《我竟然同左一個陌生男仔去歐遊...》: 《意大利篇- 佛羅倫斯 Firenze (5.2)》

呢個廣場本身就冇乜特別，只係中央位置擺放左米開朗基羅既《大衛像》，不過都係複製品，另一個我地之前已經係市政廳前見過。

佛羅倫斯有三個大衛像，兩個膺品，一個真品，究竟係有幾鍾愛同一個雕像先可以做到呢個程度？依家諗返起先醒起我地始終冇入到去某某美術館睇真正既大衛像。

黎到呢度，當然又要loop返衝上雲霄入面既情節，唔知Sam哥當時坐緊既咖啡廳，又係唔係我眼前見到嗰個呢？

喺我心目中，佛羅倫斯比譽為City of Love既巴黎更來得浪漫，係呢個廣場可以俯瞰幾乎整個佛羅倫斯，係中午三四點刺眼既陽光底下，圍繞住聖母百花大教堂同周邊建築物既棗紅色調顯得更加壯麗，呢度一定係最適合欣賞呢個城市既地方，沒有之一。


晏晝呢個時間都尚算早，始終大部分人都係睇日落，所以嗰陣並無擠逼既感覺。






廣場周邊除左咖啡廳之外，仲有一啲賣明信片，畫作，同小食既小攤檔。


唔知係因為啱啱行左段山路熱得濟，定係純粹口痕，我見到其中一間有啤酒賣，竟然被吸引過去。


「你唔係口渴成咁啊？呢度賣咁貴一支你都肯比。我有帶成Litre既水喎，不如飲水好冇？」






Nick見我受唔住誘惑，竟然走去買左一支貴到我都唔記得幾錢既Corona。


「哈，你唔明架喇，喺呢啲環境要隊啤酒先有氣氛架嘛。」


說罷我就即刻灌左好幾大啖酒，姿勢確實非常豪邁，大叫一聲：「爽！」






「原來係一個酒鬼… 」Nick見到我飲酒飲到成個麻甩佬咁，相當無言。


由於呢度景色實在太靚既關係，平時唔多影相既Nick都開始影起相黎。

而我為左練習我既攝影技巧，當然東奔西跑咁去搵唔同既角度，不過無論喺邊個角度影，呢個景都冇得輸。

我地學其他人一樣，半躺係臺階上，享受呢刻既慢活生活態度。

我望左下係我隔離既Nick，佢雙手放頭後面，閉著眼訓低。

對我黎講，唯一比陽光更刺眼既，應該只有一對又一對情侶既閃光彈。其實都啱既，咁浪漫既地方，自然多情侶黎。

「你話呢度咁多一男一女既組合，會唔會只有我地唔係情侶呢？」我問Nick。





「可能係架，咁咪幾好，我地夠曬特別。」

特別在於啲咩呢？我地Platonic既旅伴關係？我諗。

Nick答我嗰陣，我地既目光唔小心對上左，而我地亦忽然變得沉默。喺周遭環境既催谷下，即使我地將嘴唇都對上，大概亦唔會顯得奇怪。

不過我地冇。

我只係好快咁迴避左佢既目光。


「下次黎嗰陣，希望你係同女朋友黎啦，喺度求婚既話，我諗冇邊個女人會say no。」我笑說。


「唔係，佢唔會中意我咁public同佢求婚。」Nick口快快咁答我。






佢？即係Nick真係有女朋友？


佢好似到察覺到我有少少驚訝，即刻補鑊：「我指我ex。」


「哦…. 」我都唔知我可以答佢啲咩，亦無追問下去。

*

我地整個下午都留左喺呢個廣場，計埋夜晚，可能都有成五個鐘。

不過人在歐洲，都要抱住唔同既生活態度，即使我地只係坐喺梯間傾計，飲酒，影相，呢五個鐘過得好快，但喺我地兩個既世界入面，時間就好似永遠停留喺呢幾個鐘咁。




 
佛羅倫斯接近傍晚時更是熱鬧，樓梯間，圍欄上都坐滿左等住觀賞日落同夜景既人。

萬家燈火喺呢座棕黃色調既城市綿延到呢邊既山丘，已經分唔出燈光同星火。



因為我地一早已經上到黎，我地好容易就霸到靚位。如果真係臨近日落時分先到，上到黎只可以左逼右逼咁搵位影相。

既然有呢個大好機會，我地兩個當然瘋狂地將眼前美輪美奐既夜景收入鏡頭下，我諗Nick都慢慢比我影響到，開始由用眼睛去旅行，變成好似我咁用鏡頭去旅行，哈哈。

呢個時候，有個人拍一拍我膊頭，我擰轉面，係一個偏東方面孔但輪廓好深，貌似混血兒既一個女仔，總之好靚。

佢問我可唔可以幫佢同男朋友喺圍欄邊影一張有大教堂做背景既合照，我當然非常樂意。每當有人要求我幫佢地影相既時候，雖然唔係咩義務，但我都會加倍認真。





將心比己，如果換轉頭人地幫你影相，但只係隨便咁影完就算，你都會無癮啦，係咪？

雖然上述情況喺我身上從未間斷過咁發生，我諗如果真係一個人去旅行既話，最麻煩大概就係留影呢件事，好彩經過我既”悉心栽培”，Nick既技術都唔算好差。

大概幫混血兒美女影左10幅相之後，佢就拎返部相機，睇佢望返啲想既表情，應該幾滿意吧，我都不禁沾沾自喜。

之後佢就問我同Nick要唔要幫我地影返幅in return，可能我地又被人誤會為情侶吧。盛情難卻，我地就擺好pose準備影，喺按下快門既前一秒，Nick將佢手臂圍喺我身邊。

我地既第一張合照就係咁樣誕生左，照片中既兩人，都笑得非常燦爛。呢一刻，我將我地代入左Sam哥同Belle既角色。