【少少甜】扑野扑得你心碎: 十七

早上睜開眼第一個見到既又係Lucy，佢就訓左響我隔離。
 
我環顧四周，發現呢度好似唔係自己屋企，亦都唔係阿輝屋企，換句話講呢度即係Lucy屋企。
 
識左Lucy咁耐都未上過佢屋企，估唔到佢間房佈置得幾得意。
 
四面墻都係Slowdive d海報，書檯仲有部舊式Cassette機，行近去睄左睄，哇屌，全部都係黎明，諗唔到Lucy聽歌d口味都幾奇怪，又聽黎明又聽Slowdive,仲收埋成堆Cassette帶。
 
「頂你，唔好搞我d野！」Lucy訓醒第一句就鬧人。
 




「睇下姐，唔洗咁大反應既。」
 
「我d私隱係你隨便可以睇架咩？」
 
「對唔住咯，洗唔洗咁惡呀。」我一臉無奈，「話時話，琴晚又係你抬我返黎架？」
 
「係呀。」
 
「咁阿輝個衰仔呢？你唔叫埋一齊抬？」
 




「佢要送Wendy返屋企呀嘛。」
 
「真係辛苦你。」我說，「不過識你咁耐都唔知你住邊，你依家係咪同屋企人住？」
 
Lucy打個喊路，然後點點頭。
 
「咁琴晚佢地無見到你帶個我返黎呀下嘛？」
 
「佢地早兩日返左大陸。」
 




「哦，咁都好d。」
 
「見到都唔怕啦，佢地兩個都知道我鐘意女人既。」
 
「話就咁話姐，但係一個女仔帶個男仔返屋企都係唔多好既。」
 
「婆婆媽媽，成個女人咁。」
 
「頂，咁係呀嘛。」
 
「唔好咁多廢話啦，拿拿臨洗個面返公司啦。」
 
「得啦。不過睇唔出你聽歌口味都幾獨特，又黎明又Slowdive，除左呢兩個你仲聽d乜野？」
 
「陳百祥呀，頂你。」




 
「陳百強？呢個我都岩喔。」
 
「你快脆d去洗面啦，你有好多眼屎呀。」Lucy夾硬拉我去洗手間。
 
從一片打鬧中我倆暫時忘卻查案既煩惱。