【少少甜】扑野扑得你心碎: 十二

為左提升效率，我同Lucy分開調查，佢去查黃大濤電腦協會Wong Tai To Computer Organization，佢話黃大濤同黃麗麗都係姓黃，二人應該有關聯。
 
但係我地之前已經將死者生前所有既親朋戚友查過一次，無一個人叫黃大濤，所以個人覺得佢兩個應該係唔識既
 
而我就去查巫師二十二件魔裝協會Witch’s Twenty-Two Coats Organization，之前上過佢地個官方網站睇過下，發現呢個協會唔係遊戲公會，而係一班cosplayers搞既一個組織。
 
死者黃麗麗有可能婚後迷上左玩cosplay，有次所有成員一齊打扮成Marvel入面既英雄人物出席聚會，而途中可能有人入戲太深當正自己係變形俠醫發曬癲咁打人，最後黃麗麗躲避不及就咁被人打死左。
 
但諗諗下好似又講唔通，法醫話黃麗麗染上愛滋，如果佢知道自己有個咁既病，應該唔會有心情同人玩cosplay。
 




而且響仲未肯定黃麗麗到底係咪同呢個cosplay組織有關之前，呢d猜測都係同斷鳩估差唔多。

講開又講，戲d入面人猜案都好似都係斷鳩估居多。
 
帶著滿腦既猜想，我黎到呢個由巫師二十二件魔裝協會每個定期舉辦一次既「Cosplay人日日聖誕聚會」。
 
活動地點係康民署轄下一個多用途康樂室，而今日個Cosplay個主題係火影忍者。
 
臨急臨忙我就唔知去邊度先搵到全套忍者衫，唯有去運動用品店買條運動頭帶，再響電腦影印個火影標誌粘上去當係動畫入面個頭套。
 




為左再顯示多小小誠意，我仲特登響兩邊臉畫三條線，再加埋個金色假髮，成個鳴人樣出曬黎。
 
我響人堆中暗中觀察，但搵左好耐都無發現有其他人手背上有同黃麗麗一樣既紋身。
 
突然有人從後拍我膊頭，：「Hello！」
 
我嚇左嚇：「邊個？」
 
「唔洗咁大反應，我同你打聲招呼姐。」眼前既男人身穿紅色浴袍，背後掛住個大葫蘆，面上印住一個「愛」字，「你第一次黎呀？」
 




我答：「係呀。你又係第一次？」
 
「唔係，我係呢度常客黎，黎過好幾次啦。」
 
「哦…原來係咁。」
 
「睇你個樣好似唔多順利喔？」佢笑淫淫望住我。
 
我不知所以。
 
「咩順唔順利？」我問。
 
「唉，唔好扮野啦，你睇下呢身裝扮仲求其過我，我一睇你就知係黎博懵架啦？」
 
「下？」我理解唔到佢呢句說話，「博懵？」




 
「呢度四分一既男人包括我，都係同你一樣另有目的既。」
 
我果刻心諗：唔係掛？唔通撞到同行？
 
我硬著頭皮接話：「唔通你又……」
 
「大家心照啦。」佢仍然係笑淫淫咁款，「拿，咪話我唔益你，你既四點鐘方向，人稱cos界連詩雅，請佢食餐M記就上得，岩曬你d新手。」
 
佢繼續笑笑口咁講：「係人都知cosplayer圈子幾淫亂架d女幾嫩口架啦，實不相瞞，我響呢度前前後後加埋食左三條女，嘻嘻！」
 
我頓時恍然大悟，原來博懵係指溝女、順唔順利係問我溝唔溝到女。
 
從呢短暫交談間，聽得出呢位我愛羅仁兄好似幾了解呢個協會既人事背景，話唔定從中套出一些線索。