我係喜達,撈麵界既亞視續集,一個屬於黑林頓兒子既故事: 製毒篇

『喂,拎個燒杯比我』

『唔係呢個呀,大果個呀』

『留意溫度』

『結唔結到晶呀?』

『屌..留意溫度呀』





『勤仔拎份大料比我』

一個大約五百呎既單位,充斥住難聞既氣味

有四個人帶住防毒面罩

周圍都係試管,燒杯,化學物質

呢到一個製毒工場





每個人都好緊張咁等待最後成果

『掂呀,粒粒都晶瑩剔透』

『仲講?打比馬老闆啦』

『喂,你地去包裝好佢,記住一公斤一包,唔好磅多,唔好磅少』

『收到』






我叫黑邦,今年二十一歲

我至細就跟住呀媽生活

我從小就唔鐘意讀書,讀完中六就再讀書出黎做野

送貨,裝修,地盤咩都做過

但係份份工都未做夠一個月就無做

呀媽都無鬧過我,只要我健健康康就可以

呀媽好少講起呀爸,但係只要一提起,就喊到收唔到聲





呀媽話比我知,呀爸係一個好人,講書好叻

奈何我係呀爸既相反

直至有一次係酒吧,我認識左呀勤

佢全名叫李克勤,同一個老鬼歌手同一個名

我開始跟住呀勤搵食,一開始佢帶我去做收數

馬伕,黑市賭場,賣毒品,我咩都做過

我黑邦無野驚

只係驚就係無錢





我要搵到錢比呀錢過好生活



我唔好吸毒,唔賭錢

我望住每一個同我買毒品既人

我唔明白佢點解要咁墮落

當然,我唔會講出口

『呀邦..嘩..呢隻野..無得頂呀...比..比多1個G我』





『無問題..多謝老闆一千蚊』

『喇..收錢..喂邦仔你都整啖啦』

『唔洗喇,食左喇我頭先,飽晒喇,你慢慢啦』

我又講左一個大話

對住呢d人

一定要學識講大話

我每日都會好準時咁收工

我每晚都要同媽媽食飯





『仔,你呢排又返咩工呀?咁準時返黎既?』

『哦..無..做售貨員囉..』

『哦..今次唔好做一陣就唔做喇』

『知喇..』

『仔呀,裝香比呀爸』

『哦..』

我望住神枱上面,爸爸既相片

爸爸個樣好慈祥,好溫暖,同我好唔同

有時我都會諗

如果爸爸仲係到,佢會係點既一個人呢

爸爸係我兩歲既時候就過左身

到我大個左之後,呀媽話比我聽,爸爸遇到打劫,比人用刀插死左,個賊拉唔到

所以我樣樣壞事做極,我都話比我自己聽,唔可以打劫

食完飯,呀勤打比我

『點撚樣呀李克勤』

『喂喂喂邦哥仔,大佬話比位我地上呀』

『又有咩位上呀』

『佢比我地入廚房呀!』



嘿..呢次仲唔到黑邦上位?!



呢個世界,乜野都可以投資

只要你諗得出,都有人投資

車呀,樓呀,回收垃圾,女人呀乜都得

喂咁你會問喇

下?女人都可以投資?

