[愛情浪漫］［懸疑] 求婚。求分: 第十回 - 求婚 (上)
六悸酒店高級西餐廳內。
凌的話一直纏繞著我，我想把事情擺出來說清楚，但又怕結果很難看。
就當作從沒聽過好嗎？
「你無野丫嘛，係咪唔舒服？咁靜既你今晚。」宏擔心地問。
「我...無乜野啊。」我沒精打采地回應。
眼前的比目魚扒像沒動過一樣。
「無事就好喇。係喇，其實今晚我有d野想同你講。」宏廷直身，我方留意到他這晚西裝筆筆，打扮得甚是莊重。
說著宏把手伸進手提包裡，像是要拿東西出來。
我知道他接下來將要做什麼。
「阿宏，等陣先。」我打斷了宏的動作。
因為，我已經決定了。
「係你講你想講既野之前，其實我有野想問你。你可唔可以應承我，要老實、坦白咁答我。」我異常認真地問。
要把事情弄清楚。
宏把手縮回，以奇怪的眼神望著我，然後說：「係咩事？好，我應承你。」
「我今日撞到阿凌。」
宏聽後立時感到錯愕，我也預料到他會這樣的反應。
「我同佢傾左唔係好耐，但係就聽到一樣野令我好在意。」
「佢同你講左d咩啊究竟？」宏開始緊張起來。
「佢話當日係你主動提出分手。」我繼續說。
宏沒有說話，我也沒說下去，我們沈寂了，空氣凝結了，此刻聲音已難以透過空氣傳達。
數分鐘後...
「你有咩睇法？點解佢要咁講。」我忍不住打破沈默。
宏拿起桌上的紅酒，大喝一口後嘆息一下。
「估唔到。其實呢件事我之前一直都想向你坦白，但始終無勇氣。」
「即係點...」
「雪瑩，我想你冷靜d，聽我講。」
「好。」
「阿凌佢無講大話，講大話果個係我。原本果日我真係諗住向阿凌求婚，但係最後提出分手既係我。」宏淡淡然的說。
「你究竟講咩啊？你之前唔係咁講架喎，唔係，應該話你寫果本日記唔係咁架喎！」我越發激動。
「你唔好激動住，慢慢聽我講。大學Year 1 我第一眼一見鐘情果個唔係阿凌，係你。」宏說。
「你本日記明明係寫一直想同阿凌一齊，唔通本日記係你亂作既？一開始已經係？」
「我知你想講乜，但並唔係你所諗咁。我無亂寫本日記，入面既的確係我真實既感受。只不過你誤會左，日記裡面頭兩頁所指既果個她，同第二頁之後果個她並非同一個人。」
我無言以對，試著回想日記的內容...............
(待續...)