[獻給故友] 念: 第一章

今朝番到公司, 一早就有好多人入黎恭喜住我, 「喂, Roger 哥, 掂哂啦, 你對家件八婆 Annie 尋日 last day, 無左呢件八婆, 咁睇黎你上位應該都好快有望嘞!」

我笑住咁收哂佢地啲祝福, 「唓, 多餘啦, 就算佢真係仲響度我都未曾驚過佢啦, 不過又話時話, 其實點解佢又會無啦啦 resigned 嘅?」

所有人都搖住頭, 就連 Annie 果邊啲人望住我都縮一縮膊, 「好嘞, 唔好再講呢啲嘞, 大家快啲做野先, 今日下晝食 lunch 我嘅!」 所有人聽到都一片歡呼。

話雖如此, 但突然之間無左 Annie 呢個競爭對手, 雖然我響公司嘅升職機會又真係會大左好多, 但響我心入面, 始終都對呢個女人嘅做事魄力又真係有啲佩服。

半個月之後, 果然, 公司真係出左我升職嘅 Memo, 雖然已經係意料中事, 但唔知點解響我心入面硬係仲諗緊究竟點解 Annie 突然之間會話唔做, 就連佢身邊啲人都無一個知道個中原因。



呢一晚, 我收工收得比較夜, 已經接近十點半, 我離開左公司之後, 落到公司大廈停車場攞車, 車已駛離停車場, 而我亦正如常揸住部車向住屋企方向進發。

今晚天氣唔係咁好, 由今朝到而家都不斷落住雨, 車已經行左一半路程左右, 突然……

咦, 點解有個女人會響街度揼住雨咁行嘅, 但我再望真啲, 果個唔係就係 Annie 黎嘅。
 


我駛左部車埋去路邊, 跟住我再攞住把遮行左落車, 然後就向住 Annie 個背影方向跑到上前, 把遮已經響佢個頭上遮住, Annie 望一望我, 但面上就依然係一臉冷漠咁。



我地企左響街度, 等左一陣, 我同佢講, 「我有好多野想問妳, 而家落咁大雨, 不如妳上我車度先再講吖!」

Annie 依然呆呆咁, 但企多一陣, Annie 佢亦開始同我行左去上車度。 

車上, 我摷左條毛巾出黎遞住比佢, 「抺吓啲水先, 咁樣妳會好易病架!」 Annie 接左我條毛巾之後, 但就見佢呆呆咁揸住響手度。

我望住佢, 跟住就再同佢講, 「係咪有啲咩事咁? 妳使唔使我幫吓妳手呀?」 Annie 終於都肯出聲, 見佢搖一搖頭咁, 「唔使, 已經無人再可以幫到我架嘞!」

見佢擰側個面望住窗外, 而我就更加肯定佢一定係有啲事情發生左嘅, 我開始撻著部車, 跟住我就打算車佢番去佢屋企果區度至算。