《我竟然同左一個陌生男仔去歐遊...》: 《意大利篇- 佛羅倫斯 Firenze (4.2)》

我叫停左一直向前行緊既Nick，慢慢沿着琴聲既方向走過去。

一個帶住紳士帽，白色西裝既男人彈緊電子琴，個旋律帶比我一種好熟悉既感覺，我仔細聽，原來係Lilium既純音樂版本。對上一次聽，已經係幾年前既事。

唔知大家有冇聽過一套叫《妖精的旋律》既動漫？因為過於暴力同血腥既關係，喺日本好多電視臺都禁播左呢套動漫。我都唔記得點解我細細個會開左呢套黎睇，嗰陣既我當然唔明佢既深層意思，但我對佢拉丁文既主題曲有非常深既印象。

段琴聲不斷喺我耳邊游走，我忍唔住行過去個男人面前：


“May I ask you a question?”






“For sure, go ahead.”佢禮貌咁回應我。


“How do you know this song?”


“It's the theme song from an anime called Elfen Lied, have you heard of it?”






“Yea, it's one of my favourite anime, and the song is truly beautiful.’


“I agree.”

同好多人一樣，平時對街頭藝人我都係就咁睇就算，今次竟然喺歐洲街頭聽到呢首歌，點都要支持下佢，我擺低左張紙幣，佢對我報以微笑，話會彈多次比我聽。

「睇黎你好中意呢首歌喎，好似都係第一次見你咁專心咁聽。」Nick望住喺度呆站既我。





「嗯，呢首歌對我黎講有好特別既意義。我咪講過影相對我黎講，係因為睇返啲相可以回憶返當時既感受。而聽歌都係，可以令我諗返起好多事。」

「咁呢首歌帶比你既回憶係點？」

聽到Nick咁問，我即刻變得好憂傷。

呢首歌確實係好好聽，好聽在即使你冇睇過套動漫，就咁聽個旋律，已經感受到當中既情緒。

我冇答到Nick既問題，但嗰刻我確實諗起左一啲唔好既回憶。

或者我就係一個咁自虐既人，即使呢首歌帶比我既意義，係一段又一段我唔想再諗起既往事，我依然想聽落去。

我擰轉面望住Nick，但係我不發一言。

Nick好似察覺到我有少少唔妥，亦都冇再追問落去，反而喺佢背囊入面拎左件風褸出黎，披喺我身上。





「夜晚好凍啊，著多件衫啦。」

唔知有冇人好似我咁情緒化，單單一首歌已經可以令我心情不停地起伏。

但我唔想表現我脆弱既一面，所以我強忍住眼淚，挨左喺Nick既膊頭。

「如果沉默會令你好過啲既話，你唔需要同我講任何野。」

我既舉動喺普通人眼中，大概會顯得非常奇怪吧，但Nick並無過問我任何野，只係由我靜靜咁喺佢身邊。

旁邊華麗既旋轉木馬傳來孩童既歡笑聲，佢地用一歐羅既價錢買片刻既歡樂；而我既五歐羅卻換黎一整晚既哀傷，同Nick無聲既陪伴。

*





行返去Hostel途中，我地一直都保持沉默，但並無任何尷尬既感覺。

返到去之後，我地簡單咁互相講晚安就返左佢各自既房。

嗰晚我再上YouTube搵返呢首歌，不停地重播。我都唔知點解我咁中意虐待自己既情緒。

我打開WhatsApp，同Nick講:

Me: Sorry if I acted weird tonight, and thanks for your understanding.

Nick: It’s okay, everyone has emotions. 不過都係笑既你靚啲，聽日喺大堂等你食早餐。Good Night.

我見到佢既訊息，會心地微笑。

究竟遇到Nick，係咪我既福分？