咪又係要我揹返你，我都唔知揹唔揹得起你。」
本來聽到佢嗰句「我唔想你整親」覺得有啲開心，但我聽到佢第二句之後細細力咁打左Nick一下。
「原來你係咁樣對待你救命恩人既。」
廢話唔多講，轉眼就已經見到下一條村Manarola漸漸出現喺我地眼前。
就咁睇，呢度同第一村並無太大分別。
我有時睇返啲相，都唔知五個村邊個打邊個，鎮中心既結構大致相同，都係有一條大街，兩旁就係唔同色調既建築物同店鋪，最多半個鐘都可以行完，只不過Manarola多左啲船仔泊到周圍都係。
我諗唯一可以分辨佢地既方法，就係要行到海灣，因為每個村既特別之處，就係每次喺海灣見到既景都唔同。
尤其以Manarola既景色最受遊客所愛。
即使只係我毫無技巧地隨手一拍，都可以拍出近似明信片既感覺，真係好似一幅畫活生生出現喺我面前咁。
炎炎夏日，我見到好多人都脫去上衣，直接跳入大海中暢泳一番，若果嗰時我地有帶泳衣，大概都會好似佢地咁，盡情享受意大利既陽光與海灘。
逗留左一段時間，行程有啲匆忙既我地又要開始進發去剩餘既三個漁村，不過今次為左唔再中伏，都係寧願比返少少車錢去搭火車算。喺買飛既遊客中心內，吸引我目光既各式各樣既明信片，其實一直有寄明信片比自己既習慣，所以喺呢個咁靚既地方，當然唔會係例外。
同我相反，Nick對一切紀念品都好似不大興趣，連明信片都未見過佢寄一封，但佢今次居然破例，跟住我一齊揀左張Manarola既明信片。
「咦，好似都係第一次見你寄postcard喎，邊個咁好彩啊？」我不禁好奇地問。
「冇，學你寄比自己姐。」
我地埋頭寫地址時，我偷瞄左Nick張postcard一下，隱約中，好似見到收信人，並唔係佢既名。
而係一個”K”字開頭既名。