《我竟然同左一個陌生男仔去歐遊...》: 《開端》

我叫Jessica，但朋友多數都就咁叫我Jess，自細係外國長大，中學先返黎香港讀書，三大BBA Grad，GPA不過不失。
 
我畢業後冇狗衝入Big 4，而係選擇左去一個人去歐遊，依家潮流興講流浪，出走，冇旅行的意義呢隻歌仔唱喇。學啲文青話齋，一個人去流浪既意義就係尋找自己啊嘛，咪即管試下係咪真係咁正。

我份人好識理財，亦都唔大洗，所以大學期間靠Part-Time同幫人補英文都儲落唔少，絕對足夠我放任自己幾個月。
 
話說因為家屬關係，我可以拎所謂既「一折機票」，但即使唔係行內人都知，我呢啲小薯SUBLO通常都要係機場等到2046先可以上機，尤其係Grad Trip呢啲旺季。但我因為唔想將大部分錢都用係機票上，我選擇左等。
 
本來諗住飛英國一日有咁多班機，點都有一班會上到，但少年我真的太年輕了，我朝早七點就到機場，開始等啊等啊等，由257等到251，地勤姐姐都同我講話冇位，仲話聽日後日都未必會有。
 




雖然我都有心理準備要等好耐，但我真係太蠢，冇諗過英國啲機咁爆。

Hostel book左冇得退錢，但好彩未買英國去下一個國家既機票，因為當初都係諗住確定我去到英國先決定下一個目的地。我係一個好唔中意Plan行程既人，所以冇任何後著，依家諗返起都覺得on9。
 
因為係機場坐左幾乎全日，人都癲埋。我近乎崩潰咁走去同地勤姐姐講：
 
「不如你同我講有邊班歐洲機有位啦......邊度都得……」
 
佢見到我眼淚不斷係我眼中打轉，仲有甩色甩到一節節既眼線，有啲嚇左一嚇，不過都好好面口咁幫我查機位。
 




「兩個鐘之後飛去Milan既機仲有好多位淨，小姐你要唔要試下stand by呢班？」
 
我聽到有位呢兩個字，即刻唔理三七二十一話左好先，只要個國家係歐洲版圖內我就Okay。
 
知道班機有好多機位淨之後，我都叫做暫時鬆一口氣，去返Waiting Area抖返啖氣先。

不過諗諗下，我對米蘭真係一啲興趣都冇，當初查seat availability既時候自動scan走左佢，早知做足兩手準備。
 
對住咁多名牌，哪有錢？呢次本身都係諗住窮遊，都係留返啲旅費之後可以慢慢用。





我唔想諗太多，呢刻都係睇下米蘭啲hostel/Airbnb仲有冇位，唔係去到歐洲就真係做無家可歸既流浪漢。
 
正當我拎住部IPhone係個mon禁黎禁去個陣，隔住我一個位既男仔突然拍一拍我膊頭。

 
「唔好意思，想問下你有冇興趣住我係Milan既Airbnb？」


我稍微抬頭一望，佢好好笑容，睇上去同我差唔多大，笑起黎左邊面有粒好深既酒窩，皮膚黑黑地，眼細細，客觀角度黎講一定唔算靚仔，但好陽光男孩feel，或者可以講係好charm。


我就係一個咁膚淺既人，個腦process左佢個樣先process返佢岩岩問我既野，然後我呆左大概3秒，就口快快咁話：


「好啊！」屌，我都唔知點解我當時會咁爽快就應承左。






「估唔到你咁快就話好，你唔驚我係變態佬咩？」佢同我講野既口吻十足似識左好耐咁。


「Er，咁我依家都真係好絕望既，不過你點知我要去Milan，仲要搵緊地方住？」我皺起眉頭問。


「冇，我岩岩係你隔離櫃檯拎stand-by ticket 個陣，聽到你同啲staff講既野姐，拿，我唔係特登偷聽架，但我見我地大家都係去Milan，而你又好似冇地方住，咪問下你有冇興趣囉。」佢一副不經意既樣子。


我聽完佢講，淨係諗到佢個陣見到我就黎喊個個樣一定好樣衰，我自尊心好強，比人見到我喊我會覺得好柒，仲要係佢對我既第一印象。


「有啊，反正去到hostel都係要同啲陌生人同一間房架啦，Airbnb聽落都好似安全啲，但你肯定個屋主唔會有問題？而且我既情況比較複雜……因為我根本唔知我下一站會去邊……」我微弱既聲線，加上我溶左一大半既妝，營造出一種楚楚可憐既感覺。






「Okay啊，我個host好好人，佢寫到明話加多個人既話加錢就得，不過間房得一張雙人床，我男仔訓地下冇所謂，最多你請我食Pasta當補數囉。」佢一邊講我一邊偷偷咁望住佢個酒窩。


「啊，同埋我同你都差唔多，前幾日都係見Milan有好多機位先book呢班，啲sublo ticket真係令人又愛又恨。我自己一個去Grad Trip，雖然都諗住去兩三個月，但依家都係諗住係意大利到周圍行咋，未諗下一步去邊，依家多個伴都幾好丫！」


我個刻既心情又驚又喜，估唔到仲會有人好似我咁，歐遊前連少少行程都唔plan，汁下個gip就上機，拿，呢啲先係真正既流浪啊。


「有冇咁岩啊？我又係自己一個去Grad Trip，係既話就一齊啦，雖然本身諗住自己去，但大家咁志同道合，就might as well啦。」我個刻其實好感動。


「Might as well？講野咁ABC啊。好啦，都係見大家有緣咋，我趁依家上機前仲有時間我同我個host講定先啦咁。By the way, nice to meet you, my travel buddy, I am Nick.」佢一本正經咁伸隻手出黎。






「Likewise, I am Jess. 」我都擺出我既招牌笑容，伸手回應返佢。


過左冇耐我地兩個都比人叫左去check-in counter，因為仲有成十幾個位淨，我地就請地勤姐姐安排我地坐係對方隔離，然後拎住boarding pass，半行半跑咁去到登機閘口。


如是者，我同一個識左一個鐘既陌生人，開始左我地既歐遊之旅。