屌

你睇下電視機,果班完全講唔出佢個名既所謂女子組合

著塊丁咁大塊既布係身,跳埋d不停腿張開既舞

一樣有人投資

而我今次去做既野係製毒

一樣有人投資

今年係二零二四年

不論係水路,陸路

輸入毒品去香港既途徑越來越少

已經有好多既科技去防止人運毒

唯有就係香港本地製毒

我地唔係一班製毒,然後賣出黎既人

因為我地無本錢

我地只係負責製造

背後有人出錢投資

投資比我地製毒

我相信回報會係咁多樣投資最高既一種



今晚我地來到土瓜灣一棟舊樓

『來哥,我同呀邦係門口喇』

『等陣啦』

開門既人叫來哥,全名叫馬來

行來人會叫佢做馬老闆,而我地直屬佢,就會叫佢做來哥

『邦仔,學到幾多既,就係自己』

李哥搭住我膊頭

今晚

我開始左我既製毒工作


投身製毒工作之後

黑邦既收入轉眼就以十倍跳升上去

而每日係工場既時間相當少

只要做到馬老闆每個月指定既生產量

基本上我係好得閒

得閒既時候

李克勤會去嫖妓,工場其他既人就會吸食返自己造出來既毒品

黑邦收工之後從來都唔會同佢地來往

『癡撚線,自己造既毒品都食,明知係用化學物品提煉都食?!』

黑邦為左唔想呀媽問長問短

黑邦只好每日都係街行黎行去

黑邦行到去一個圖書館

打算睇書過下日晨

黑邦睇左好耐,揀左一本書

書名叫住『時光倒流』

作者叫做陳玉芬

黑邦揀左一個角落頭位坐低睇書

書入面所有野都係講數據,而唔係天馬行空既幻想故事

黑邦睇得好入神

直覺話比黑邦知道

呢一樣野唔係無可能

結果黑邦睇足全日

到最後黑邦借左呢本書走

『媽,返黎喇』

『沖個涼食飯啦』

『呀媽..今個月家用』

『嘩咁多既..五萬蚊?你邊到搵咁多錢架』

『..呢排多客』

『嘩..當我幫你儲起佢先』

沖涼既時候

黑邦諗起岩岩呀媽既表情

黑邦有自豪既感覺

我搵到錢,呀媽開心

雙贏

食完飯之後

黑邦坐係飯廳睇新聞

『一名中年男人遇劫被刺十多刀致死』

每當黑邦見到呢類型既新聞,就會諗起佢爸爸

黑邦好嬲

『屌你打劫咪打劫囉,做咩要殺人..』

『點解要做賊』

『咁你又點解要製毒呀』

黑邦同時又問自己

黑邦聽過呀媽講,爸爸以前係呀媽既上司,收入好高,起碼有車有樓

『就係果個賊』

『殺死我爸爸既賊』

『係佢破壞左我既家庭,係佢令到我要成長係單親家庭,係佢要我呀媽捱足一世,係佢..』

『所有野都係因為佢....』

『我製毒姐,我無迫人吸毒喎』

『又唔係我發明出來,供求,有供就有求,你唔買我造出來都無用架喎』

『要怪就怪個賊..唔好怪我..』

『我無做錯』

黑邦經常都會催眠自己

將自己做既壞事,推卸係殺死佢爸爸既人身上

黑邦返入房之後

拎起今日係圖書館借書果本書

『時光倒流』

黑邦重新仔細咁睇一次呢一本書

書既內容主要係講,要成功進行時光倒流所需要既野

作者自稱投資十多年製造器材,用左唔少錢,係上年成功咁試過七分鐘時光倒流

但係報紙,電視都無聽過呢件事

係黑邦睇晒呢本書之後,已經係半夜三點

黑邦關燈

『..』

黑邦失眠

滿腦子都係呢本書講既野

半個鐘之後,黑邦慢慢訓著左

黑邦發左個夢


『唔好斬我爸爸呀..』



『喂,邦仔精神呀喂』

黑邦比勤仔既電話嘈醒左

『咩料呀』

『屌,廚房比人爆左呀』

『...爆入廚房偷你果d濕鳩撈麵呀?』

『屌你醒啦仆街,廚房呀!工場呀!工場比差佬爆左呀,差佬呀仆街』

黑邦成個人彈左起身

『仆街啦..』

『閃啦邦仔』

『下...閃..閃..做咩要閃呀,邊個知係我地姐』

『屌你啦黑邦你清朝人黎架?周圍都係我地d指模,我地以前衰野上差館,打過指模架,一查就知係我地啦』

『..屌..係喎..咁點呀..馬老闆呢』

『佢漏夜搭飛機飛左去東歐啦,呢家係烏克蘭渣緊波啦,唔好講咁多廢話喇,快d執多幾件衫出黎啦,十分鐘後係你樓下接你』

『好..拜拜』

『喂咪住先邦仔你有幾多錢呀』

『都仲有三萬蚊既』

『我屌你呀?做製毒得三皮野係身?』

『咁你有幾多呀又』

『..八千』

『屌你咪仲衰過我,我試下問我呀媽借啦』

黑邦走左入媽媽房

『媽呀..我之前比果d家用你,可唔可以借返比我先?』

『下..哦,有事呀?』

『哦..無..我有個同事打算搵我夾錢做d小生意,呀係呀..係大陸搞架,我應該有排先返』

『仔..係咪有事呀..唔好嚇呀媽呀』

『無..邊有事姐』

『你要幾多呀?』

黑邦媽媽打開左個櫃桶

『呢到有四萬蚊係到』

『哦..我拎走三萬啦,呀媽我會還返比你』

『仔..小心呀,打比呀媽呀』

『得喇,知喇』

黑邦求其執左幾套衫,幾條底褲就衝左落樓下

李克勤已經渣住架貨van係門口等緊

『嘩,你幾時買左架貨van呀?』

『偷返黎架,著草唔偷返架車邊似樣架,唉唔好講住喇,你有幾錢呀』

『總共六萬』

『都好d,我地兩兄弟夾埋差唔多都有七萬蚊』

『係我有六萬,你有八千』

『屌..我地兩兄弟講呢d』

『咁點呀,係咪過東歐搵馬老闆呀』

『點會搵到佢呀風頭火勢,咩人電話都唔聽架啦佢,況且我地得幾皮野,過東歐把撚咩』

『咁點呀,咁去邊呀』

『邦仔你啖定啦,有我係到拍住你,去邊都咁精神啦,我地唔去東歐!去東莞!』