【邪惡迪士尼系列】《白雪公主與七個毒撚》: 第一章

係好耐好耐以前，一個繁華嘅國家入面，皇后係一個寒冷嘅冬天中，誕下一個女孩。
 
佢哋住係一間豪華嘅城堡入面，享受住最高貴、奢華嘅物質生活。
 
城堡金碧輝煌，城堡旁邊嘅古董擺設全部都價值連城。大至古董，細至餐具酒杯，都係經過千挑萬選。城堡入面仲有百幾個傭人去服侍佢哋，係誇張到，就算每個人去服待國王，係會有一堆人連腳趾都奶唔到。
 
所以，女孩係含住金鎖匙出世。
 
唔知係咪因為冬天出生嘅關係，個女仔皮膚如雪般白晢；嘴唇好似天生塗上口紅咁，好紅；頭髮好似天生用咗飄柔咁，十分柔順，而且烏黑亮麗。
 




簡單啲嚟講，姐係天生麗質，一出世就以傲人嘅姿勢示眾。
 
女孩一出世，就已經加入咗人生勝利組。
 
國王與皇后以為喱個女孩係上天俾佢哋嘅恩賜，過後會過住美滿幸福嘅生活。
 
誰不知女孩出世無幾耐，皇后就重病過咗身。
 
國王因為皇后嘅過世，終日愁眉苦臉，鬱鬱不得志。
 




事情過咗一排，國王開始走出陰影，開始明白單身嘅好，單身嘅自由。
 
其實唔需要怕寂寞，無人陪，身為一國之主，點會愁無人相陪？
 
於是每日都風花雪月，花天酒地，係喱個酒池肉林嘅世界入面，國王反而好享受，而照顧女兒嘅責任，自然落在傭人身上。
 
係喱種吃吃樂樂嘅生活入面，國王不曾抱著真心，每個女人都只不過係國王消遣嘅玩具。
 
希望藉著尋歡作樂去忘記過咗世嘅皇后。
 




而係咁多個女人入面，唯獨陳紅得到國王嘅青睞，而陳紅亦熟知男人心，討得國王甚是歡喜。
 
後來陳紅便成為女孩的繼母，而國王的生活仍舊風流快活，喱一切陳紅都無放在心內，佢想要嘅，就係依家喱個生活。
 
一個貴婦般嘅奢華生活。
 
一開始，陳紅對於喱個可人兒都疼愛有加，因為覺得佢好可愛好得意。
 
個心態就好似去玩人哋個細路咁，又唔係自己生，人又得意，得閒無事就去撚下佢，感覺幾爽。
 
照顧又唔洗自己照顧，有傭人架嘛係咪？
 
得閒就買啲嘢俾佢，氹下佢開心。
 
最緊要嘅係，個女仔又唔係陳紅親生嘅，又無經歷過十月懷胎之苦。




 
陳紅因機緣巧合下，得到一塊魔鏡。
 
陳紅時常去問魔塊：「魔境魔境，喱個世界上邊個最靚呀？」
 
魔境望一望身材已經走曬樣嘅陳紅，水桶腰，大象腿，唔明點解國王會娶佢返嚟。
 
以前身材婀娜多姿，樣子甜美嘅陳紅，年輕嘅時候真係一朵美豔嘅鮮花。
 
花，總有凋零嘅時候。
 
「梗係你最靚啦，身材又正，樣又靚，雖然有些少年紀，但歲月都偷唔走你嘅美麗。」
 
哇講得幾鬼好聽，幾鬼動人呀？
 




喱一番鬼話連篇，明眼人一聽就知係假，但偏偏陳紅好鐘意聽。
 
最緊要嘅係，魔境入面嘅陳紅，映出嚟係一個年輕貌美，身材姣好嘅陳紅。
 
其實一切都係魔境製造出嚟嘅幻覺，佢知道講真話後果會點。
 
就係俾人拋棄，無人理，係一片荒蕪嘅地方享受著虛無嘅寂寞。
 
魔境上一手主人，就係因為魔境嘅直話直說，得罪主人，因而落得如斯下場。
 
魔境依家學乖咗，執生成為咗佢生存嘅秘訣。
 
但陳紅因為咁樣成日都心花怒放，所以佢好鐘意塊魔境，覺得佢係寶。
 
國王之所以會再娶陳紅，係因為佢有幾分似佢過身嘅皇后。




 
皇后嘅身材都一樣走曬樣，青春不再，但國王無介意，一直一直咁深愛住佢。
 
靚唔靚，從來都唔係深愛一個人嘅理由。
 
影子會跟人一世，國王內心嘅陰影從未消失過，只係佢自己唔清楚咁解。
 
個女仔一日一日咁大，慢慢大家因為佢皮膚嘅關係，都叫佢做白雪公主。
 
白雪公主萬千寵愛在一身，繼母同國王都會將最好嘅嘢留俾白雪公主，城堡裡嘅傭人更是對白雪公主唯命是從。
 
白雪公主因而由細到大都持寵生嬌，公主嘅脾氣漸漸係城堡入面顯露出嚟。
 
例如食晚飯嘅時候，只要唔啱白雪公主口味，就發曬脾氣。
 




有一次，全部人係餐枱上如平常地用餐。
 
白雪公主忽然停下動作，道：「我想食泡菜！」
 
國王準備放入口嘅牛排都停咗落嚟，所有人嘅視線都放咗落白雪公主身上，然後面面相覷，唔知點算好。
 
咁又係嘅，又邊個會估到公主會食食下牛排想食泡菜先得架？
 
身邊反應快嘅女傭即刻走過嚟同白雪公主解釋，「公主，依家無泡菜呀，聽日立即為你準備，好嗎？」
 
「唔要！我要依家食泡菜！」佢扭曬計咁，啲脾氣出曬嚟。
 
「唔好咁啦公主，我哋好難做架……」
 
正當女傭們唔知點做好嘅時候，國王就下命令：「入去叫廚房整啦，梁伯識做架啦。」
 
女傭們你眼望我眼，「係！」
 
最後係白雪公主如願咁食到泡菜，一臉幸福嘅樣子，風波亦就咁平息。